Juryj Nazaraŭ pryznačany vice-premjeram, jaki adkazvaje za enierhanośbity. Pierad hetym jon šeść hadoŭ uznačalvaŭ «Biellespapierpram».

Juryj Nazaraŭ. Fota bellegbumprom.by

Juryj Nazaraŭ. Fota bellegbumprom.by

«NN» znajšła cikavyja źviestki pra asabistaje žyćcio novaha vice-premjera i jaho siamju 

Juryj Nazaraŭ naradziŭsia ŭ Horkach. U toj čas u miascovaj sielskahaspadarčaj akademii navučalisia jahonyja baćki. Jany pabralisia šlubam na druhim kursie, adrazu ž i źjaviŭsia pieršy syn Juryj.

Mama čynoŭnika Kłara pachodzić ź vioski Kamienka Horackaha rajona — heta samaja miaža z Rasijaj. Tata Viktar — ź Viciebska. I pakolki maładoj pary treba było dumać pra vučobu, dyj u chutkim časie pajšli nastupnyja dzieci, to vychavańniem Juryja zaniałasia babula Maryja Hryhorjeva.

Sprava ŭ tym, što rodny dzied Juryja Nazarava (jon mieŭ proźvišča Saŭčanka) zahinuŭ jašče ŭ 1943 hodzie. Užo ŭ mirny čas babula Maryja Fiodaraŭna pabrałasia šlubam z druhim mužam, Ivanam Michiejevičam, ale dziaciej u pary tak i nie było. Adzinaj dačkoj była Kłara ad pieršaha šlubu. Tamu babula z mužam ź vialikaj achvotaj i luboŭju ŭziali na vychavańnie ŭnuka. Žyli jany ŭ vioscy Uljašyna Horackaha rajona. Pačatkovaja škoła była ŭ Sieńkavie, a starejšyja kłasy davodziłasia skančvać užo ŭ samim rajcentry.

Babula pracavała paštaljonam, a dzied — vieterynaram.

Juryj Nazaraŭ zaŭsiody dapamahaŭ babuli, až da jaje śmierci pryjazdžaŭ ź Minska, kali tolki mieŭ mahčymaść.

Paśla taho, jak Juryj skončyŭ z adznakaj lasny instytut, jon viarnuŭsia pracavać na małuju radzimu. Uładkavaŭsia laśničym u Zubroŭski lashas. Žyŭ u babuli, na pracu dabiraŭsia na matacykle MT z kalaskaj.

«Vialikaje tady było laśnictva, jano i ciapier vialikaje, a tady jano byŭ 10780 hiektaraŭ, ujavicie tolki! — raskazvaje Kanstancin Siarhiejevič, jaki ŭ toj čas pracavaŭ razam z Nazaravym u lesie. — Ad nas što patrabavałasia? U pieršuju čarhu nie parušać zakanadaŭstva. U Horackim lashasie jon dyrektaram prabyŭ usiu hetuju pierabudovu, razruchu».

Cikava, što toj ža Kanstancin Siarhiejevič pierakanany, što Juryj Nazaraŭ byŭ siratoj, ale heta zusim nie tak. Jahonaja mama pa siońnia žyvie ŭ vioscy Lubaničy Kiraŭskaha rajona. Kłary Dźmitryŭnie ŭžo 80 hadoŭ, jaje dahladaje adzin z małodšych synoŭ Alaksandr, jaki pracuje tam ža na piłaramie. A voś baćka ŭžo pamior va ŭzroście 70 hadoŭ.

«U Juryja žonka — doktar-anastezijołah. I baćki ŭ jaje — daktary ŭ Horkach. Jon nie rvaŭsia da ŭłady, nie chacieŭ jechać u toj Minsk, i žonka nie chacieła. Jana spačatku nie pajechała, dva hady ŭ Horkach žyła, a ŭžo kali kvateru [u Minsku] atrymaŭ, to pryjechała da jaho», — raskazvaje Kłara Dźmitryjeŭna.

