Šviedski padychod: adzinaja, akramia Biełarusi, kraina, dzie ličać, što ŭvodzić strohi karancin zarana

Spačatku heta byli Brytanija, Niderłandy, Šviecyja i Biełaruś. Paśla Brytanija kruta pamianiała taktyku. Niderłandy pacichu ŭviali amal usie tyja ž abmiežavańni, što i krainy-susiedzi. Zastajucca tolki Šviecyja i Biełaruś.

Šviecyja abrała zusim inšuju stratehiju baraćby z karanavirusam, čym absalutnaja bolšaść jeŭrapiejskich krain. Zamiest karancinu tut rekamiendujuć myć ruki, pracavać z domu, pa mahčymaści nie padarožničać i nie kantaktavać ź ludźmi bieź nieabchodnaści.

Asabliva hetyja zachady rekamiendavanyja asobam u pavažnym vieku i ludziam z chraničnymi chvarobami: jany majuć całkam paźbiahać vychadaŭ z domu. Zakupy rekamiendujecca rabić praź internet abo z dapamohaj susiedziaŭ. Doma pavinien zastavacca taksama toj, chto maje simptomy prastudy abo hrypu.

Dziciačyja sadki i škoły, adnak, adčynienyja. Tolki vučni starejšych kłasaŭ i studenty pierajšli na dystancyjnaje navučańnie. U restaranach i barach pracujuć aficyjanty, rekamiendavana taksama pavialičyć adlehłaść pamiž stolikami.

Zabaronienyja vizity ŭ damy sastarełych. Ale tolki ŭ minułuju piatnicu źmienšanaja maksimalnaja kolkaść udzielnikaŭ masavych mierapryjemstvaŭ z 500 da 50 asobaŭ.

Na fonie całkam zakrytaj Jeŭropy zusim dziŭna vyhladajuć učorašnija rekamiendacyi ŭrada Šviecyi spartyŭnym arhanizacyjam: pa mahčymaści pravodzić zaniatki na śviežym pavietry, a taksama pieranieści spabornictvy na paźniejšy termin i źmienšyć kolkaść zaŭziataraŭ.

Padobnyja abmiežavańni rekamiendavanyja ŭ transparcie, kramach i ofisach.

Praz toje, što pacyjenty masava skuplajuć leki, dazvalajecca kupić zapas nie daŭžej čym na try miesiacy.

Zarazny ci niezarazny bieśsimptomny nośbit?

Nie ŭsia Šviecyja padzialaje słušnaść ekśpierymientu: bolš jak dźvie tysiačy navukoŭcaŭ, daktaroŭ i prafiesaraŭ padpisali adkryty list z krytykaj šviedskich uładaŭ i zaklikam, kab u krainie prytrymlivalisia rekamiendacyj Suśvietnaj arhanizacyjaj zdaroŭja.

— My nie robim dastatkova testaŭ, nie daśledujem kantakty, nie izalujem infikavanych. Dazvalajem virusu razhulvać na voli. Urad daviadzie nas da katastrofy, — krytykavała aficyjnyja dziejańni prafiesar Cecylija Soderbierh-Naŭkler, śpiecyjalistka pa daśledavańniach supraćvirusnaha imunitetu Instytuta Karalinska. Biez pośpiechaŭ, bo ŭłady niaźmienna adkazvajuć, što trymajucca rekamiendacyj Nacyjanalnaha ahienctva zdaroŭja, jakoje ŭznačalvaje hałoŭny epidemijołah krainy — Anders Tehnel.

Štodziońnik Dagens Nyheter pisaŭ pra Kryścijana Šcichlera, karespandenta niamieckaha telebačańnia, jaki kožny dzień u kancy pres-kanfierencyi zadaje Tehnelu adno i toje ž pytańnie: ci asoba, zaražanaja karanavirusam, zdolnaja zaražać inšych padčas inkubacyjnaha pieryjadu?

U artykule pad nazvaj «Što za niemiec štodnia stavić Tehnela da ściany» jaho nazvali «cichaj zorkaj» pres-kanfierencyj NAZ Šviecyi.

— Na hetaje pytańnie śpiecyjalisty ŭ Hiermanii i Šviecyi adkazvajuć pa-roznamu. Niamieckija abmiežavańni apošnich dzion uviedzienyja ŭ pierakanańni, što asoba moža zaražać inšych, navat kali nie maje simptomaŭ chvaroby. U Šviecyi ŭłady ličać inakš. Ja b chacieŭ viedać, chto maje racyju, — tłumačyć Šcichler.

Nieadnaznačnaja statystyka

Stakholmski štodziońnik piša, što jašče vielmi rana aceńvać, jakija mietady najbolš dziejsnyja ŭ abmiežavańni raspaŭsiudžvańnia chvaroby i abaronie hrup ryzyki.

Niemcy ŭžo amal try tydni tamu pačali začyniać škoły, a ciapier nielha navat źbiracca bolš za dvoje. Tamu, pavodle niamieckaha žurnalista, «Hiermanija naziraje za raźvićciom padziej u Šviecyi z sumieśsiu ździŭleńnia i niedavieru. Tak aściarožnyja va ŭsim šviedy tym razam vyrašyli zachavać chałodnuju kroŭ. Ale jość nadzieja, što susiedzi z poŭnačy majuć racyju».

Hledziačy na statystyku, nielha adnaznačna skazać, što rašeńni Andersa Tehnela vyklikali chvalu zachvorvańniaŭ. Pavodle danych Worldometer, u adkrytaj Šviecyi ŭ sieradu paćvierdžana 14 śmierciaŭ u pieraliku na miljon žycharoŭ, u zakrytaj Danii — 13 śmiarotnych vypadkaŭ na miljon, u taksama zakrytaj Narviehii na miljon žycharoŭ 6 śmierciaŭ.

Šviecyja vyrazna adstaje ad susiedziaŭ u ličbie testaŭ: u krainie ź dziesiaćciu miljonami nasielnictva zroblena tolki 36 tysiač analizaŭ, u toj čas kali ŭ dva razy mienšych Danii i Narviehii — 21 i 90 tysiač adpaviedna.

— Urad ličyć, što chvarobu nie ŭdasca zatrymać, i choča dazvolić ludziam pamierci, — złujecca prafiesar Cecylija Soderbierh-Naŭkler, cytujučy The Guardian, — Ich nie cikaviać navukovyja danyja, bo ŭrad ślepa vieryć NAZ.

My bačym prykmiety patencyjna bolšaha pracentu zaražeńniaŭ, čym u Italii. U Stakholmie zakančvajucca miescy ŭ adździaleńniach intensiŭnaj terapii, a jany nie razumiejuć, što chutka budzie pozna što-niebudź rabić.

Tehnel, adnak, pierakonvaje, što situacyja ŭ Šviecyi pad kantrolem:

 — Niama nijakich dokazaŭ, što kab my prymali bolš mieraŭ u dadzieny momant, to situacyja niejak źmianiłasia b. Našmat lepš uvieści surovyja abmiežavańni tolki na peŭnym etapie, kab stasavać ich jak maha karaciej. Najvažniejšyja zachady my zrabili. Mo i spatrebiacca niejkija jašče, ale pakul nie čas, — skazaŭ Tehnel u intervju dla anhlijskaj haziety.

• 0
• 0
• 0
• 0
• 0
• 0