Alaksandr Łukašenka siońnia na sustrečy z pradstaŭnikami ŭkrainskich ŚMI zajaviŭ, što jon nie raz kazaŭ, što Biełaruś vielmi zacikaŭlena ŭ tryvałym miry i stabilnaści ŭ našych ukrainskich siabroŭ, piša BiełTA.

«Hetaja pazicyja hruntujecca nie tolki na płatformie dobrasusiedstva. Ciapierašni kanflikt na ŭschodzie Ukrainy — heta bol u sercach i biełarusaŭ. Naš bol», — zajaviŭ Alaksandr Łukašenka.

Jon padkreśliŭ, što Biełaruś robić i praciahnie rabić usio, što ad jaje zaležyć, dla dasiahnieńnia miru va Ukrainie: ad zabieśpiačeńnia raboty trochbakovaj kantaktnaj hrupy ŭ Minsku, akazańnia humanitarnaj dapamohi da ŭdziełu ŭ adnaŭleńni infrastruktury Danbasa. «My zrobim lubyja kroki, jakija dapamohuć nablizić nas da miru», — skazaŭ jon.

Taksama Łukašenka adznačyŭ, što sustreča z pradstaŭnikami ŭkrainskich ŚMI pravodzicca napiaredadni II Forumu rehijonaŭ Biełarusi i Ukrainy, jaki projdzie ŭ Žytomiry ŭ pačatku kastryčnika.

«Hety prajekt vielmi značny nie tolki dla našych krain, ale i, adkryju sakret, dla mianie asabista», — pryznaŭsia jon.

Jon nahadaŭ, što dva hady tamu kiraŭnictva Ukrainy padtrymała hetuju ideju i ŭžo praz hod u Homieli adbyŭsia pieršy taki forum.

Na sustreču z kiraŭnikom biełaruskaj dziaržavy pryjechali pradstaŭniki infarmacyjnych ahienctvaŭ «Ukrinfarm» i «Interfaks-Ukraina», telekanałaŭ «Ukraina», «112 Ukraina» i «1+1», haziety «Uriadovij kurjer».

Клас
0
Панылы сорам
0
Ха-ха
0
Ого
0
Сумна
0
Абуральна
0