Ułada2323

Chto moža stać nastupnym premjer-ministram Biełarusi?

Kiraŭnik Biełarusi Alaksandr Łukašenka na naradzie ŭ vuzkim kole 25 maja skazaŭ, što maje namier pierad prezidenckimi vybarami (9 žniŭnia) źmianić urad.

Pry hetym jon skazaŭ, što zaŭždy tak robić, kab ludzi bačyli, z kim dalej budzie pracavać kandydat, kali pieramoža. «My zaŭsiody pierad rehistracyjaj kandydatam dziejučaha prezidenta abviaščali novy skład urada, da vybaraŭ. Heta było pryncypovaje pytańnie. Kab ludzi bačyli, z kim my budziem pracavać. A nie toje, što vybary prajšli, za ciabie prahałasavali, a ty tam svajakoŭ, rodnych, lubimych panapichaŭ u hety ŭrad, a heta hałoŭny vykanaŭčy orhan…», — skazaŭ Łukašenka.

Nasamreč, heta niapraŭda. Zvyčajna jakraz naadvarot: źmiena ŭrada adbyvajecca ŭžo paśla dnia hałasavańnia. Naprykład, u 2010 hodzie Michaił Miaśnikovič staŭ premjeram praz 10 dzion paśla hałasavańnia i razhonu Płoščy. U 2015-m nasamreč urad nie nadta źmianiŭsia. Faktyčna tady źjaviŭsia tolki novy ministr handlu Uładzimir Kałtovič i kiraŭnik Śledčaha kamiteta Ivan Naskievič (abodva pracujuć pa siońnia).

«NN» prapanuje ahlad mahčymych kandydataŭ na hetaje miesca. Za časy Łukašenki premjerami pabyvała ŭžo vaśmiora čałaviek. I ŭsie jany byli, jak pryniata kazać, «mocnymi haspadarnikami». Tamu varyjanty, što ŭrad uznačalić Juryj Karajeŭ, Uładzimir Makiej ci Valer Vakulčyk, byli b vialikaj navacyjaj.

Naturalna, što nijakaj harantyi taho, što mienavita niechta z našaha śpisu stanie asobaj №2 u krainie, niama. Tym nie mienš kazać ab peŭnych kandydatach možna.

Siarhiej Rumas

Fota Nadziei Bužan.

Skazać možna ŭsio, što zaŭhodna, a potym možna pieradumać. I Rumasu nie patrebna budzie šukać novuju pracu ŭ adnym z pryvatnych ci dziaržaŭnych bankaŭ. Emocyi ž nichto nie admianiaŭ. Urad Rumasa nie staŭ uradam refarmataraŭ — heta praŭda. Ale ŭsie razumiejuć, što ekanamičnyja, užo maŭčym pra palityčnyja, reformy zaležać ad voli adnaho čałavieka. I premjer tut nie hraje vyznačalnaj roli. Mabyć, Rumas nie tak časta, jak chaciełasia b, prajaŭlaŭ inicyjatyvu, ale adnačasova ŭ asobie Rumasa Biełaruś zajmieła vielmi prezientabielnaha kiraŭnika ŭrada, za jakoha nie było soramna.

Čytaj taksama: Siem faktaŭ pra Siarhieja Rumasa

***

Dźmitryj Kruty

Fota Nadziei Bužan.

Naŭrad ci zaraz u abojmie Łukašenki jość bolš prydatny dla pasady premjer-ministra kandydat. Krutomu niama jašče i 40 hadoŭ, jon małady i nie durny. Pomnicie, u atačeńni Łukašenki ŭžo byŭ małady ekanamist Kiryła Rudy. Dyk voś Rudy prapanoŭvaŭ kardynalnyja reformy i «finansavuju dyjetu», a Kruty naŭrad ci budzie heta rabić. Litaralna za dva niapoŭnyja hady Kruty zrabiŭ ašałamlalnuju karjeru z namieśnika ministra ekanomiki da pieršaha vice-premjera. I mienavita jon byŭ adkazny ź biełaruskaha boku za stvareńnie «darožnych kart» sajuznaj dziaržavy. Pra ich na čas pandemii, viadoma, zabyli, ale ci nadoŭha.

Hladzi jašče: Piać faktaŭ pra Dźmitryja Krutoha

***

Alaksandr Turčyn

Fota Nadziei Bužan.

