«Naša Niva» spytała ŭ biełaruskich farmaceŭtaŭ, što niezvyčajnaha biełarusy kuplali ŭ aptekach dla baraćby z karanavirusam, akramia antysieptykaŭ i masak. 

Fota Nadziei Bužan. 

«Hiel «Najz» abiraŭsia pakupnikami pa tym ža pryncypie, što i «Zoračka»: addaje mientołam»

Farmaceŭt Alina Jesiapionak, jakaja pracuje ŭ adnoj ź minskich aptek «Aptekar», raskazvaje, što, akramia zvyčajnych masak i antysieptykaŭ, u topie prodažaŭ srodkaŭ ad «karony» — vitamin S i balzam «Zoračka»:

«Nie viedaju, adkul biarecca infarmacyja, što hetyja srodki dapamahajuć, ale voś mienavita «Zoračkaj» mazali ŭsio, što tolki možna i nielha, — raskazvaje farmaceŭt. — U niejki momant na jaje tak palavali, što jana pačała pastupać ź pierabojami. A jašče zamaŭlali hiel «Najz» — miascovaje abiazbolvalnaje i supraćzapalenčaje. Dumaju, jon abiraŭsia pakupnikami pa tym ža pryncypie, što i «Zoračka»: addaje mientołam». 

Alina ŭdakładniaje, što daviedvałasia, što abiazbolvalnyja srodki kštałtu «Najza» kuplajuć mienavita dla baraćby z karanavirusam, kali jak farmaceŭt raiła pakupnikam tabletki, jakimi možna ŭzmacnić abiazbolvalny efiekt: 

«Hieli i mazi dajuć karotkaterminovy efiekt, tamu ja i raiła niešta macniejšaje, što lepš dapamahaje pry zapaleńni. Voś tady pakupniki i kazali, što im nie treba ničoha abiazbolvać, a lačycca jany źbirajucca «ad kavida».

Dalej byŭ moj šalony pohlad i łahičnaje pytańnie: «Chto vam skazaŭ, što heta dapamoža?» Adkazy zbolšaha byli nie vielmi vyraznyja, vidać, ludzi saromielisia i adkazvali, što im heta paraiŭ susied/brat/znajomy. Šmat chto moh skazać, što jany tak pažartavali, ale za čas epidemii ŭsie farmaceŭty i pravizary ŭžo navučylisia adroźnivać «prykalistaŭ» ad ludziej, jakija pytajucca vyratavacca ŭsim, čym chočaš».

Farmaceŭt raskazvaje, što popyt na maski i antysieptyki ŭ aptekach zastajecca i ciapier, kali pa aficyjnych ličbach, pandemija značna pajšła na spad. 

«Ja pracuju pry miedcentry, tamu ŭ nas u lubym vypadku tut vialikaja kancentracyja chvorych ludziej. Ale ciapier maskami karystajucca nieabaviazkova praz karanavirus. Naŭrad ci chtości choča zachvareć navat na zvyčajnyja VRVI ci hryp. 

Kaniečnie, popyt užo nie taki, jaki byŭ u sakaviku-krasaviku. Ale što dakładna pryščapiłasia (toje, što pavinna być zvyčajnaściu ŭžo daŭno) — ludzi ciapier realna kuplajuć antysieptyki i vykarystoŭvajuć ich. Dy i ideja raźmiaščać ich u hramadskich miescach, jak pa mnie, musić zastacca». 

«Kuplali maski, lapili na ich štodzionnyja prakładki, jakija pramočvali nastojkaj propalisu»

Farmaceŭt Julija K., jakaja pracuje ŭ adnoj ź minskich aptek, raskazvaje, što siarod niezvyčajnych zamovaŭ abaviazkova byli nastojka propalisu i alej čajnaha dreva:

«Pakupniki kuplali maski i na ŭnutranaj pavierchni lapili štodzionnyja prakładki. Hetyja prakładki pramočvali nastojkaj propalisu i kroplaj aleju čajnaha dreva, — dzielicca farmaceŭt. — A jašče ŭvieś čas ludzi pytalisia pra paracetamoł u čystym vyhladzie. I chacia my kazali, što analhin i aśpiryn — heta toje ž samaje, prosta ŭ kambinacyjach ź inšymi srodkami, i jon zaŭsiody byŭ u našaj aptecy, ad hetych lekaŭ ludzi, byvała, admaŭlalisia».

