Rabotniki śfiery pasłuh abaviazanyja nasić maski. Hałoŭnyja zajavy ministra Karanika na anłajn-bryfinhu

8 krasavika u Nacyjanalnym pres-centry adbyŭsia niezvyčajny bryfinh — biez žurnalistaŭ. Ministr achovy zdaroŭja Biełarusi Uładzimir Karanik i dva čynoŭniki sa śfiery miedycyny, u tym liku Ihar Jurkievič, hałoŭny doktar 6-j minskaj kliničnaj balnicy, jakuju pastupova pieraprafilujuć pad dadatkovy staličny infiekcyjny špital, adkazali na pytańni pa biahučaj situacyi. Pytańni jany začytvali sami. Padsumavańnie bryfinhu zrabiła radyjo «Svaboda».

Jak raskazaŭ ministar Karanik, u 15 budaŭnikoŭ z Rasii, jakija znachodzilisia na 14-dzionnym karancinie pierad pačatkam pracy na BiełAES, vyjavili karanavirus.

«U hrupy rasijskich budaŭnikoŭ na BiełAES, jakija znachodzilisia na karancinie, paŭtornaje łabaratornaje testavańnie dało stanoŭčy vynik, — kazaŭ Uładzimir Karanik. — Ich špitalizavali, pravodzicca pahłyblenaje abśledavańnie».

Ministr adznačyŭ, što ŭsie zamiežniki prachodziać karancin i teściravańnie pierad tym, kab być dapuščanymi da pracaŭ na AES.

Jašče siońnia ŭranku Minzdaroŭja paviedamlała ŭsiaho pra 11 špitalizavanych na Hrodzienščynie. Musić, hetyja 15 astravieckich — prajšła infarmacyja, što hetyja rabotniki pryjechali z horada Nižni Tahił na Urale — u skład 11-ci nie ŭvachodziać.

Ministr raskazaŭ, što pravierka vyjaviła: bolš za 600 čałaviek, jakija musili być u samaizalacyi paśla pryjezdu z-za miažy, nie zastali doma. Ale niejak karać ich nie mohuć, raskazaŭ ministr. Ciapier «prapracoŭvajecca pytańnie» pra administracyjnuju adkaznaść za parušeńnie samaizalacyi.

Pravasłaŭnym i katalickim hramadam krainy raniej užo nakiroŭvali zakliki nie całavać ikonaŭ, a pierad Vialikadniem Ministerstva achovy zdaroŭja «pravodzić kansultacyi» z kiraŭnikami carkvy, jak cerkvy majuć dziejničać.

Raniej katalicki mitrapalit Tadevuš Kandrusievič skazaŭ, što čakaje ad uładaŭ bolš jasnych ukazańniaŭ i zaklikaŭ viernikaŭ pravieści hety Vialikdzień doma.

Ahułam pa krainie, adznačyŭ Karanik, vidać «nievialikaje pieravyšeńnie» vypadkaŭ pnieŭmanij, ale za try miesiacy biahučaha hodu ad pnieŭmanii pamierli tolki 254 čałavieki, tady jak za pieršy kvartał minułaha — 277. Raniej ministerstva paviedamlała pra 153 pamierłych ad pnieŭmanii siarod «pralečanych u stacyjanarach», ale 7 krasavika Łukašenka nazvaŭ inšuju ličbu — 254 ahułam.

Karanik paŭtaryŭ, što ministerstva nie paviedamlaje pra vypadki COVID-19 z raźbiŭkaj pa rajonach krainy, bo «heta vyklikaje niezdarovuju cikavaść». Ciapier viadomaja tolki raźbiŭka pa abłaściach, i taja nie ad pres-słužby Ministerstva achovy zdaroŭja, a ad dziaržaŭnaha infarmahienctva BiełTA. Karanik zaściaroh, što «my tak dojdziem da taho, što nas paprosiać paviedamlać pa vulicach, dzie pražyvaje chvory čałaviek».

Varta adznačyć, što mienavita takuju adkrytaść na rańnich etapach epidemii prajaŭlali jak krainy Azii (Sinhapur, Paŭdniovaja Kareja), tak i Jeŭropy (Litva), kab strymać raspaŭsiud epidemii. Ludzi viedali pra niebiaśpieku dla siabie i abmiažoŭvali kantakty.