Jašče adzin kandydat, na pryznačeńnie jakoha možna pasprabavać pastavić niekalki rubloŭ u bukmiekierskich kantorach. Turčyn taksama małady, jamu 44 hady, dla hierantakratyčnaj łukašenkaŭskaj sistemy apošniaha dziesiacihodździa — heta amal padletak. Turčyna lubiać biznesmieny, jašče za pracu ŭ Radzie pa raźvićci pradprymalnictva. Jon zajmieŭ reputacyju aściarožnaha prychilnika rynačnaj ekanomiki. Ciapier Turčyn pracuje staršynioj Minskaha abłvykankama, na hetaj pasadzie jon zamianiaŭ Anatola Isačenku, jaki doŭha chvareŭ. Pryznačeńnie Turčyna nie ździviła b nikoha.

Hladzi jašče: Turčyn: U nas niama žadańnia raskułačvać biźnies

***

Anatol Sivak

Doŭhi čas Sivak sabie spakojna žyŭ na nie samaj publičnaj i značnaj pasadzie ministra transpartu, ale potym jaho pierakinuli staršynioj Minharvykankama. Sivak robić ź viaskovaj starannaściu i pasłuchmianaściu. Niama taho, kab im byli niezadavolenyja ludzi, jak Paŭłavym i Šorcam, ci Łukašenka, jak Ładućkam. Asablivaj palityčnaj vahi kiraŭnik Minska nie maje, ale, moža, heta navat da lepšaha dla premjer-ministra. Pra toje, što Łukašenka daviaraje Sivaku, možna mierkavać pa tym, jak časta Sivak źjaŭlajecca na naradach kiraŭnika krainy, ci supravadžaje jaho ŭ pajezdkach.

Čytaj taksama: Piać faktaŭ pra Anatola Sivaka

***

Natalla Kačanava

Fota Nadziei Bužan.

Samaja ŭpłyvovaja žančyna, razam z Natallaj Ejsmant, u atačeńni Łukašenki. Navat paśla taho, jak Kačanava syšła z pasady kiraŭnika Administracyi prezidenta jana zastajecca pobač z kiraŭnikom dziaržavy. Da Kačanavaj rola śpikiera Savieta respubliki była siniekuraj dla čynoŭnikaŭ piensijnaha ŭzrostu. Ciapierašniaja ž kiraŭnica vierchniaj pałaty parłamienta nadzvyčaj aktyŭnaja ŭ svaich kamunikacyjach i vykonvaje šmat daručeńniaŭ Łukašenki. Jamu byłaja staršynia Navapołackaha harvykankama pryhlanułasia za toje, što zdolnaja bieź piarečańniaŭ bracca za lubuju spravu, jakuju zahadaje prezident. Takoje vysoka cenicca.

Hladzi jašče: Jakuju rolu ŭ krainie vykonvaje Kačanava, u čym jaje promachi i za što jaje palubiŭ Łukašenka?

***

Vasil Maciušeŭski

Fota svaboda.org.

Pra hetaha byłoha top-čynoŭnika mnohija, mabyć, užo paśpieli zabycca. Apošnim časam Maciušeŭski spakojna sabie ŭznačalvaje bank «Bieł VEB», miesca prystanišča mnohich čynoŭnikaŭ vyšejšaha źviana. U svoj čas Maciušeŭski byŭ pieršym vice-premjeram, ale, jak kažuć złyja jazyki, pracavać ź im dalej nie zachacieŭ jakraz Rumas, tamu čynoŭnika i sasłali ŭ bank. Praŭda, z abojmy nichto nie vykidaŭ. Maciušeŭski modna apranajecca i dobra viedaje anhlijskuju movu. Napeŭna, kali ŭsio ž adbudziecca źmiena Rumasa na Maciušeŭskaha, to mała chto adčuje roźnicu.

Hladzi jašče: Top-mieniedžar ź jeŭrapiejskaj adukacyjaj: historyja žyćcia pieršaha vice-premjera Vasila Maciušeŭskaha

***

Mikałaj Snapkoŭ

Fota Siarhieja Zinina.

