Biełaruś nie admaŭlajecca ni ad adnaho punkta dahavora ab stvareńni Sajuznaj dziaržavy, ale nastojvaje na roŭnych umovach. Pra heta Alaksandr Łukašenka zajaviŭ siońnia ŭ intervju MTRK «Mir», pieradaje BIEŁTA.
Adkazvajučy na pytańnie, jak jon bačyć raźvićcio Sajuznaj dziaržavy z ulikam usich najaŭnych niuansaŭ, Alaksandr Łukašenka pačaŭ z hałoŭnaha: «U nas jość damova ab stvareńni Sajuznaj dziaržavy. Ni ad adnaho punkta hetaj damovy my nie admaŭlajemsia. Navat voźmiem samy surjozny, jaki siońnia abmiarkoŭvajecca. Dapuścim, adzinaja valuta. My nie suprać adzinaj valuty, ale tolki heta pavinna być niejtralnaja valuta — heta nie biełaruski rubiel, nie rasijski».
«I navat ja kaliści kazaŭ: ładna, nie pytańnie, jaki heta budzie rubiel. Pytańnie ŭ tym, dzie budzie emisijny centr. I navat nie dzie, a chto budzie kiravać emisijnym centram. Heta budzie na roŭnych abo, pakolki Rasija vialikaja, jana budzie kiravać svaim rublom, a my svoj likvidujem i da ich dałučymsia? — rastłumačyŭ svaju pazicyju Alaksandr Łukašenka. — My heta ŭžo prachodzili ŭ pieršyja hady paśla raspadu Savieckaha Sajuza. Kali nas prosta vykinuli z rublovaj zony. I, urešcie, my zastalisia z savieckimi rublami, jany ŭviali rasijski rubiel, a my potym malavali «zajčyki». Ja nie chaču heta paŭtarać. Heta pa-pieršaje. A pa-druhoje, dzie ž tut tady budzie naš suvierenitet?»
Jon jašče raz padkreśliŭ, što biełaruski bok ni ad čaho nie admaŭlajecca, i nahadaŭ, što damova praduhledžvała stvareńnie roŭnych umoŭ dla hramadzian, pradpryjemstvaŭ i dźviuch dziaržaŭ u cełym.
«Kali Rasija siońnia, admoviŭšysia ad hetych impierskich pamknieńniaŭ (my — vialikija, a vy — małyja), hatovaja na heta, davajcie vieści pieramovy, davajcie budziem vyznačacca», — skazaŭ biełaruski kiraŭnik.
«Tamu dahavor isnuje. I my nikoli ad jaho nie adrakalisia. My hatovyja iści pa hetaj damovie, ale žalezabietonny pryncyp — roŭnyja ŭmovy dla ludziej, pradpryjemstvaŭ, dziaržaŭ. Ciapier usio parušana, a karanavirus parušyŭ i apošniaje, samaje hałoŭnaje, — roŭnyja ŭmovy dla ludziej», — ličyć kiraŭnik Biełarusi.
Alaksandr Łukašenka zajaviŭ, što kali Rasii treba było niešta zrabić, to varta było choć by paraicca, papiaredzić biełaruski bok ab zakryćci miežaŭ. «Ja razumieju, kali b tam paŭstała niejkaja žudasnaja situacyja i treba było terminova pryniać miery. Ale łohiki ž nie było tady. U Biełarusi situacyja była nie horšaj, čym u Rasii, — značna lepšaj. Ja nastojvaju, što i siońnia nie horšaja. Pa-druhoje, navošta adrazać ad hetaj Sajuznaj dziaržavy tuju asnoŭnuju častku, dzie niama prablem. I ŭ toj ža čas jany ŭnutry krainy (a Rasija vielizarnaja) nie padzialili na častki, kab pierakryć ruch ludziej i nośbitaŭ karanavirusa. Heta zvyčajnaje było hałavaciapstva. A jak nakont formuły «siabar paznajecca ŭ biadzie»? — adznačyŭ kiraŭnik dziaržavy.
Kamientary