Rasijskaja nafta budzie pastaŭlacca ŭ Biełaruś biez vypłat premii pastaŭščykam, pry hetym biełaruski bok nie admovicca ad alternatyŭnych varyjantaŭ zakupak syraviny. Pra heta ŭ intervju «Rośsijskoj hazietie» skazaŭ pasoł Biełarusi ŭ Rasii Uładzimir Siamaška, piša BiełTA.
«Zusim niadaŭna nam udałosia znajści ŭzajemaprymalnaje rašeńnie na biahučy 2020 hod pa ŭmovach pastavak rasijskaj nafty ŭ Biełaruś, — adznačyŭ pasoł. — Heta rašeńnie zasnavana na źnižeńni premii rasijskich naftavych kampanij u formule cany na naftu na $7 za tonu. Astatniaja častka premii ŭ pamiery $4,7 za tonu budzie kampiensavana ŭ ramkach mižbiudžetnych adnosin Biełarusi i Rasii. Tamu čakajem, što ŭ astatniuju častku hoda nam udasca chutka naraścić abjomy pastavak i vyjści pa 2020 hodzie na ličby, blizkija da tych, što płanavalisia pieršapačatkova».
Pry hetym Uładzimir Siamaška zaŭvažyŭ, što vyklučeńnie premijalnych vypłat z cenaŭtvareńnia na naftu, što pastaŭlajecca ŭ Biełaruś, vyrašaje prablemu tolki biahučaha hoda, dy i toje kali cana nafty nie pierasiahnie ŭ hetym hodzie $40-45 za baral.
«U dalejšym, vyrašajučy zadaču stvareńnia adzinaha rynku nafty i naftapraduktaŭ Sajuznaj dziaržavy, biełaruskija i rasijskija NPZ pavinny mieć absalutna adnolkavyja ŭmovy kampiensacyi vydatkaŭ ad padatkovaha manieŭru», — padkreśliŭ jon.
«Biezumoŭna, bolšuju častku z patrabujemaha abjomu nafty my budziem atrymlivać z Rasii, pakolki tut niemałavažnuju rolu adyhryvajuć i zručnaść łahistyki, i technałahičnaja aryjentacyja biełaruskich naftapierapracoŭčych zavodaŭ na pierapracoŭku nafty sortu Urals, — źviarnuŭ uvahu dypłamat. — Ale razam z tym kiraŭnictvu kancerna «Biełnaftachim» pastaŭlena zadača naroščvać abjomy ŭłasnaj zdabyčy nafty z pravieranymi časam zamiežnymi partniorami i šukać alternatyŭnyja krynicy pastaŭki nafty, kab u dalejšym nie traplać u składanyja situacyi».
Rumas: U krasaviku Biełaruś kuplaje naftu ŭ Rasii pa $4 za baral
Siłaviki praciahvajuć umacoŭvać svaje budynki, bajučysia paŭstańnia4
Kamientary