U Vaŭkavysku ŭ niadzielu ludzi pajšli ŭ carkvu zamiest mitynhu, ale ich usio roŭna zatrymlivali
4 kastryčnika ŭ Vaŭkavysku ŭpieršyniu ludzi nie vyjšli na niadzielny pratest. U 14.30, kali zvyčajna prachodzić akcyja pratestu, u adnym z vaŭkavyskich chramaŭ praviali malitvu za Biełaruś. Na nabaženstva pryjšli blizu 150 čałaviek. Paśla jaho zakančeńnia ludziej zatrymlivali i vieźli ŭ RAUS «na hutarku», piša Hrodna.life.
Malicca za Biełaruś kožnuju niadzielu dobrasłaviŭ mitrapalit. Tolki malebien prachodziŭ a 17.00, raspavioŭ Hrodna.life Alaksandr Bohdan, vaŭkavyski śviatar. Da jaho źviarnuŭsia adzin z pratestoŭcaŭ i paprasiŭ pravieści malebien raniej, dniom, kali ŭsie vychodziać na pratest.
Ajciec Alaksandr pieranakiravaŭ jaho da ijereja Alaksandra Juzvy, pamočnika jepiskapa ŭ carkoŭnaj akruzie ŭ składzie jeparchii. Toj pahadziŭsia, i sam adsłužyŭ malebien. Pryjści mahli i pradstaŭniki inšych kanfiesij, i niavierujučyja, adzinaj umovaj było nie prynosić z saboj u carkvu simvoliku i płakaty.
Na słužbu ŭ chram Śviatych Roŭnaapostalnych Miafodzija i Kiryła ŭ pryvatnym siektary sabralisia kala 150 čałaviek. «Na malebien uviečary prychodzić zvyčajna 10−15 čałaviek. Vierniki ŭ asnoŭnym iduć ranicaj na liturhiju», — patłumačyŭ Alaksandr Bohdan.
Paśla słužby pačalisia zatrymańni. Ludziej vieźli ŭ RAUS, apytvali, praz paru hadzin adpuskali biez składańnia pratakołu. 3−4 čałavieki advieźli ŭ RAUS jašče da słužby. Usiaho takim čynam zatrymali kala 15 čałaviek.
U zatrymanych praviarali telefony i kazali, što pratestoŭcy pierajšli miažu paśla padpału doma i aŭto milicyjanta, paviedamlali čytačy «Našaj Nivy». Jak skazaŭ načalnik RAUS Vital Asocki, jaki zdymaŭ usie akcyi pratestu na kamieru, hramadzian zatrymali na hutarku.
Dzionny malebien za Biełaruś płanujecca i ŭ nastupnuju niadzielu. «Nie viedaju, jak ludzi ŭsprymuć incydent z zatrymańniami. Dumaju, słužbu abvieściać, ale mnohija pabajacca», — skazaŭ Alaksandr Bohdan.
Palitviazień pravioŭ paŭtara hoda ŭ SIZA — voś jak jon vyhladaŭ paśla hetaha10
Kamientary