Fitnies-treniera zvolnili z kłuba paśla ŭdziełu ŭ mitynhu. Kiraŭnictva: My raźvitalisia jašče paŭhoda tamu

28-hadovy fitnies-trenier Andrej K. pracavaŭ u spartyŭnym kompleksie Yestoday kala hoda. Paśla taho, jak kiraŭnictva ŭbačyła jaho z žonkaj na mitynhu suprać Alaksandra Łukašenki, chłopcu abviaścili, što bolš jon u kłubie nie pracuje.

Pavialičyć

«U kłubie ja pracavaŭ jak IP, — raskazvaje «Našaj Nivie» Andrej. — I ŭ adzin dzień hałoŭny trenier Pavieł Sarokin padyšoŭ da mianie i skazaŭ pra skančeńnie našaj supracy. 

Kaniečnie, ja spytaŭ pryčynu. Jon skazaŭ, što mianie ž papiaredžvali, kab supracoŭniki kompleksa nie vychodzili na mitynhi. Ja ničoha na heta ŭžo nie adkazvaŭ, bo spračacca tam biessensoŭna».

Andrej raskazvaje, što takoha vyniku možna było čakać, bo kiraŭnictva kłuba blizkaje da ŭładaŭ.

«Taja ziamla, na jakoj pabudavany kompleks, šmat času nie pradavałasia. A tut maładaja para stanovicca ŭładalnikam vielmi darahoha fitnes-kłuba z basiejnam i tenisam. Pry hetym u nas zajmajecca nie tak šmat ludziej, a absłuhoŭvańnie kompleksa kaštuje doraha. Vyniki možna zrabić samastojna», — zaklučaje Andrej. 

«Naša Niva» paprasiła kamientar u zhadanaha vyšej Paŭła Sarokina.

«Andrej K. sapraŭdy supracoŭničaŭ z kłubam jak indyvidualny pradprymalnik. Spynieńnie supracy ź im u listapadzie 2019 hoda nie źviazana ź jaho palityčnymi pohladami. Kiraŭnictva kłuba nie ŭmiešvajecca ŭ asabistaje žyćcio svaich supracoŭnikaŭ», — tłumačyć jon.

Andrej ža z hetym nie pahadžajecca:

«Apošni raz ja vychodziŭ na pracu ŭ kłub mienavita u kancy lipienia — pačatku žniŭnia 2020 hoda. Čamu havorka idzie pra 2019, nie razumieju».

Andrej tłumačyć, što jany z žonkaj vyrašyli vychodzić na mitynhi tamu, bo paru nie zadavalniaje, što adbyvajecca ŭ krainie ŭ apošni čas. I chacia zvalnieńnie i stała svojeasablivaj prablemaj dla siamji, jany miarkujuć, što ŭsio adbyvajecca da lepšaha:

«Ciapier ja mahu pasprabavać realizavać svoj patencyjał u IT. Chacia ŭ sporcie ja z 9 hadoŭ, byŭ pryzioram čempijonata krainy pa dziudo, čempijonam śvietu i Jeŭropy pa paŭerliftynhu. Maju niekalki nacyjanalnych rekordaŭ. 

Žonka ŭ mianie doktar, i joj na pracy taksama pahražali zvalnieńniem praz udzieł u mitynhach. Ale pakul nie čapajuć». 

Što takoje Yestoday?

Budoŭlu premijalnaha spartyŭnaha kompleksa Yestoday inicyjavaŭ haspadar «Amkadora» i eks-kiraŭnik fiederacyi tenisa Alaksandr Šakucin. Da jaho dałučyŭsia biznesmien Dźmitryj Starkoŭ, jaki razam z rasijskim partnioram zasnavaŭ kampaniju «SK-7». Abjekt kaštavaŭ prykładna $4 miljony.

• 0
• 0
• 0
• 0
• 0
• 0