Na bryfinhu ahučyli i pytańnie pra najaŭnaść imunitetu ad COVID-19 u tych, chto ŭžo pierachvareŭ. Ciapier miedyki daśledujuć antycieły, jakija arhanizm vypracoŭvaje suprać virusu SARS-CoV-2. Nakont mahčymaści paŭtornaha zaražeńnia «dyskusii jość», paśla słabych formaŭ chvaroby tearetyčna moža być i paŭtornaje zaražeńnie. Ale, adznačyŭ Karanik, «imunitet vypracoŭvajecca, hety fakt užo paćvierdžany, ciapier dyskusija idzie tolki nakont jahonaj tryvałaści i terminu raźvićcia».

Taksama pad pytańniem, zaściaroh Karanik, mahčymaja mutacyja virusa — całkam mahčyma, što kali-niebudź źjavicca štam, jaki imunnaja systema prapuścić, niahledziačy na imunitet da SARS-CoV-2.

U najbližejšy čas u Biełarusi płanujuć pasprabavać vykarystoŭvać suprać najbolš ciažkich formaŭ karanavirusa ŭzbahačanuju antyciełami płazmu. Ale pakul ni ŭ Biełarusi, ni ŭ śviecie nia vynajdziena adnaznačna dziejsnych lekaŭ suprać mienavita hetaha virusa, a tolki suprać asobnych simptomaŭ; taksama niama vakcyn.

Što da deficytu masak i antysieptykaŭ, Karanik nahadaŭ, što ažyjatažny popyt jość nia tolki ŭ Biełarusi, ale i ŭ susiednich krainach. U Biełarusi lohkaja pramysłovaść pieraładžvajecca, maje vyjści na vytvorčaść miljona masak na dzień, na nastupnym tydni — dva miljony na dzień, zapeŭniŭ ministr, i nieŭzabavie prablemu vyrašać. Taksama častka pradpryjemstvaŭ, u jakich antysieptyki byŭ nie asnoŭnym vidam dziejnaści, taksama pačali vypusk takich srodkaŭ.

U Biełarusi nazirajecca i deficyt paracetamołu, jaki dapamahaje źbić vysokuju temperaturu. Za apošnija dva tydni jaho pradali stolki, kolki zvyčajna pradajuć za 14 tydniaŭ. Karanik zaściaroh: bieskantrolny pryjom paracetamołu moža być navat škadniejšym za karanavirus, a prymać jaho biez symptomaŭ nie varta, bo jon nie maje prafiłaktyčnaha abo vitaminnaha efiektu, ale maje procipakazańni, mahčymyja pabočnyja efiekty, a ad pieradozu moža pačacca niekroz piačonki.

Nahadajem, što pry karanavirusie tempieraturu rekamiendujuć źbivać paracetamołam, a nie ibuprafienam, bo apošni — miedyki pakul nie viedajuć čamu — časam vyklikaje niebiaśpiečnyja abvastreńni.

Rabotniki śfiery pasłuh abaviazanyja nasić maski. Ministr upieršyniu skazaŭ heta tak jasna. 

Zarazicca COVID-19 možna praz pavierchni, na jakija trapiŭ virus ad chvoraha. Zarazicca možna, kali zdarovy čałaviek, naprykład, dakranajecca spačatku da poručnia, a paśla da svajho nosa, vačej. Choć niama adnaznačnych dokazaŭ taho, što karanavirus nie moža pieradavacca z kvatery ŭ kvateru praź vientylacyju, miedyki ličać heta vielmi małajmaviernym: kancentracyi virusa buduć zanadta małymi, i praź vientylacyju pavietra vyciahvajecca vonki, a nie «zaciahvajecca» paśladoŭna z kvatery ŭ kvateru.

Nahadajem, što ŭ krasaviku kolkaść vyjaŭlenych u Biełarusi vypadkaŭ COVID-19 rasła z chutkaściu 15—30% za dzień. 8 krasavika ŭranku Minzdaroŭja paviedamiła pra 1 066 vyjaŭlenych vypadkaŭ, 13 pacyjentaŭ pamierli.

• 0
• 0
• 0
• 0
• 0
• 0
• 0
• 0