Rachunki IT-kampanii PandaDoc razbłakujuć — ź ich užo źniatyja aryšty, jakija byli nakładzienyja ŭ suviazi sa spravaj čatyroch supracoŭnikaŭ firmy, zatrymanych u pačatku vieraśnia. Pra heta 42.TUT.BY paviedamili suzasnavalnik PandaDoc Mikita Mikada i advakat kampanii Anton Hašynski.
— Razbłakiroŭka rachunkaŭ kampanii — heta, viadoma, dobraja navina. Ciapier my možam vypłacić zarobki ŭsim tym supracoŭnikam, jakija ŭsio jašče zastajucca ŭ RB, — kaža Mikita Mikada. — Tym nie mienš, našym hałoŭnym pryjarytetam staić vyzvaleńnie aryštavanych supracoŭnikaŭ. Ludzi ŭžo jaki tydzień siadziać u SIZA. Pry hetym da majoj inicyjatyvy jany nijakaha dačynieńnia nie mieli i nie majuć. Inicyjatyvu ja spyniŭ. Ich dalejšaje ŭtrymańnie nie maje sensu.
Nahadajem, 2 vieraśnia čatyry supracoŭniki PandaDoc — hałoŭny buchhałtar Julija Šardyka, dyrektar Dźmitryj Rabcevič, mieniedžar pa pradukcie Viktar Kuŭšynaŭ i HR Uładzisłaŭ Michałap — byli aryštavanyja na dva miesiacy pa padazreńni ŭ kradziažy ŭ asabliva bujnym pamiery (107 tysiač biełaruskich rubloŭ) ź biudžetu.
Nieŭzabavie paśla hetaha advakaty padali skarhi na zatrymańnie supracoŭnikaŭ PandaDoc u sud Partyzanskaha rajona, adnak usie jany byli adchilenyja (rašeńnie vynosiła sudździa Taćciana Alejnikava). Taksama advakaty pasprabavali abskardzić miery strymańnia — pa častcy była atrymanaja admova, pa astatnich rašeńnie jašče budzie razhladacca. Pastanova ab raspačynańni spravy było abskardžana.
10 vieraśnia PandaDoc vypuściła zajavu, dzie siarod inšaha paviedamiła, što rachunki arhanizacyi zabłakavanyja, z-za čaho jany nie mohuć vypłacić zarobak bolš čym 250 supracoŭnikam.
11 vieraśnia ŭsim čaćviarym zatrymanym było pradjaŭlenaje abvinavačvańnie ŭ machlarstvie, ździejśnienym arhanizavanaj hrupaj albo ŭ asabliva bujnym pamiery (č. 4 artykuła 209, choć raniej havorka išła ab č. 4 art. 210). Supracoŭniki kampanii zajavili ab svajoj nievinavataści i kateharyčna adchilili pradjaŭlenaje abvinavačvańnie.
Jak adznačyŭ advakat Anton Hašynski, jaki pradstaŭlaje PandaDoc, absurdnaść abvinavačvańnia paćvierdžana jurydyčnaj ekśpiertyzaj aŭtarytetnaj kampanijaj «Alejnikaŭ i partniory» i aŭdytarskim zaklučeńniem kampanii «Bejkier Cili Bieł».
U PandaDoc upeŭnienyja, što heta represii, jakija pravodziacca, kab akazać cisk i spynić inicyjatyvu jaje zasnavalnikaŭ: Mikita Mikada raniej adkryta vykazvaŭ mierkavańnie ab padziejach, jakija adbyvajucca ŭ krainie, u pryvatnaści, prapanoŭvaŭ varyjanty dapamohi, u tym liku materyjalnaj, siłavikam, jakija zvolnilisia z pravaachoŭnych orhanaŭ. Adnak z-za aryštu supracoŭnikaŭ jon pryniaŭ rašeńnie spynić prajekt. U dalejšym inicyjatyvu padtrymki siłavikoŭ praciahnie fond salidarnaści BYSOL.
— Paśla publičnaj zajavy Mikity pra spynieńnie prahramy pa padtrymcy siłavikoŭ, jakija zvolnilisia, kampanija vystupiła z prośbaj dazvolić pravieści apieracyi — choć by častkova vypłacić zarobki i dapamohu supracoŭnikam, a taksama apłacić arendu i hetak dalej. Śledčy kamitet pajšoŭ nasustrač — daŭ dazvoł pravieści takija vypłaty, — raspavioŭ Anton Hašynski. — Paśla hetaha kampanija źviarnułasia z chadajnictvam pierad śledčym kamitetam ab tym, što jana hatovaja pakłaści na depazit SK hrašovyja srodki, ekvivalentnyja sumie naniesienaj škody, u jakaści zabieśpiačeńnia vypłaty mahčymaj škody pavodle prysudu suda.
Śledčy kamitet hetaje chadajnictva zadavoliŭ, i kampanija pieraličyła niejkuju hrašovuju sumu na depazit. Paśla hetaha PandaDoc zajaviła chadajnictva ab źniaćci aryštu z rachunku, i hetaje chadajnictva było zadavolenaje, aryšt užo źniaty.
Anton Hašynski taksama padkreślivaje, što ŭ pryjarytecie kampanii — mienavita zatrymanyja supracoŭniki.
— U nas pačynajecca dyjałoh, nas čujuć, heta dobra. Chutčej za ŭsio, biełaruski ofis vyratavać nie atrymajecca, ale ŭdasca vyratavać chłopcaŭ.
Kamientary