Kiraŭnik misii SAAZ Patryk O'Konar, fota Vadzima Zamiroŭskaha

Kiraŭnik misii SAAZ Patryk O'Konar, fota Vadzima Zamiroŭskaha

Na sajcie Suśvietnaj arhanizacyi achovy zdaroŭja źjaviŭsia śpis rekamiendacyj Biełarusi pa vynikach misii niezaležnych ekśpiertaŭ, jakija aceńvali, jak u našaj krainie zmahajucca z karanavirusam. SAAZ rekamienduje adkłaści ŭsie masavyja mierapryjemstvy — i spartyŭnyja, i relihijnyja, i kulturnyja, a taksama pieravieści škoły i ŭniviersitety na dystancyjnaje navučańnie, piša Tut.by.

Misija SAAZ prybyła ŭ Biełaruś pa zaprašeńni Alaksandra Łukašenki. Padkreślivałasia, što niezaležnyja ekśpierty pavinny acanić, jak kraina vyrašaje prablemu z raspaŭsiudžvańniem karanavirusa i dać rekamiendacyi, što varta palepšyć u hetym kirunku.

Śpiecyjalisty Suśvietnaj arhanizacyi achovy zdaroŭja pabyvali ŭ balnicach u Minsku, Viciebskaj i Minskaj abłaściach. Na vynikovaj pres-kanfierencyi jany padkreślivali, što sami vybirali ŭstanovy achovy zdaroŭja, pieraškod z boku biełaruskich uładaŭ nie było. Udzielniki misii sustrelisia taksama z supracoŭnikami orhanaŭ unutranych spraŭ (u tym liku pienitencyjarnaj sistemy), sacyjalnaj abarony.

Siarod stanoŭčych momantaŭ SAAZ adznačyła sistemny padychod epidnahladu ŭ Biełarusi, adsočvańnie kantaktaŭ i izalacyju chvorych, najaŭnaść łabaratoryj dla apracoŭki testaŭ, raźmiežavańnie pacyjentaŭ u paliklinikach i špitalach, kab papiaredzić pieradaču virusa, pry hetym praciahvajecca akazańnie asnoŭnych miedycynskich pasłuh pa chraničnych zachvorvańniach, matčynym zdaroŭi i psichičnym zdaroŭi. Ekśpierty dali stanoŭčuju acenku apieratyŭnaj arhanizacyi vytvorčaści srodkaŭ indyvidualnaj abarony dla miedykaŭ unutry krainy, pakolki pastaŭki na hłabalnym rynku skaračajucca.

A voś asnoŭnyja rekamiendacyi SAAZ:

Uzmacnić sacyjalnaje dystancyjavańnie, pryčym śpiecyjalisty padkreślivajuć, što havorka idzie nie pra samaizalacyju, havorka idzie pra toje, kab skaracić pa maksimumie nieabaviazkovyja pieramiaščeńni, asabliva dla ludziej z chraničnymi zachvorvańniami i dla pažyłych ludziej, a taksama adkłaści masavyja mierapryjemstvy — i kulturnyja, i spartyŭnyja, i relihijnyja. Akramia taho, varta pieravieści na dystancyjnaje navučańnie škoły i ŭniviersitety. Abiedźvie hetyja rekamiendacyi na dadzieny momant Biełaruś nie vykonvaje albo vykonvaje častkova — dzieci praciahvajuć chadzić u škoły (adnak jość mahčymaść zastacca doma), pa-raniejšamu prachodzić čempijanat pa futbole, cerkvy i kaścioły byli adkryty na Vierbnicu i Vialikdzień. Rašeńnie ab admienie paradu na 9 maja ŭsio jašče nie pryniata, praciahvajecca padrychtoŭka da mierapryjemstva.

Dziaržava pavinna infarmavać hramadskaść pra ryzyki, rekamiendacyi adnosna zdaroŭja ludziej, miery reahavańnia. Hetaja rekamiendacyja nie zaŭsiody vykonvajecca: naprykład, statystyka pra kolkaść chvorych publikujecca biez raźbiŭki pa rajonach i nierehularna.

Źmiaščać na karancin pacyjentaŭ z paćvierdžanym karanavirusam i ich kantakty. Hetaja rekamiendacyja vykonvajecca, za parušeńnie režymu samaizalacyi praduhledžana administracyjnaja adkaznaść (štraf da 30 b. v.), a ŭ vypadku zaražeńnia inšaha čałavieka — kryminalnaja.

Praciah akazańnia asnoŭnych miedyka-sanitarnych pasłuh i sacyjalna-ekanamičnaj padtrymki, jakija patrabujucca, asabliva najbolš uraźlivym. Dadzienaja rekamiendacyja vykonvajecca: dla pažyłych ludziej, jakija znachodziacca ŭ hrupie ryzyki, arhanizavana dastaŭka na dom praduktaŭ i lekaŭ siłami sacyjalnych rabotnikaŭ i vałancioraŭ.

Mižhalinovaje supracoŭnictva. Hetaja rekamiendacyja taksama vykonvajecca. U Ministerstvie achovy zdaroŭja rehularna sustrakajucca śpiecyjalisty roznych orhanaŭ ułady dla vypracoŭki ahulnych rašeńniaŭ pa praduchileńni raspaŭsiudžvańnia karanavirusa.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?