Jašče adzin vypadak zaražeńnia karanavirusam u minskaj škole: nastaŭnica pačatkovych kłasaŭ

Stała viadoma jašče pra adzin vypadak zaražeńnia karanavirusam va ŭstanovach adukacyi. Zachvareła nastaŭnica pačatkovych kłasaŭ u siaredniaj škole №159 Minska. Joj bolš za 50 hadoŭ. Ciapier žančyna znachodzicca ŭ balnicy, adčuvaje siabie zdavalniajuča, paviedamlaje Tut.by.

U redakcyju napisali adrazu niekalki čytačoŭ. Usie jany daviedalisia pra chvarobu nastaŭnicy ad svajakoŭ, čyje dzieci vučacca ŭ kłasie vykładčyka. Pa słovach surazmoŭcaŭ, baćkoŭ prasili pra hety vypadak «nie raspaŭsiudžvacca».

— Doma nastaŭnik straciła prytomnaść. Rodnyja vyklikali chutkuju, jaje zabrali ŭ balnicu — i vyjavili pnieŭmaniju. Choć nijakich simptomaŭ, akramia słabaści, u jaje nie było. Tempieratura padskočyła ŭžo ŭ balnicy, test paćvierdziŭ karanavirus. Nastaŭnica ŭ śviadomaści, kantaktuje z baćkami praz čat u Viber, — raspaviadaje čytač.

Pa słovach baćkoŭ, pra toje, što ŭ nastaŭnicy vyjavili karanavirus, im paviedamili ranicaj 1 krasavika. Na praciahu dvuch hadzin z usimi siemjami — a ŭ kłasie vučacca 28 dziaciej — źviazałasia epidemijałahičnaja słužba. Śpiecyjalisty raspytali, jak adčuvajuć siabie dzieci, ci jość u ich simptomy karanavirusnaj infiekcyi.

Škoła №159 znachodzicca na vulicy Adzincova ŭ Frunzienskim rajonie Minska. Darečy, 1 krasavika pisałasia pra jašče dva vypadki zaražeńnia ŭ hetym rajonie — u vychavalnicy dziciačaha sadka na vulicy Cimašenki i ŭ nastaŭnicy škoły №179 na vulicy Laščynskaha.

Dyrektar škoły №159 Ina Bohdan nie stała asprečvać, što ŭ jaje kalehi vyjavili karanavirus. Pra toje, što zaraz adbyvajecca va ŭstanovie adukacyi, jana raspaviała tak:

— My robim usio, što nam zahadana Ministerstvam achovy zdaroŭja. I my nie možam skoknuć vyšej za hałavu. Usio, što nam skazana, my zrabili, robim i budziem rabić.

Nahadajem, 25 sakavika načalnik hałoŭnaha ŭpraŭleńnia prafiesijnaj adukacyi Ministerstva adukacyi Siarhiej Kaśpiarovič i ministr achovy zdaroŭja Uładzimir Karanik zajavili, što ŭvodzić karancin u navučalnych ustanovach pakul niemetazhodna. 6 krasavika dzieci pavinny viarnucca ŭ škołu paśla viasnovych kanikuł. Samaizalacyja navučencaŭ dazvolena ŭ tym liku Łukašenkam, adkaznaść za heta rašeńnie ŭskłali na baćkoŭ.

• 0
• 0
• 0
• 0
• 0
• 0