Julija raskazvaje, što časta ludzi kuplali nastojku kalenduły zamiest antysieptyku i apracoŭvali joj ruki.

«Ja nie ździŭlusia, što šmat chto prosta spaliŭ sabie ruki hetaj nastojkaj. A jašče byŭ pacyjent, jaki spaliŭ sabie ŭsiu ślizistuju nasahłotki, tamu što jon, kab sekanomić, maski apracoŭvaŭ antysieptykam, a potym dychaŭ hetym».

Časta, raskazvaje farmaceŭt, ludzi kuplali roznyja nastojki razam z hlicerynam, kab na ich asnovie samastojna zrabić antysieptyk. Kali ŭ aptecy farmaceŭty pytalisia, adkul takija dziŭnyja mietady baraćby z karanavirusam, ludzi čaściej za ŭsio adkazvali, što bačyli recepty ŭ internecie.

«U kancy sakavika i ŭvieś krasavik u mianie było adčuvańnie, što ludzi sprabujuć skupić usie leki. Pakupniki byli vielmi azłoblenyja ŭ hety pieryjad, tamu što zavody nie paśpiavali vyrablać stolki paracetamołu i askarbinak. Hraduśniki skupali ŭsich vidaŭ, navat pa 200 rubloŭ za štuku.

Kali paraŭnoŭvać ź viasnoj, ciapier u nas maski amal nie kuplajuć. Byvaje, nabyvajuć maski ŭ niejkija maršrutki, kudy bieź ich nie puskajuć. U pačatku pandemii my mahli za piać chvilin pradać masak na 70 rubloŭ — za dzień heta było bolš 100 štuk. Ciapier u dzień my pradajom štuk 10—15». 

«Mužčyna prapanoŭvaŭ nam zabrać pyłok ź jaho pčalinych vullaŭ, kab zrabić leki ad karanavirusa»

Babrujski farmaceŭt Kaciaryna Miličonak z apteki «Płanieta zdaroŭja» raskazvaje pra adziny vypadak niezvyčajnaj prośby ad pakupnika, źviazany z pandemijaj:

«U cełym u nas usio było banalna: antysieptyki, maski, supraćvirusnyja srodki, vitaminy. Ale niejak prychodziŭ mužčyna, jaki prapanoŭvaŭ nam zabrać u jaho pyłok ź jaho pčalinych vullaŭ, kab śpiecyjalisty zrabili ź jaho leki ad karanavirusa.

Pamiataju, ja adkazała, što ŭ Biełarusi zavody, chutčej za ŭsio, nie zajmajucca takim vidam vytvorčaści i naŭrad ci ŭ nasielnictva buduć prosta tak prymać substancyi biez dakumientaŭ i pravierak. Potym u aptecy paraili jamu spytać u zavodaŭ naŭprost, moža, štości ŭ jaho i atrymajecca». 

«Srodki kštałtu «Zorački», «Najza» i roznych nastojek nie dapamohuć u baraćbie z karanavirusam, tamu što jany na virus nijak nie dziejničajuć, to-bok nie razburajuć jaho, — tłumačyć Vieranika Ržeuskaja, doktar łabaratornaj dyjahnostyki minskaj 4-j haradskoj kliničnaj balnicy. — Kali čytać pra ŭłaścivaści navat taho ž propalisu — to jon vałodaje supraćmikrobnym dziejańniem, a virus — heta nie mikrob.

Takija srodki chutčej majuć nakiravanaje dziejańnie na ŭmacavańnie imunitetu. A kali ŭ čałavieka ŭžo COVID-19 — asacyjavanaja pnieŭmanija, to padobnyja leki zusim biessensoŭnyja. Na maju dumku, jany małaefiektyŭnyja i pry VRVI ci VRI.

Pry karanavirusie, kali ŭ čałavieka stadyja lohkaj simptamatyki, supraćvirusnyja srodki i praŭda mohuć palehčyć jaho stan. A kali heta ŭžo stadyja pnieŭmanii, to tut treba stacyjanarnaje lačeńnie i pryjom antybijotykaŭ».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?