Hramadstva1515

Siamja doktara, u kvateru jakoha pamyłkova ŭvarvaŭsia AMAP, adsudziła kala 3000 rubloŭ

Fota Jaŭhiena Jerčaka

Sud Zavodckaha rajona Minska častkova zadavoliŭ pazoŭ siamji Dźmitryja Sierady ab kampiensacyi materyjalnaj škody da kazny Respubliki Biełaruś, piša Radyjo Svaboda.

Pazvanyja zajavili ŭ sprečkach u sudzie, što dziejańni supracoŭnikaŭ milicyi pry zatrymańni Dźmitryja Sierady byli zakonnymi i abhruntavanymi.

Pavodle advakatki Dźmitryja Sierady, patrabavańni zajaŭlalisia da niekalkich pazvanych. Ale sud zadavoliŭ patrabavańni mienavita da kazny Respubliki Biełaruś. «Heta čysta jurydyčny aspekt», — skazała advakatka karespandentu Svabody. Sierada atrymaje kala 3 000 rubloŭ kampensacyi. Heta hrošy, jakija siamja patraciła na ramont kvatery paśla ŭvarvańnia AMAPu, medycynskuju i jurydyčnuju dapamohu.

«Treba ŭmieć pryznavać svaje pamyłki»

«Niachaj milicyja napiša ŭ internecie, paprosić prabačeńnia pierad nami. Mianie abrazili, majho syna, usiu maju siamju. Ja nie chaču, kab mnie było soramna pierad ludźmi», — kazała ŭ sudzie maci Dźmitryja Halina Sierada. Jana ŭładalnica kvatery, u jakuju 4 žniŭnia 2016 hodu ŭvarvalisia amapaŭcy ŭ maskach. Dźmitryja na vačach u žonki i trochhadovaha dziciaci pakłali tvaram u padłohu, załamali ruki za śpinu, nadzieli kajdanki.

Usie hetyja hady Dźmitry patrabuje dabicca pryznańnia ŭvarvańnia ŭ jahonuju kvateru niezakonnym i kampensacyi.

Pieršy namieśnik Zavodzkaha RUUS Miensku Vital Kapilevič padčas pracesu zajaviŭ, što va ŭsim vinavatyja «pravakacyjnyja pavodziny» Dźmitryja Sierady.

«I ŭ vyniku jahonyja niasłušnyja dziejańni pry znosinach z supracoŭnikam milicyi spravakavali tyja abstaviny, jakija jość na siońnia. Ažno da pryčynieńnia ŭronu jahonaj siamji i škody zdaroŭju dački», — skazaŭ Vital Kapilevič.

Zajava ab pravakacyjnych pavodzinach «nie vytrymlivaje nijakaj krytyki», ličyć advakatka Dźmitryja Taćciana Padreckaja. Sierada nia viedaŭ, što za ludzi ŭryvajucca ŭ jahonaje žytło.

«Napeŭna, treba ŭmieć pryznavać svaje pamyłki. Ale, na žal, u hetaj sytuacyi z boku pazvanych pryznańnia svaich pamyłak nie adbyłosia», — skazała advakatka.

«Nie pasprabavali vyklikać pozvaj»

Usia historyja pačałasia z taho, što dźvie žančyny zajavili ŭ milicyju «pra fakt demanstracyi pałavych orhanaŭ nieŭstanoŭlenaj asobaj». Ciapier hetaja kryminalnaja sprava prypynienaja, bo nia vyśvietlena asoba, jakaja ŭčyniła złačynstva.

Adna z paciarpiełych pakazała na Dźmitryja Sieradu, jakoha ŭbačyła kala padjezdu. Milicyjanty razam z amapaŭcami pajechali zatrymlivać Dźmitryja jak padazravanaha. Pierad hetym jaho navat nie pasprabavali vyklikać pozvaj i nia vyśvietlili numar mabilnaha telefona, kab niepasredna ź im źviazacca. A samo rašeńnie ab pryciahnieńni AMAPu było ŭzhodniena tolki na nastupny dzień paśla zatrymańnia.

Pakazaŭ paśviedčańnie ŭ dźviarnoje vočka

Dapytany ŭ sudzie ŭ jakaści śviedki operupaŭnavažany Alaksandar Nuščyk, jaki kiravaŭ aperacyjaj, na bolšaść pytańniaŭ adkazvaŭ «nia pamiataju», «ciažka adkazać» albo «heta jość u materyjałach spravy». Raniej jaho apytvali 12 razoŭ.