Nie tak daŭno źjechaŭ pasłom u daloki Kitaj (zamianiŭ tam užo zhadanaha vyšej Kiryłu Rudaha). Ale byli ŭžo takija vypadki, kali ŭ kresła premjer-ministra sadžali z dypłamatyčnaj pracy. Havorka pra Kabiakova, jaki pierad tym, jak uznačalić urad, byŭ pasłom u Maskvie. U łukašenkaŭskaj abojmie Snapkoŭ vielmi daŭno. Heta razumny čynoŭnik, jaki maje reputacyju aściarožnaha libierała. Na piaredni kraj Snapkoŭ nie imkniecca vysoŭvacca. Palityčnych zajaŭ nie robić nikoli. Taki sabie idealny vincik hetaj sistemy.

Čytaj jašče: Snapkoŭ raskazaŭ, ź jakim nastrojem jedzie pracavać pasłom u Kitaj

***

Andrej Rybakoŭ

Fota z sajta «Biełnaftachima».

Enierhanośbity i ich pastaŭki ŭ Biełaruś — taja śfiera, dzie karjeru sabie rabili šmatlikija čynoŭniki. Naprykład, mienavita z hetaj dzialanki ŭ kresła premjer-ministra sieli Hienadź Navicki i Siarhiej Sidorski. Doŭhi čas na samym viersie pavažliva hučała proźvišča Uładzimira Siamaški (usio ž praz uzrost pasoł Biełarusi ŭ Rasii — naŭrad ci pretendent na pasadu kiraŭnika ŭrada). Ciapierašni vice-premjer u pytańniach enierhanośbitaŭ Juryj Nazaraŭ pryjšoŭ na pasadu zusim niadaŭna dy i ź inšaj śfiery (lasnaja haspadarka). Tamu kali kahości i pakličuć na pavyšeńnie, to chutčej kiraŭnika «Biełnaftachima» Andreja Rybakova.

Taksama čytaj: «Hadavali babula i dzied»: što viadoma pra vice-premjera Juryja Nazarava i jahonuju siamju

***

Ihar Pietryšenka

Ihar Pietryšenka (druhi sprava). Fota Nadziei Bužan.

Mabyć, tut užo vierahodnaść zusim maleńkaja. Ale čamuści rasijskija ananimnyja telehram-kanały svatajuć u premjerskaje kresła i hetaha vice-premjera ŭ sacyjalnych pytańniach. Pietryšenka — vielmi aściarožny čynoŭnik, jaki nie lubić śviacicca i rabić hučnych zajaŭ. U svoj čas jon prajšoŭ praź niaprostuju pasadu pasła Biełarusi ŭ Rasii. Darečy, mienavita jon pradstaŭlaŭ na aficyjnym uzroŭni našu krainu padčas raźvitańnia ŭ Vilni z Kastusiom Kalinoŭskim i inšymi paŭstancami 1863 hoda.

Kamientary23

Čamu rasijskija drony stali čaściej zalatać u Biełaruś?

Čamu rasijskija drony stali čaściej zalatać u Biełaruś?

Usie naviny →
Usie naviny

Minskaje «Dynama» na apošnich chvilinach prabiłasia ŭ druhi raŭnd kvalifikacyi Lihi čempijonaŭ VIDEA1

Rasijski šachied vybuchnuŭ za 55 km ad Babrujska22

Pasłableńni dla biełaruskich turystaŭ uvodzić Tajłand

Ź biełarusam tydzień niama suviazi paśla taho, jak jon pierasiok miažu z Polščaj1

88-hadovy apalny eks-kiraŭnik «Pinskdreva» Arynič žyvie ŭ Biełastoku ŭ zdymnaj kvatery za košt svajakoŭ2

Pamior Ihar Hips

«Kali ŭpała pieršaja ldzinka, ja zrazumieła, što ŭsio». Hrad pamieram z kurynaje jajka paškodziŭ mašynu biełaruski2

U Biełarusi zatrymali litoŭca, jaki abvinavačvajecca na radzimie ŭ zabojstvie2

Cichanoŭskaja: Abmiežavańni na miažy nie zakranuć aŭtobusy i maršrutki22

bolš čytanych navin
bolš łajkanych navin

Čamu rasijskija drony stali čaściej zalatać u Biełaruś?

Čamu rasijskija drony stali čaściej zalatać u Biełaruś?

Hałoŭnaje
Usie naviny →