Čamu kampanija dumaje pra skaračeńnie inviestycyj u krainu i jak dapamahaje zatrymanym supracoŭnikam, u intervju Forbes raspavioŭ hienieralny dyrektar uładalnika servisu, kampanii Rakuten Viber Džamieł Ahaua.

Fota Flickr

Fota Flickr

— Jak składvajecca situacyja ŭ ofisie Viber u Minsku? Jak jon ciapier pracuje?

— Usio vielmi składana, naš ofis byŭ zakranuty hetaj situacyjaj, bo jon znachodzicca vielmi blizka ad miesca pratestaŭ. Jon prosta ŭ centry horada, na hałoŭnaj vulicy. Na minułym tydni my daviedalisia, što niekatoryja ofisy kampanij, takich jak Uber i jašče adnoj, nie pamiataju nazvu, byli zachoplenyja ŭzbrojenymi ludźmi.

— «Jandeks».

— Tak, «Jandeks». «Jandeks» i Uber. Nieadkładna my vyrašyli zakryć svoj ofis. Jon byŭ adkryty, ale ŭ im pracavała kala 15-20% ad zvyčajnaj kolkaści ludziej praz karanavirus. I my vyrašyli nieadkładna začynić naš ofis u Minsku i paprasić ludziej pracavać addalena.

— Čamu?

— Tamu što naš ofis vielmi blizka da ofisaŭ Uber i «Jandeks». My baimsia, što niekatoryja supracoŭniki nie zmohuć trapić u ofis.

— Jakim čynam vaša situacyja źviazanaja z Uber i «Jandeksam»?

— Jany nie źviazanyja. Prosta my nie viedali, čamu hetyja ludzi zachapili ofisy hetych kampanij. I my vyrašyli evakujavać naš ofis dziela biaśpieki. Tamu što my nie viedali, čamu hetyja ludzi zachapili ofisy, my nie viedali, ci było heta źviazana z palitykaj. U nas nie było nijakaj infarmacyi.

My pryniali rašeńnie na asnovie infarmacyi, jakaja ŭ nas była. A ŭ toj čas było vielmi ciažka daviedacca dakładnuju infarmacyju. Vidavočna, ciapier u nas jość tłumačeńnie, čamu tyja ofisy byli zachoplenyja.

Takim čynam, toje rašeńnie, jakoje my pryniali, było dziela biaśpieki našych supracoŭnikaŭ.

Dvoje našych supracoŭnikaŭ byli aryštavanyja. Aryštavany taksama byŭ baćka adnaho z supracoŭnikaŭ. Usie troje apynulisia pad aryštam biez zrazumiełych pryčyn. Ciapier z hetymi ludźmi pracujuć našy advakaty, pakul što niemahčyma zrazumieć, čamu jany byli aryštavanyja. Jany navat nie pratestavali. Adzin prosta znachodziŭsia pobač ź miescam, dzie aryštoŭvali inšych, i jaho zabrali z astatnimi. Inšy byŭ naziralnikam na vybarčym učastku. Jon zadaŭ niekalki pytańniaŭ kiraŭnictvu vybarčaha ŭčastka, a praz 20 chvilin jaho aryštavali. I ŭ hetym strachu davoli składana pryniać pravilnaje rašeńnie, kab zrazumieć toje, što adbyvajecca.

Na minułym tydni nie było internetu, i było jašče składaniej atrymać praŭdzivuju infarmacyju ad ludziej, pravieryć, ci ŭ biaśpiecy jany. Heta pryčyna, pa jakoj my vyrašyli zakryć naš ofis na minułym tydni na čas i pierakanacca, što našy ludzi pracujuć vydalena i im nie treba dabiracca z chaty ŭ ofis. Jany mohuć pracavać z chaty. I heta vielmi ciažkaja situacyja.

Viadoma, my ŭžo pracavali z domu praz karanavirus, ale heta krychu inšaje. Emacyjny stan supracoŭnikaŭ zakranuty tym, što aryštavali dvuch ich kaleh. Heta dva členy našaj siamji. Adnaho adpuścili na vychodnych, my vielmi ŭdziačnyja za heta, jon adčuvaje siabie dobra, choć i nie razumieje, čamu byŭ aryštavany. Druhi ŭ lakarni z surjoznymi traŭmami. Pa zakonie jon usio jašče pad aryštam.

— Kolki supracoŭnikaŭ pracavała ŭ ofisie pierad zakryćciom?

— 120 supracoŭnikaŭ u Minsku, ale praz karanavirus ofis byŭ adkryty tolki dla tych, chto sapraŭdy chacieŭ pracavać u ofisie, tamu tam było tolki 20 čałaviek.

— Jak heta zakranuła vašu pracu ŭ krainie? Vy bačycie jakija-niebudź źmieny ŭ ličbach vašaj doli rynku?

— 76% — try čverci nasielnictva krainy — źjaŭlajucca aktyŭnymi karystalnikami Viber. Takoha kštałtu padziei nie zakranajuć nas, pakolki bolšaść karystalnikaŭ na rynku — karystalniki Viber. MAU (aktyŭnych karystalnikaŭ u miesiac. — Forbes) składaje kala 95%, abo prykładna 6,5 młn čałaviek.

My zaśpieli pikavaje vykarystańnie Viber za dzień, pakul nas nie zabłakavali, kali internet adklučyli. Kala troch-čatyroch dzion Viber to ŭklučaŭsia, to adklučaŭsia praz błakavańnie ŭładami. My taksama pracavali nad VPN, kab dazvolić ludziam karystacca Viber, niahledziačy na ​​błakavańnie.