Nuščyk raskazaŭ, što la dźviarej kvatery Sierady skazaŭ: «Adčynicie, milicyja» i pakazaŭ paśviedčańnie ŭ vočka. Taksama jon patelefanavaŭ na chatni numar, pačuŭ mužčynski hołas i pakłaŭ słuchaŭku.

U raparcie Nuščyka havorycca, što jon vyrašyŭ pryciahnuć da zatrymańnia Sierady amapaŭcaŭ paśla apytańnia dźviuch susiedak. Adna ź ich zajaviła, što ŭ kvatery Sierady «peryjadyčna adbyvajucca skandały». Nuščyk zrabiŭ vysnovu, što padazravany «schilny da hvałtu i niepadparadkavańnia».

Adnak paźniej hetyja žančyny, jakich dapytvaŭ śledčy, zajavili, što ničoha drennaha pra Dźmitryja Sieradu nie kazali.

Nuščyk zajaviŭ, što Dźmitry Sierada «ŭchiliŭsia ad patrabavańniaŭ» i «jon źjaŭlaŭsia padazravanym, na jaho pakazała paciarpiełaja».

Paśla dopytu pradstaŭnik MUS zajaviŭ, što Nuščyku nibyta było kiepska ŭ sudzie, i prasiŭ sud dapytać jaho dadatkova. Adnak sudździa adchiliła chadajnictva.

Sierada «samastojna loh na padłohu tvaram uniz»

Pavodle pakazańniaŭ amapaŭca Siarhieja Kavalčuka, ad Nuščyka stała viadoma, što treba zatrymać mužčynu, jaki padazrajecca ŭ «mnostvie seksualnych złačynstvaŭ».

«Jon (Nuščyk. — RS) patłumačyŭ, što padazravany dobra fizyčna raźvity, mocny, zajmajecca sportam, charaktaryzujecca jak nervovy, moža pry zatrymańni akazvać aktyŭny supraciŭ. Nuščyk davioŭ, što šturm kvatery nieabchodna zrabić adnačasova z dvuch kirunkaŭ — z vakon i praz uvachodnyja dźviery».

Amapaŭcy padnialisia z dapamohaj alpinisckaha ryštunku na dach doma dla šturmu kvatery praz balkon. Praź niejki čas, pavodle Kavalčuka, kamandzir hrupy paviedamiŭ praz radyjosuviaź, što ŭ kvatery, aproč padazravanaha, znachodziacca žančyna i dzicia.

Pavodle amapaŭca, Dźmitry Sierada nie supraciŭlaŭsia i «samastojna loh na padłohu tvaram uniz, samastojna zavioŭ ruki za śpinu». I jon nadzieŭ Sieradu kajdanki.

Pavodle Kavalčuka, adsutnaść supracivu była padstavaj prymianić fizyčnuju siłu ŭ mienšaj stupieni.

«Mieła miesca sproba schavacca va ŭłasnaj kvatery»

U svaim vystupie Vital Kapilevič patłumačyŭ, što Dźmitry Sierada «praktyčna zabarykadavaŭsia ŭ svaim žylli» i «mieła miesca sproba schavacca ad orhanaŭ va ŭłasnaj kvatery». Tamu była dadziena kamanda na siłavoje praniknieńnie ŭ žyllo.

«Heta źjaŭlajecca standartnaj praceduraj u zatrymańni asobaŭ, padazravanych va ŭčynieńni analahičnych złačynstvaŭ. Bo taki vid złačynstva źviazany z psychičnym rasstrojstvam. A ekipiroŭka padraździaleńnia zaŭsiody standartnaja».

Na pytańnie advakatki, ci ŭdakładniali milicyjanty, ci Sierada staić na ŭliku ŭ psychdyspansery, Vital Kapilevič adkazaŭ, što heta, maŭlaŭ, vynikaje «z praktyki raboty ŭ raskryćci analahičnych vidaŭ złačynstva».

«Jak praviła, u takoj katehoryi złačynstvaŭ nie zaŭsiody padazravanyja asoby majuć narmalny psychičny stan».

Advakatka spytałasia, ci ličyć Vital Kapilevič nieabchodnym prynieści prabačeńni Sieradu za niezakonnaje ŭvarvańnie ŭ žyllo i za niezakonnaje prymianieńnie fizyčnaj siły i specsrodkaŭ. Pavodle Kapileviča, supracoŭniki milicyi dziejničali zhodna z zakonam.

«Adpaviedna nijakich prabačeńniaŭ u hetaj častcy my prynieści prosta nia možam», — skazaŭ jon.

