Advakat Viktara Babaryki i Maryi Kaleśnikavaj raspavioŭ u žyvym efiry radyjostancyi «Echo Moskvy» ab ich reakcyi na sustreču Alaksandra Łukašenki z aryštavanymi apazicyjanierami ŭ SIZA. Pa słovach Alaksandra Pylčanki dla apazicyjanieraŭ heta było niečakana, jak adznačyŭ advakat, Maryja Kaleśnikava ad sustrečy admoviłasia.
«Dla ich heta było niečakana. Taki kreatyŭny chod Łukašenki. Ja nie pamiataju vypadkaŭ, kab chto-niebudź prychodziŭ da aryštavanych asob i vioŭ razmovy ab źmienie Kanstytucyi abo niešta padobnaje. Heta było niečakana», — raspavioŭ advakat.
Pry hetym A. Pylčanka adznačyŭ, što Maryja Kaleśnikava admoviłasia ŭdzielničać u sustrečy, bo ludzi ŭ cyvilnym, jakija pryjechali da jaje ŭ SIZA [u Žodzina], nie pradstavilisia i admovilisia paviedamić kudy źbirajucca jaje vieźci.
«Akazvajecca, u piatnicu da Maryi pryjazdžali dvoje miłavidnych mužčyn, jak jana skazała, i razmaŭlali ź joj na hetuju temu, ci nie chočacie parazmaŭlać [z Łukašenkam]. Maryja takaja kreatyŭnaja dziaŭčyna, vidać, ich troški napałochała. Skazała: nu čaho ciapier kantaktavać, paŭtara miesiaca tamu my prapanoŭvali ŭsio heta spynić [hvałt], ciapier usio ŭ turmie abo vydvaranyja z krainy.
Da taho ž, vy nie pradstavilisia, chopić, mianie ŭžo pavazili pa Biełarusi paŭtara sutak i ja nie viedała, dzie znachodžusia. Voś kali pradstaviacca ludzi, skažuć, chto jany i kudy viazuć, kab ja nie bajałasia jechać. Ciapier, skazała, u Žodzinie ŭ izalatary joj spakajniej, čym jeździć ź nieznajomymi ludźmi, — raspavioŭ Pylčanka.
Akramia taho, pa słovach advakata, kali hetyja mužčyny zadali Kaleśnikavaj pytańnie, jak jana bačyć svaju budučyniu, jana skazała, što bačyć pa-roznamu: albo piać hadoŭ źniavoleńnia — da novych vybaraŭ, albo paŭtara hoda — bo tak u Biełarusi siadziać palitviaźni, albo ŭsio źmienicca ŭ lubuju siekundu.
«Sama hutarka z Łukašenkam doŭžyłasia dzieści 4 hadziny. Było skazana, što ŭdzielniki sustrečy nie chacieli b abmiarkoŭvać detali hutarki, i vydavać padrabiaznaści ahałoscy. Abmiarkoŭvałasia žyćcio Biełarusi, i jak zrabić jaje lepš, jak vypravić situacyju. Pry hetym na nastupny dzień adpuścili dvuch ludziej ź SIZA [Vaskrasienskaha i Rabceviča]», — adznačyŭ A. Pylčanka.
Na sustrečy byli, u tym liku eks-kiraŭnik Biełhazprambanka Viktar Babaryka, kaardynatar apazicyjnaha štaba Juryj Vaskrasienski, palittechnołah Vital Šklaraŭ i dyrektar Pandadoc Dźmitryj Rabcevič, advakaty Ivan Salej i Maksim Znak.
«Zaraz, jak ja ŭdakładniŭ u Babaryki, niama nikoha, chto b byŭ paŭnamocny pramaŭlać ad imia ŭdzielnikaŭ (chto siadzić u SIZA) sustrečy. Pa vynikach sustrečy atrymlivajecca, što baki havaryli i šmat razmaŭlali, ale kab pryjści da niejkaha kansensusu, nieabchodna ž zrabić niejkija kroki pieršapačatkovyja. Kroki pavinny być zroblenyja z boku ŭłady — vypuścić na svabodu, abo źmianić miery strymańnia», — ličyć advakat.
Pry hetym A. Pylčanka nie vykazaŭ upeŭnienaści, što jaho padabaronnyja pieršymi vyjduć na volu.
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary