Rymašeŭski choča źniać Hubareviča z prajmieryz «za amaralnyja pavodziny». U apazicyi ŭsio składana
U apošni dzień krasavika skončyłasia internet-hałasavańnie na prajmieryz apazicyjnych kandydataŭ na prezidenckija vybary. Pieramohu ŭ internecie atrymaŭ kiraŭnik AHP Mikałaj Kazłoŭ, jakoha padtrymała amal 40% udzielnikaŭ, na druhim miescy lidar Ruchu «Za Svabodu» Juraś Hubarevič — 36%, treciaja — samavyłučenka Volha Kavalkova z 24%.
Z hetym etapam usio zrazumieła, ale apazicyjnyja partyi, jakija damaŭlalisia miž saboj, płanavali, što prajmieryz buduć składacca z troch etapaŭ: pajezdki pa rehijonach, hałasavańnie ŭ internecie i kanhres. Pa vynikach ŭsich hetych etapaŭ pamiž kandydatami pavinny byli raźmiarkoŭvacca pa 30 hałasoŭ. Jašče pa 2 hałasy mieli kožnaja z struktur (BCHD, AHP, Ruch «Za Svabodu», BSDP i Partyja BNF). Bały ad BNF nie dastanucca nikomu, bo partyja vyjšła z pracedury.
Takim čynam: pajezdki. U sakaviku piaciorka kandydataŭ (tady jašče ŭdzielničali Pavieł Sieviaryniec i Alaksiej Janukievič) abjeździli 13 haradoŭ i miastečak Viciebskaj i Bresckaj abłaściej.
Ahułam kandydaty mielisia zavitać až u 56 nasielenych punktaŭ, ale ŭ spravu ŭmiašałasia pandemija. Tamu pajezdki daviałosia admianić całkam. Farmalna pa pracedury kandydaty jašče mohuć jeździć pa krainie ŭ pieršaj pałovie maja, ale ŭsie jany razumiejuć, što epidemijałahičnaja situacyja nie palepšycca. Tamu na pajezdkach u rehijony možna stavić kryž.
Što ciapier budzie ŭ hetaj situacyi? Juraś Hubarevič raspaŭsiudziŭ pres-reliz, u jakim padvioŭ vyniki adrazu dvuch etapaŭ. «Pa vynikach pieršaha etapu prajmieryz hałasy raźmierkavalisia takim čynam: Juryj Hubarevič — 73,59% (248 hałasoŭ), Mikałaj Kazłoŭ — 18,1% (61 hołas), Volha Kavalkova — 8,31% (28 hałasoŭ)», — havorycca ŭ paviedamleńni.
Heta vyklikała nieadnaznačnuju reakcyju ŭ BCHD. Chryścijanskija demakraty raspaŭsiudzili svoj zvarot: «Fantastyčnyja ličby «pieramohi» Juryja Hubareviča źjaŭlajucca pryvatnym mierkavańniem hetaj piersony i nijakaha dačynieńnia da aficyjnaj pazicyi kampanii prajmieryz nie majuć», — havorycca ŭ zajavie.
Bolš za toje, kiraŭnictva BCHD nastolki aburyli hetyja ličby ad Hubareviča, što jany źbirajucca stavić pierad nastupnaj radaj pytańnie ab vyklučeńni kiraŭnika RZS z prajmieryz. Hetuju infarmacyju «NN» paćvierdziŭ sustaršynia BCHD Vital Rymašeŭski.
«Heta praŭdzivaja infarmacyja. BCHD ličyć, što amaralnyja pavodziny Jurasia Hubareviča dajuć padstavy dla vyklučeńnia jaho z prajmieryz. U nas jość pracedura: kali kandydat parušaje pryncypy, to jon moža być vyklučany z pracedury. Juryj fejkavym raspaŭsiudam infarmacyi ŭvioŭ u zman vialikuju kolkaść ludziej. 72% — heta hučała z adnaho boku śmiešna, a ź inšaha nam daviałosia davać kamientary, što heta dezynfarmacyja», — adznačaje Rymašeŭski.
Sumnieŭna, što Hubarevič budzie vyklučany, bo dla hetaha patrebnaje kansensusnaje rašeńnie ŭsich subjektaŭ, a ruch «Za Svabodu», viadoma, nie prahałasuje za heta. «Ale heta pryncypovy momant», — adznačaje Rymašeŭski.
AHP taksama nie zacikaŭlenaje ŭ tym, kab vyniki pieršaha etapa zaćviardžalisia pa dvuch abłaściach. «My za spraviadlivaść. Nie atrymałasia paŭnavartasna abjechać krainu, treba heta pryznać. Nielha prymać vyniki na asnovie dvuch abłaściej. Moža, u kahości bolš mocnyja pazicyi ŭ Mahiloŭskaj ci Homielskaj abłaściach? Važna achapić usiu krainu», — kaža Mikałaj Kazłoŭ. Situacyju z tym, što Hubarevič abviaściŭ siabie pieramožcam pieršaha etapa prajmieryz, Kazłoŭ nazyvaje «trolinham» i surjozna da hetaha nie stavicca.
Sam Juraś Hubarevič robić akcent na tym, što patrebna vykonvać pieršapačatkovyja damoŭlenaści. «U dakumientach nie ŭtrymlivajecca fiksavany śpis haradoŭ. Navat jość paznaka, što śpis moža karektavacca ŭ zaležnaści ad situacyi. Mohuć admianiacca sustrečy ŭ haradach, kali zrazumieła, što tam niemahčyma pryciahnuć na sustreču bolš za 12 čałaviek, a taksama ź inšych pryčyn. Viciebskaja i Bresckaja vobłaści byli abranyja advolna, tam mahła być Mahiloŭskaja ci Homielskaja vobłaści», — kaža Hubarevič. Viadoma, što jon nastrojvaje na tym, kab pieršy etap byŭ zaćvierdžany pa stanie na naviedvańnie apošniaha horada.
Juraś Hubarevič kaža, što jašče nie zaćvierdžanyja i vyniki internet-hałasavańnia. Pravodzicca pravierka. «Za adnaho z kandydataŭ za apošnija sutki prahałasavała prykładna stolki ž, jak raniej ciaham tydnia», — kaža jon, chutčej za ŭsio, majučy na ŭvazie Mikałaja Kazłova.
Što tyčycca hałasoŭ za Paŭła Sieviarynca i Alaksieja Janukieviča, to jany prosta anulavanyja. Niama takoj pracedury, kab hetyja kandydaty mahli pieradać svaje hałasy za kahości ź inšych pretendentaŭ.
Pracedurnyja momanty ŭžo abmiarkoŭvali na sustrečy subjektaŭ prajmieryz 1 maja. Ni da čoha kankretnaha palityki damovicca nie zmahli. Nastupny schod adbudziecca 6 maja.
Pa-raniejšamu niama jasnaści z Kanhresam, jaki musiŭ adbycca naprykancy maja. Na im musili prysutničać pa sto čałaviek ad kožnaj palityčnaj struktury. Udzielniki zhadžajucca, što čas choć i jość, ale naŭrad ci situacyja nastolki palepšycca, što jaho možna budzie pravieści ŭžyvuju.
Vital Rymašeŭski kaža, što jość zhoda na praviadzieńnie Kanhresu anłajn, mahčyma, z praparcyjnym źmianšeńniem kolkaści ŭdzielnikaŭ, ale rašeńnie błakuje Juraś Hubarevič. Sam Hubarevič kaža, što heta dyskusijnaje pytańnie i jano pavinna jašče abmiarkoŭvacca.
Jašče cikavym momantam źjaŭlajecca dylema, kamu dastanucca 2 bały ad BCHD? Raniej by jany adyšli da Paŭła Sieviarynca jak vyłučenca ad partyi. U prajmieryz udzielničaje siabroŭka BCHD Volha Kavalkova — heta značyć, što tyja dva bały atrymaje jana?
«Budzie vyrašacca. Mahčyma, padtrymajem Volhu, mahčyma, Kazłova. Moža być, abaich, moža być, nikoha. Ale dakładna, što hetyja bały nie atrymaje Juraś Hubarevič», — kaža Vital Rymašeŭski.
Kali prezidenckija vybary ŭsio ž adbuducca ŭ žniŭni, to času da ich zastajecca ŭsio mieniej, a supiarečnaściaŭ i sprečak u stanie apazicyi — bolej. Adziny kandydat musić być nazvany naprykancy maja.
Kamientary