Vysnovy słužbovaj pravierki «zrobleny vielmi zaŭčasna»

Pry hetym jość zaklučeńnie słužbovaj pravierki, dzie zroblena vysnova, što supracoŭniki, jakija ŭvarvalisia ŭ kvateru, parušyli zakon ab orhanach unutranych spraŭ.

Vital Kapilevič skazaŭ, što nia moža asprečvać vysnovy pravierki, ale jany «byli zroblenyja vielmi zaŭčasna, nia vyvučyŭšy ŭsie normy zakanadaŭstva».

Na pytańnie advakatki, ci ličyć jon zaklučeńnie, padpisanaje tahačasnym načalnikam HUUS Mienharvykankamu Alaksandram Barsukovym i jahonymi namieśnikami pamyłkovym, Vital Kapilevič adkazaŭ: «Adnaznačna».

Napiaredadni sudu Sieradzie vośmy raz admovili ŭ zaviadzieńni kryminalnaj spravy. Takoje rašeńnie pryniaŭ Śledčy kamitet paśla dadatkovaj pravierki.

Što adbyłosia ŭ žyćci Dźmitryja Sierady

Ranicaj 4 žniŭnia 2016 hodu ŭ kvateru Sierady ŭvarvalisia amapaŭcy ŭ maskach, na vačach u žonki i trochhadovaha dziciaci pakłali Dźmitryja tvaram u padłohu, załamali ruki za śpinu, nadzieli kajdanki i, praciahvajučy źbivać u specaŭtatransparcie, dastavili ŭ RUUS Zavodzkaha rajonu.

Padčas uvarvańnia amapaŭcy vybili ŭvachodnyja dźviery ŭ kvateru i šybu ŭ balkonnych dźviarach u kuchni. U pastarunku lekara dapytali ŭ jakaści padazravanaha ŭ chulihanstvie (č. 1 art. 339 Kryminalnaha kodeksu). Dźmitryja Sieradu adpuścili z pastarunku na nastupny dzień, bo ŭ śledčaha «adpali padstavy dla dalejšaha ŭtrymańnia jaho pad vartaj».

22 žniŭnia pradstaŭnik MUS nakiravaŭ u sud svaje piarečańni, u jakich śćviardžaje, što zajava siamji Sierady ab kampensacyi materyjalnaj škody «nie abhruntavanaja i nie padlahaje zadavalnieńniu».

U dakumencie havorycca, što pa fakcie praniknieńnia ŭ žyllo kryminalnaja sprava suprać kapitana milicyi Nuščyka była spynienaja Hienprakuraturaj «z pryčyny adsutnaści ŭ jahonych dziejańniach składu złačynstva».

Dźmitry Sierada ciaham troch hadoŭ sprabuje abskardzić dziejańni amapaŭcaŭ, jakija pieravysili svaje paŭnamoctvy, ale za hety čas atrymaŭ vosiem admovaŭ u zaviadzieńni kryminalnaj spravy.

Dahetul ni Ministerstva ŭnutranych spraŭ, ni mienskaja milicyja nie prapanoŭvali siamji Sierady kampensavać naniesienuju škodu, a taksama nie prasili publična prabačeńnia

Kamientary15

Bajden vychodzić z prezidenckaj honki28

Bajden vychodzić z prezidenckaj honki

Usie naviny →
Usie naviny

Ołaf Šolc dahetul hladzić lampavy televizar6

Słavakija i Vienhryja spyniajuć pampavać naftu praz trubapravod «Družba». Heta važna i dla Biełarusi

USU nanieśli ŭdar pa vajskovym aeradromie ŭ Rastoŭskaj vobłaści1

Niemiec, prysudžany da rasstrełu, datyčny da dyviersij? Voś što za historyja heta mahła być9

U ZŠA vyzvalili žančynu, jakaja adsiadzieła 43 hady ni za što2

Paśla ŭrahanu biełarusy padali bolš za 10 tysiač zajavak u Biełdziaržstrach1

Pad Minskam busieł kupaŭsia ŭ voziery razam ź ludźmi VIDEA5

Biełaruś paćvierdziła rasstrelny prysud Kryhieru: «Hiermanii prapanavanyja kankretnyja rašeńni»9

Alaksiej Tałaj prapanavaŭ dać Łukašenku zvańnie Hieroja Biełarusi23

bolš čytanych navin
bolš łajkanych navin

Bajden vychodzić z prezidenckaj honki28

Bajden vychodzić z prezidenckaj honki

Hałoŭnaje
Usie naviny →