— Što vy čakajecie ad situacyi ŭ Biełarusi? Jak vy dumajecie, Łukašenka budzie adchileny ad svajoj pasady? Ci buduć praviedzieny novyja vybary?

My nie zajmajemsia palitykaj u Viber. My čakajem, što hvałt spynicca. Ludzi mirna pratestujuć. I prava mirna pratestavać — žyćciova važnaje. Kali ty nie možaš skazać, što nie zhodny, to ŭ ciabie niama svabody. Ludzi pavinny mieć mahčymaść vykazać svaju niazhodu mirna. My suprać lubych formaŭ hvałtu. Ludzi ŭ Biełarusi musiać vyrašyć svaju budučyniu.

Ja nie pavinien vykazvać svajo mierkavańnie ab prezidencie, uładach, palityčnaj situacyi, tamu što ja nie źjaŭlajusia ekśpiertam. Ale Viber zakranuła žorstkaść, jakuju my bačyli. My achviary hetaha hvałtu. Znoŭ ža, adzin z našych supracoŭnikaŭ znachodzicca ŭ balnicy. My dumajem pra jaho, tamu što jon nie vyjaŭlaŭ žorstkaści, jon nie byŭ niebiaśpiečny dla kaho-niebudź, kali jaho aryštavali. Adzinaje, čaho my chočam, — heta kaniec žorstkaści. I my chočam narmalnaha dyjałohu pamiž ludźmi i ŭładami, heta adzinaje, čaho my chočam dla biełaruskaha naroda.

— Nie mahli b vy nazvać imiony supracoŭnikaŭ, jakija paciarpieli? Chto ŭ balnicy, chto zatrymany, jak ich kličuć, jakija ŭ ich pasady?

— Heta inžyniery ŭ našaj kampanii, ale ja b nie chacieŭ nazyvać ich imiony publična. Ja nie dumaju, što heta dobraja ideja. Ja prosta chacieŭ skazać, što my nie hladzim na hetyja padziei z boku. Jany nas zakranuli, i my ŭsprymajem hetych ludziej ź Biełarusi jak častku našaj siamji. Našu siamju heta zakranuła. My ŭsie ranienyja.

— Biełaruś — adzin z najbujniejšych technałahičny centraŭ va Uschodniaj Jeŭropie, dzie raźmieščany ofisy mižnarodnych kampanij, naprykład EPAM, Viber i inš. Ci viedajecie vy što-niebudź pra atmaśfieru ŭ IT-siektary, što buduć rabić inšyja kampanii ŭ dadzienaj situacyi? Moža być, jany dumajuć syści z hetaha rynku?

— Ja čuŭ pra aficyjnyja zajavy, padpisanyja hienieralnymi dyrektarami IT-kampanij, jakija paviedamlali pra toje, što pakidajuć krainu. I viadoma, da nas źviarnulisia z prośbaj padpisać hety dakumient. Prablema była ŭ tym, jak jon byŭ napisany. Ja nie chaču zrabić na svaich supracoŭnikaŭ uražańnie, što my kidajem ich. Dvoje našych supracoŭnikaŭ u turmie, my ich nie kiniem. (Pradstaŭnik Viber paśla intervju udakładniŭ, što adzin supracoŭnik byŭ vyzvaleny. — Forbes.) My budziem ich padtrymlivać da apošnich chvilin, da apošnich dzion. U nas vydatnyja supracoŭniki ŭ Biełarusi, my ich nie pakiniem, my chočam im dapamahčy.

Moža być, kali situacyja nie palepšycca, my nie budziem bolš inviestavać u Biełaruś. Takoje moža być, tamu što my nie možam inviestavać u krainu, dzie ludzi žyvuć u strachu. Heta niemahčyma.

Ale padpisvać papieru, u jakoj napisana, što kali ničoha nie źmienicca, to my prosta zakryjem naš ofis i źjedziem… A što budzie z supracoŭnikami? Jak heta im dapamoža, kali jany straciać pracu?

— Što vy možacie skazać ab inviestycyjach kampanii ŭ hety rehijon? Jakuju sumu vy inviestavali ŭ Minsk u minułym hodzie?

— U nas jość ofis u Minsku, jaki moža pryniać udvaja bolš inžynieraŭ za tuju ich kolkaść, jakaja ŭ nas jość siońnia. My chočam padvoić naš piersanał u Biełarusi. U nas jość ludzi ŭ Minsku, a taksama jość maleńki ofis u Breście. I heta vydatnaja kamanda. I my hatovyja inviestavać u krainu ŭdvaja bolš, čym u naš ofis u Minsku.

— Vy skazali, što vy źmienicie stratehiju inviestycyj i budziecie inviestavać u krainu mienš, kali hety režym zachavajecca?

— Nie, ja skazaŭ, kali ludzi… Jašče raz, nie prasicie mianie havaryć pra palityku, tamu što my nie zajmajemsia palitykaj, prabačcie. My nie hałasujem u Biełarusi, my nie zajmajemsia palitykaj. Ale my suprać žorstkaści i suprać strachu. My nie chočam, kab našy ludzi žyli ŭ strachu. Ja ŭžo kazaŭ heta, ale paŭtaryŭ, tamu što nie chaču, kab vy ŭciahvali mianie ŭ palityku. My niekampietentnyja ŭ hetym pytańni. My nie možam inviestavać u krainu, dzie ludzi žyvuć u strachu. Heta niemahčyma.

Čytać całkam na sajcie Forbes.

Клас
0
Панылы сорам
0
Ха-ха
0
Ого
0
Сумна
0
Абуральна
0