Susiedzi pa Uljašyna kažuć, što Juryj Nazaraŭ i siońnia časta pryjazdžaje ŭ Horki na mohiłki. Babulinu chatu ŭžo pradali, svajakoŭ tam nie zastałosia. Da mamy pryjazdžaje dvojčy na hod.

Hałoŭny buchhałtar Horackaha lashasa Taćciana Masiuk nazyvaje Juryja Nazarava «čałaviekam ź vialikaj litary». «Całkam addadzieny pracy śpiecyjalist. Jon taki pracaholik, vielmi patrabavalny. Kali čałaviek biare na siabie niejki ŭčastak pracy, to pavinien viedać usio pra heta. Jon nie z tych načalnikaŭ, jakija što sabie ŭ hałavu ŭbili, toje i robiać. U nas kožny tydzień byli płaniorki, na jakich jon spačatku vysłuchoŭvaŭ usich, a ŭžo potym rabiŭ niejkija vysnovy. Jamu było važna, kab ludzi vykazvalisia. My, staryja supracoŭniki lashasa, ź ciepłynioj uspaminajem Juryja Viktaraviča, jahonuju škołu vychavańnia».

U Juryj Nazarava dźvie siastry i dva braty. Pra adnaho z bratoŭ my ŭžo skazali: Alaksandr pracuje na piłaramie ŭ Kiraŭskim rajonie. Inšy brat, Michaił, skončyŭ Viciebski miedycynski instytut, doŭhi čas žyŭ u Mahilovie i Babrujsku, a ciapier pracuje chirurham u 3-j paliklinicy ŭ rasijskim Sočy. Siastra Iryna — vykładčyca muzyki ŭ Viciebsku, a Łarysa — miedsiastra ŭ Mahiloŭskim rajonie.

Brat Michaił Nazaraŭ. Fota facebook.com

Brat Michaił Nazaraŭ. Fota facebook.com

«Dobryja dzieci, nichto ŭ turmie nie siadzieŭ, nichto nie złodziej», — kaža mama Kłara Dźmitryjeŭna. U jaje taksama jość šaściora ŭnukaŭ i šaściora praŭnukaŭ. Letaś žančynie spoŭniłasia 80 hadoŭ.

U Juryja Nazarava z žonkaj adna dačka Viktoryja, joj 26 hadoŭ. Pajšła pa śladach maci, skončyła Miedycynski ŭniviersitet, pa śpiecyjalnaści piedyjatar. «Nazarava V. Ju. — adkaznaja i pracalubivaja, u stasunkach z vykładčykami i adnakurśnikami zyčlivaja, taktyčnaja. U kalektyvie karystajecca zasłužanaj pavahaj i aŭtarytetam», — napisana pra jaje na sajcie BDMU.

Viktoryja Nazarava. Fota vk.com

Viktoryja Nazarava. Fota vk.com

Viktoryja pakul nie zamužam, pracuje ŭ RNPC dziciačaj chirurhii. Jana šmat padarožničaje pa Jeŭropie (zdajecca, asabliva ablubavała Isłandyju), a taksama pa Biełarusi. Časam źmiaščaje ŭ svaich sacyjalnych sietkach dopisy pa-biełarusku. Siarod jaje lubimych knih paznačana «Dzikaje palavańnie karala Stacha» Uładzimira Karatkieviča.

Juryj Nazaraŭ

Naradziŭsia ŭ 1962 hodzie ŭ Horkach. Skončyŭ technałahičny istytut pa śpiecyjalnaści «lasnaja haspadarka». U 1983 hodzie viarnuŭsia ŭ Horacki rajon, pracavaŭ laśničym u Zubroŭskim laśnictvie, hałoŭnym laśničym Horackaha rajona. Z 1988 da 2001 byŭ dyrektaram Horackaha lashasa.

Z 2001 hoda byŭ namieśnikam staršyni Kamiteta lasnoj haspadarki pry Saviecie ministraŭ. U 2004-2010 — namieśnikam ministra lasnoj haspadarki. U 2010-2013 byŭ namieśnikam kiraŭnika spravami prezidenta. U 2013-2020 uznačalvaŭ «Biellespapierpram».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?