Što viadoma pra źmienu Asvoda, jakaja ratavała mitynhoŭcaŭ i apynułasia na Akreścina

U niadzielu ŭ Minsku prachodziŭ šmattysiačny Marš adzinstva. Kali pratestoŭcy stali razychodzicca, pačalisia žorstkija zatrymańni. Niekatoryja, kab uciačy ad siłavikoŭ, skoknuli ŭ Śvisłač, ludziej ratavaŭ Asvod. Supracoŭniki dali pratestoŭcam koŭdry, pieravieźli na inšy bierah. Potym stała viadoma, što ŭ Centralnaje RUUS Minska pryvieźli tuju samuju źmienu Asvoda. Blizki znajomy siamji načalnika vyratavalnaj stancyi Asvod Dzianisa Čašuna raspavioŭ TUT.BY, što zatrymanaja źmiena ciapier znachodzicca ŭ IČU na Akreścina. Usiaho svajaki i siabry viedajuć pra šaściarych, u staličnaj milicyi TUT.BY paviedamili, što zatrymali 8 čałaviek.

Pavialičyć

— Dzianis paśpieŭ patelefanavać svajoj žoncy i raskazać, što 6 čałaviek — piać jaho padnačalenych i jaho samoha — zabirajuć u RUUS. Vieźli ich u aŭtazaku. Jon jak načalnik pavinien byŭ vyrašyć, kaho pakinuć na načnoje dziažurstva na stancyi. Pakinuŭ dvuch čałaviek (jak miarkujecca, ich zatrymali paźniej. — Zaŭv. TUT.BY). Usich astatnich zabrali. Raspavioŭ žoncy, dzie pakinuŭ klučy i dakumienty. Svajaki pajechali adrazu da Centralnaha RUUS, tam nie kazali, jość jany ŭ ich ci nie. Potym niechta skazaŭ, što ich byccam by pieravieźli ŭ IČU na Akreścina. My tudy telefanavali. I ŭ Žodzina telefanavali. Našych asvodaŭcaŭ nie było ni ŭ adnych śpisach. Nie było infarmacyi pra ich i ŭ vałancioraŭ, jakija dziažurać na Akreścina. Z ranicy my pačali znoŭ ich šukać. Niejak žonka Dzianisa prarvałasia ŭ hetuju budačku, dzie biaruć pieradačy dla zatrymanych, tam pahladzieli śpis — akazałasia, što ŭsio ž usie na Akreścina. My zmahli pieradać im ciopłyja rečy. Niešta ŭziali, niešta nie, ale ŭžo dobra, što my prosta viedajem, dzie znachodziacca ludzi, — kaža siabar Dzianisa.

Pakul niama infarmacyi, u čym dakładna abvinavačvajucca asvodaŭcy, jak i infarmacyi pra toje, kali projduć sudovyja pasiadžeńni.

— U dziejańniach nazvanych hramadzian mielisia prykmiety składu administracyjnaha pravaparušeńnia. Ułasna, za što jany i byli zatrymanyja, — paviedamiła TUT.BY bližej da viečara 7 vieraśnia pres-sakratar staličnaj milicyi Natalla Hanusievič.

Staršynia Minskaj haradskoj arhanizacyi Asvod Dźmitryj Stasielka paviedamiŭ TUT.BY, što nijakaj dadatkovaj infarmacyi pra los padnačalenych u jaho niama.

• 0
• 0
• 0
• 0
• 0
• 0