Pra heta zajaviŭ žurnalistam ministr ekanomiki Biełarusi Dźmitryj Kruty, paviedamlaje BiełTA.

«Prezidenty pavinny padpisać prahramu i pakiet darožnych kart, a taksama šerah pahadnieńniaŭ, jakija rašajuć dla nas adčuvalnyja pytańni. U pieršuju čarhu pa hazie. Heta budzie prezidencki pakiet», — zajaviŭ ministr.

Jon rastłumačyŭ, što zrabić heta, jak i damaŭlalisia kiraŭniki dziaržaŭ, płanujecca pad 8 śniežnia (20-hodździe padpisańnia Damovy ab stvareńni Sajuznaj dziaržavy) abo, mahčyma, napiaredadni, kali budzie vyznačana inšaja data.

«Ad daty, jakuju ŭzhadnili ŭ Sankt-Pieciarburhu, prezidenty nie adstupajuć. Usio, što adbyvajecca zaraz, — heta pramiežkavaja praca», — rastłumačyŭ Dźmitryj Kruty.

Pavodle jaho słoŭ, prahrama dziejańniaŭ budzie nasić ramačny charaktar. «Usie pytańni buduć u darožnych kartach. Paśla darožnych kart pačniecca praca nad narmatyŭnymi aktami na praciahu 2020 hoda. U roznych śfierach užo roznaja stupień na siońniašni dzień unifikacyi. Kali ŭziać mytniu, to tam praktyčna ŭsie unifikavana jašče ŭ ramkach JEAES.

Kali niejkija inšyja śfiery, tam ludzi jašče navat nie razumiejuć maštaby nieabchodnych źmienaŭ», — raskazaŭ ministr.

Dźmitryj Kruty dadaŭ, što budzie vyznačana, jaki masiŭ narmatyŭnych dakumientaŭ treba pamianiać na praciahu 2020 hoda.

«I z 1 studzienia 2021 hoda ŭ asnoŭnych śfierach buduć užo zapuščany ahulnyja rynki. Heta ahulnaja kancepcyja, z ulikam siektaralnych asablivaściaŭ mohuć być adchileńni», — skazaŭ jon.

Ministr adkazaŭ stanoŭča na pytańnie, ci zastajucca pamiž bakami sprečnyja pytańni, adnak jon nie zmoh patłumačyć, u jakich śfierach ich bolš ci mienš.

«Usio heta možna zrazumieć i rabić niejkija kamientary, kali halinovyja śpiecyjalisty siaduć za darožnyja karty, u niešta ŭprucca, i tam my zrazumiejem masiŭ roznahałośsiaŭ na kožnaj čašy vahaŭ, budziem heta ŭsio aceńvać», — rastłumačyŭ jon.

Dźmitryj Kruty taksama ŭdakładniŭ, što košt z 1 studzienia 2020 hoda rasijskaha hazu budzie vyznačany ŭ asobnym mižuradavym pahadnieńni.

U cełym jon acharaktaryzavaŭ jakaść dyjałohu z rasijskim bokam jak vielmi dziełavuju, narmalnuju i apieratyŭnuju.

Клас
0
Панылы сорам
0
Ха-ха
0
Ого
0
Сумна
0
Абуральна
0