Žychary vulicy Mirašničenki sami adnavili pamiatnuju šyldu hieroju Vialikaj Ajčynnaj vajny
Žychary vulicy damoŭ 47—49 pa vulicy Mirašničenki adznačyli dzień naradžeńnia hieroja Savieckaha Sajuza, u honar jakoha nazvanaja ich vulica. Śviata takoha maštabu na hetaj dvarovaj terytoryi pravodziłasia ŭpieršyniu, na futbolny stadyjon pamiž damami byli zaprošanyja i žychary susiednich dvaroŭ.
Dałučylisia da śviata i muzyki — na stadyjon zavitaŭ hurt Laudans. Muzyki vystupili z hadzinnym žyvym kancertam, šmat razmaŭlali z publikaj.
«Zaraz kancerty ładziacca amal va ŭsich minskich dvarach, u nas ža jon adbyŭsia ŭpieršyniu. Daviedaŭšysia, što ŭ hetuju subotu dzień naradžeńnia hieroja vajny, u honar jakoha nazvanaja našaja vulica, my vyrašyli adznačyć hetuju datu — ludzi, jakija da siońniašniaha dnia nie viedali navat imionaŭ adno adnaho, litaralna za tydzień sami ŭsio arhanizavali i zładzili sapraŭdnaje śviata», — raspaviali miascovyja žychary.
Paśla kancertu haradžanie prasłuchali lekcyju pra podźvih Piatra Mirašničenki — va ŭzroście 22 hadoŭ jon zakryŭ saboj ambrazuru varožaha DZVK, — a kulminacyjaj viečara stała ŭračystaje adkryćcio novaj šyldy ź jaho imiem, chvilina maŭčańnia i ŭskładańnie kvietak da novaha miemaryjała.
«Šylda pra toje, u honar kaho i čamu nazvanaja vulica, jość amal usiudy. I ŭ nas takaja była na adnym z damoŭ, ale padčas rabot dobraŭparadkavańnia rajona jaje źniali i nie viarnuli nazad, los jaje nie viadomy. My vyrašyli adnavić narodnuju pamiać pra hieroja vajny», — raspaviali žychary vulicy Mirašničenki.
Piotr Afanaśjevič Mirašničenka (1922—1944) — udzielnik Vialikaj Ajčynnaj vajny, kamandzir uzvoda piešaj raźviedki 717-ha strałkovaha pałka 170-j strałkovaj dyvizii 48-j armii 1-ha Biełaruskaha frontu, lejtenant. Hieroj Savieckaha Sajuza (1944).
Naradziŭsia 10 kastryčnika 1922 hoda ŭ vioscy Zapolle (ciapier ŭ Žytomirskaj vobłaści) u siamji sielanina.
U noč na 1 studzienia 1944 hoda strałkovy połk atrymaŭ zahad vybić fašystaŭ z zajmanych pazicyj i vyzvalić siało Piečyšča Homielskaj vobłaści, jakoje było adnym z važnych apornych punktaŭ praciŭnika. Podstupy da jaho prykryvalisia niekalkimi DZVK. Lejtenant Mirašničenka atrymaŭ bajavoje zadańnie — svaim uzvodam błakavać dva varožyja DZVK i paśla ich źniščeńnia zaniać častku nasielenaha punkta.
Paśla pačatku ataki pa ŭzvodu byŭ adkryty kulamiotny ahoń. Lejtenant kinuŭ u DZVK hranatu, i atrymaŭ ciažkaje ranieńnie, nie moh bolš vieści ahoń. Dabiehšy da DZVK, zakryŭ jaho svaim ciełam.
Pachavany ŭ brackaj mahile ŭ horadzie Śvietłahorsk.
Paśmiarotna prysvojena zvańnie Hieroja Savieckaha Sajuza.
Ideołah Minabarony raskazaŭ, što hulniu Pokemon Go vykarystoŭvali dla špijanažu — źbirali danyja pra avijabazu ŭ Mačuliščach9
Kamientary