Zapracavaŭ pieršy kijosk «Tabakierka» u Minsku. Jon znachodzicca ŭ Kuncaŭščynie, prosta la Zachodniaha rynku. Realty.tut.by pahladzieli, što tam pradajecca, akramia tytuniovych vyrabaŭ.

Jak raspaviała pradaviec, kijosk pracuje ŭžo niekalki dzion. Pavodle jaje słoŭ, inšyja «Tabakierki» pakul zakryty.

Adznačym, što ŭ takich kijoskach tytuniovyja vyraby pavinny zajmać nie mienš za 80% asartymientu. Astatnija 20% — inšyja tavary.

Tamu ŭ pieršaj «Tabakiercy» taksama pradajuć čypsy, areški, žujki, preziervatyvy, šakaładki, kava 3 u 1, batarejki, klej i inšaje. Uvohule, usio toje, što było ŭ prostych łarkach, jakija ŭ 2008 hodzie imiem revalucyi prybrali z vulic Minska.

Pieršy taki tytuniovy kijosk źjaviŭsia ŭ stalicy 20 lipienia ŭ Sucharava, śledam stali zaŭvažać «Tabakierki» i ŭ inšych rajonach horada. Kijoski doŭha stajali začynienymi, choć u ich aktyŭna nabirali piersanał. Da kanca 2019 hoda ŭ stalicy pavinna być vydzielena 500 učastkaŭ pad padobnyja handlovyja punkty.

«Tabakierki» pa ŭsioj krainie ŭstaloŭvaje padkantrolnaja biznesmienu Alaksieju Aleksinu kampanija «Enierhija-OIŁ», jakaja realizuje inviestprajekt pa stvareńni niedziaržaŭnaj sietki pa handli tytuniovymi vyrabami. U rehijonach praces idzie jašče z kanca 2018 hoda, ale dla Minska heta sprava była asabliva balučaj.

«Tabakierki» zabaroniena raźmiaščać unutry haradskoha jadra, miežy jakoha prachodziać pa Tałstoha, Mašerava, Kazłova, Zacharava i Aranskaj. Zabaroniena ich taksama ŭstaloŭvać na terytoryjach, prylehłych da mahistralnych vulic, ustanoŭ achovy zdaroŭja, adukacyi, parkach i skvierach. Nielha raźmiaščać hetyja kijoski na prypynkach ź vialikim trafikam. Adnak hetyja ŭmovy časta nie vykonvajucca.

Pad «Tabakierki» ŭłady abaviazanyja biez aŭkcyjonu pradastavić u arendu inviestaru ziamielnyja ŭčastki dla budaŭnictva i absłuhoŭvańnia handlovych abjektaŭ. Heta kijoski, kramy, paviljony i nieizalavanyja punkty.

Клас
0
Панылы сорам
0
Ха-ха
0
Ого
0
Сумна
0
Абуральна
1

Chočaš padzialicca važnaj infarmacyjaj ananimna i kanfidencyjna?