Ułada2020

«Zubry» 2000-ch: dzie jany ciapier i čym zajmajucca

U studzieni 2001 hoda ŭ Biełaviežskaj puščy paŭstała arhanizacyja «Zubr», jaje zasnavalnikami stali sorak čałaviek. Jana stanie samym masavym pratestavym moładzievym rucham u krainie. Ad samaha pačatku «Zubr» pastaviŭ za metu niehvałtoŭny supraciŭ.

Šmat chto pamiataje jarkija nalepki «Zubra», a taksama hrafici. Sami zubroŭcy zajaŭlali, što ich arhanizacyja dziejničała ŭ 152 haradach i miastečkach Biełarusi.

U hetaj publikacyi my zhadajem niekatorych viadomych aktyvistaŭ «Zubra».

Mikita Sasim: dyrektar u vieterynarnaj klinicy

Razam z žonkaj. Fota z facebook.com.

Baranavicki aktyvist «Zubra». Sasim prasłaviŭsia tym, što padčas vučoby ŭ kaledžy lohkaj pramysłovaści ŭznačalvaŭ supołku BRSM. U sakaviku 2004 hoda hetaja supołka ŭ poŭnym składzie pierajšła ŭ «Zubr». Praź niejki čas jaho vyklučyli z navučalnaj ustanovy.

Taksama ź imiem Sasima źviazany termin «džynsavaja revalucyja». Mienavita źbity Sasim padčas adnoj z akcyj pratestu ŭźniaŭ nad saboj zamiest adabranaha ściaha džynsavuju kurtku.

Junaki pačapili na dubcy džynsoŭki zamiest ściahoŭ. Ideja vykarystoŭvać «džyns» naradziłasia ŭ honar učynku aktyvista arhanizacyi «Zubr» Mikity Sasima. Kali śpiecnazaŭcy adnojčy vyrvali ŭ jaho na pikiecie bieł-čyrvona-bieły ściah, jon źniaŭ ź siabie džynsavuju kašulu i ŭźniaŭ jaje na vudzilnie zamiest ściaha. Photo.bymedia.net z archiva «Našaj Nivy».

Sasim całkam adyšoŭ ad palityčnaj dziejnaści. Ciapier jon źjaŭlajecca dyrektaram vieterynarnaj kliniki ŭ Minsku.

Alaksandr Atroščankaŭ: Žyvie ŭ Varšavie, pracuje taksistam

Fota z facebook.com.

U «Zubry» Alaksandr Atroščankaŭ adkazvaŭ za mižnarodnuju pracu. I heta nie dziva, bo ŭ minułym jon student fakulteta mižnarodnych adnosin BDU, adkul byŭ vyklučany za palityčnuju aktyŭnaść. Supracoŭničaŭ z «Chartyjaj-97», byŭ pres-sakratarom Sańnikava ŭ 2010 hodzie.

Paśla Płoščy Atroščankaŭ byŭ aryštavany za ŭdzieł u «biesparadkach» i asudžany da čatyroch hadoŭ źniavoleńnia. Adpuščany ŭ vieraśni 2011 hoda.

«Ad vieraśnia 2012 žyvu ŭ Varšavie. Letam 2014-ha razyšoŭsia z «Chartyjaj» i «Jeŭrapiejskaj Biełaruśsiu». Ad taho času pracuju ŭ taksi. Supracoŭničaju z Reform.by i inicyjatyvaj ISANS, jakaja zajmajecca supraćdziejańniem hibrydnym pahrozam. Pieražyŭ balučy dla abaich bakoŭ razvod z žonkaj Darjaj, ale syna vychoŭvajem razam. Baču jaho amal štodnia. U paniadziełak adviali jaho ŭ pieršy kłas škoły. Płanuju novy šlub ź dziaŭčynaj, ź jakoj užo niekalki hod žyviom razam», — raskazaŭ «Našaj Nivie» Atroščankaŭ.

Anatol Alizar začytvaje manifiest ab stvareńni ruchu «Zubr». Kala pomnika Maratu Kazieju, 2001 hod. Sprava ad jaho — Natalla Radzina, u budčyni redaktarka sajta Charter97.org. Fota z archiva «Našaj Nivy».

U Biełaruś jon viartacca pakul nie płanuje. «Ja tut 7 hadoŭ. Heta amal pałova darosłaha žyćcia. U mianie tut svajo žyćcio ŭžo pabudavanaje, novyja siabry, znajomyja, kumy, zvyčki, lubimyja miescy… Syn užo ŭ škołu pajšoŭ. Jamu heta pierš za ŭsio stresava budzie, i mnie z nula pačynać… Dy i da svabodnaha pavietra, ščyra kažučy, chutka pryvykaješ», — pryznajecca Alaksandr.

Jaŭhien Afnahiel: zastajecca ŭ palitycy

Adzin z samych aktyŭnych udzielnikaŭ vuličnych akcyj. Afnahiel vychodziŭ i vychodzić i na bujnyja mitynhi, i na małaludnyja akcyi salidarnaści. Za svaju dziejnaść Jaŭhien nieadnarazova zatrymlivaŭsia, adbyvaŭ administracyjnyja pakarańni. Na vybarach 2010 hoda byŭ u kamandzie kandydata Andreja Sańnikava.

Ulotka ruchu «Zubr», 2001 hod. Z archiva «Našaj Nivy».

«Byŭ u vymušanaj emihracyi paśla Płoščy-2010. Ciapier zajmajusia hramadska-palityčnaj dziejnaściu, źjaŭlajusia kaardynataram hramadzianskaj kampanii «Jeŭrapiejskaja Biełaruś». Žyvu ŭ Kałodziščach z žonkaj», — skazaŭ «Našaj Nivie» Afnahiel.

Pavieł Juchnievič: u aŭtabiznesie

Juchnievič byŭ adnym z zasnavalnikaŭ «Zubra». Na toj momant jamu nie było jašče i 16 hadoŭ. Z hetaha času jon pranios u sabie viernaść tym ideałam, za jakija zmahaŭsia «Zubr».

Akcyja «Zubroŭ», pryśviečanaja pieršaj hadavinie prezidenckich vybaraŭ 2001 hoda. Barysaŭ, 9 vieraśnia 2002 hoda. Photo.bymedia.net z archiva «Našaj Nivy».

«Užo dastatkova daŭno ŭ aŭtamabilnym biznesie. Mahu nazvać siabie ŭ im prafiesijanałam. Žanaty, haduju dźviuch dačok», — raskazvaje Pavieł. Nie tak daŭno jon abvieściŭ ab svaim žadańni iści kandydatam na parłamienckija vybary.

Uładzimir Kobiec: Biełaruski dom u Varšavie

Kobiec pryjšoŭ u «Zubr» ź dziaržaŭnaj słužby. Jon pracavaŭ u Ministerstvie pryrodnych resursaŭ i achovy navakolnaha asiarodździa. Pa adukacyi jon hieohraf-ekołah. U 2010-m uznačalvaŭ vybarčy štab Andreja Sańnikava. Kobiec byŭ aryštavany, jak i šmat chto z kamandy Sańnikava. Vyjšaŭ na volu ŭ studzieni 2011 hoda. U vieraśni taho ž hoda jon źjechaŭ u Polšču, z-za miažy zajaviŭ pra viarboŭku ŭ čas źniavoleńnia.

Ciapier žyvie ŭ Varšavie, źjaŭlajecca adnym sa sustaršyń tamtejšaha Biełaruskaha doma.

«Zubr» byŭ pieršaj sprobaj stvareńnia ruchu novaj hienieracyi. Heta była vializnaja sietka, jakaja achapiła amal usie rehijony krainy. U toj čas być «zubram» było modna. Potym naš dośvied pieraniali va Ukrainie, Hruzii, Kyrhyzstanie», — skazał «Našaj Nivie» Kobiec.

Akcyja ruchu «Zubr» nasuprać posolstva ZŠA ŭ Minsku ŭ padtrymku amierykanskaj interviencyi ŭ Iraku, 3 krasavika 2003 hoda. Sprava — Uładzimir Kobiec, źleva — Leanid Navicki. Były baksior i asabisty achoŭnik Sańnikava, ciapier žyvie ŭ Francyi. Usich piatnaccać čałaviek, jakija ŭziali ŭdzieł u akcyi, paśla jaje skančeńnia ŭ roznych miescach horada zatrymała milicyja. Photo.bymedia.net z archiva «Našaj Nivy».

«Na siońnia choć ja i znachodžusia pa-za miežami Biełarusi, ale pracuju dla jaje. My šmat robim supolna ź niedziaržaŭnymi knižnymi vydaŭcami, łabirujem ich udzieł u knižnych vystavach, pracujem ź niedziaržaŭnymi arhanizacyjami, ŚMI», — raskazaŭ spadar Uładzimir.

Taćciana Jełavaja: źjechała ŭ Kaliforniju

Jełavaja pryjšła ŭ «Zubr» jašče školnicaj. Milicyja zatrymała jaje prosta ŭ škole padčas zdačy apošniaha vypusknoha ekzamiena za akcyju «Dałoŭ tyrana». Potym Jełavaja zasnavała ruch supracivu «Bunt», jaki adznačyŭsia dziorzkimi akcyjami pa ŭzdymie nacyjanalnych ściahoŭ.

U 2006-m na Jełavuju zaviali kryminalnuju spravu pa artykule «Arhanizacyja i padrychtoŭka dziejańniaŭ, jakija hruba parušajuć hramadski paradak». U vyniku Taćciana vyjechała ŭ Vilniu, dzie vučyłasia ŭ EHU. Viała papularny błoh pad nikam Zmagarka.

Paśla pierajechała razam z mužam-prahramistam u Kaliforniju, amal nie prysutničaje ŭ sacyjalnych sietkach i publičnaj prastory.

Maładafrontaŭcy i zubroŭcy pieryjadyčna praktykavali vyviešvańnie nacyjanalnych ściahoŭ. Na fota: na praśpiekcie Skaryny, 15 listapada 2004 hoda. Photo.bymedia.net z archiva «Našaj Nivy».

Za akijan pierabrałasia i jašče adna aktyvistka «Zubra» Iryna Toŭścik, u Biełarusi jana zajmałasia pravaabarončaj dziejnaściu. Ciapier jana žyvie ŭ kanadskim Taronta.

Na pierformans «Zubroŭ» na płoščy Pieramohi spynilisia pahladzieć dziasiatki ludziej. U adnym ź miachoŭ Alaksandr Apranič, paśla 2010 hoda jon adyšoŭ ad aktyŭnaj dziejnaści, pracuje prahramistam. Raniej jon achoŭvaŭ ofis «Chartyi-97». Fota z archiva «Našaj Nivy».

Aleh Miacielica: trymaje ahrasiadzibu

Fota mspring.online.

Pa adukacyi — nastaŭnik hieahrafii. Udzielnik šmatlikich palityčnych kampanij, u 2001 hodzie padčas vybaraŭ adsiedzieŭ amal try miesiacy pa administracyjnych artykułach.

U 2011 hodzie Miacielica na niejki čas źjechaŭ u Litvu, ale viarnuŭsia ŭ Biełaruś u 2014 hodzie, kali zrazumieŭ, što jamu nie pahražaje kryminalny pieraśled. Ciapier žyvie ŭ Białyničach.

Siońnia Aleh trymaje svaju ahrasiadzibu Starki ŭ Białynickim rajonie. Jon zachaplajecca indziejcami Amieryki, tamu dadaŭ u joj takoha kałarytu. Taksama Aleh pracuje ŭ strachavoj kampanii.

«Ja nikoli nie škadavaŭ, što byŭ u «Zubry». Hanarusia, što prajšoŭ praz hetuju arhanizacyju», — raskazvaje Aleh.

Andrej Pałuda: Milicyjanier, jaki padtrymlivaŭ «Zubr»

Kali ŭ 2001 hodzie paŭstavaŭ «Zubr», to Andrej Pałuda pracavaŭ u milicyi, u adździaleńni pa baraćbie z arhanizavanaj złačynnaściu ŭ Mahilovie. Užo ŭ hety čas jon padtrymlivaŭ «Zubr».

«Ź milicyi syšoŭ paśla taho, jak Andrej Klimaŭ nadrukavaŭ knihu, dzie mianie jon nazyvaŭ budučym načalnikam abłasnoha MUS», — paśla hetaha Pałuda kaardynavaŭ dziejnaść «Zubra» pa Mahiloŭskaj vobłaści i častcy Homielskaj.

«U mianie jurydyčnaja adukacyja, tamu ja šmat akazvaŭ dapamohi paplečnikam u sudach. Heta i vyznačyła moj zaniatak na budučyniu. Ja chacieŭ zajmacca pravaabarončaj pracaj. Spačatku pryjšoŭ u Biełaruski Chielsinski kamitet, a ad 2007 hoda ja ŭ «Viaśnie». Adkazvaju za adukacyjny kirunak, a taksama kaardynuju kampaniju suprać śmiarotnaha pakarańnia. Žyvu ŭ Minsku», — raskazaŭ «Našaj Nivie» Pałuda.

Andrej Jahoraŭ: Centr jeŭrapiejskaj transfarmacyi

Fota talaka.by.

U «Zubry» spadar Jahoraŭ zasnavaŭ pravaabarončuju słužbu, dzie viali manitorynh sudoŭ, zatrymańniaŭ, źbićcia. «Cikava było, što partniory na Zachadzie ŭsprymali nas jak samastojnuju pravaabarončuju arhanizacyju», — śmiajecca Jahoraŭ.

Na siońnia Andrej Jahoraŭ — heta mahistr palityčnych navuk. Jon źjaŭlajecca staršym analitykam u Centry jeŭrapiejskaj transfarmacyi. «Zajmajusia palityčnaj analitykaj, žyvu ŭ Minsku», — raskazvaje Jahoraŭ.

Jarasłaŭ Ściešyk: viadučy «Biełsata»

Fota z facebook.com.

Ściešyk u «Zubry» byŭ ad pieršaha hoda stvareńnia. Jon braŭ aktyŭny ŭdzieł u kurapackaj vachcie 2001 hoda, kali praz uročyšča kłali kalcavuju darohu.

U Ściešyka ŭ «Zubry» była mianuška Če Hievara.

«Zubroviec» Alaksandr Monič palać simvoliku Biełaruskaha patryjatyčnaha sajuza moładzi na centralnaj płoščy Barysava, 10 sakavika 2004 hoda. Photo.bymedia.net z archiva «Našaj Nivy».

Jarasłaŭ byŭ admietnym błohieram, pracavaŭ u niekatorych ŚMI, u tym liku «Našaj Nivie». Ciapier Ściešyk źjaŭlajecca viadučym «Biełsata», žyvie ŭ Varšavie.

Alaksiej Šydłoŭski: pracuje ŭ pražskim hateli

Syn Alaksiej zajmajecca chakiejem u škole pražskaj «Słavii». Fota z facebook.com.

Adzin ź pieršych palitviaźniaŭ. U 1997 hodzie Šydłoŭskaha i Vadzima Łabkoviča, tady jašče aktyvistaŭ «Maładoha frontu» abvinavacili ŭ naniasieńni hrafici «Žyvie Biełaruś» i «Paźniak — naš prezident» na budynak Staŭbcoŭskaha rajvykankama. Byŭ prysudžany da vasiamnaccaci miesiacaŭ źniavoleńnia. Pakarańnie adbyvaŭ u Žodzina i na Vaładarcy. Ad 2001 hoda — adzin ź lidaraŭ «Zubra». Supracoŭničaŭ z mnohimi niedziaržaŭnymi ŚMI.

U kancy 2007 hoda Šydłoŭski źjechaŭ ź Biełarusi. Pryčynaj stała zaviadzieńnie na jaho kryminalnaj spravy nibyta za bojku ŭ kramie. Šydłoŭski śćviardžaŭ, što bojka była spravakavanaj praz partret Łukašenki. Žyvie ŭ Čechii, dzie atrymaŭ palityčny prytułak.

«Pracuju načnym administrataram u hateli. Hadujem z žonkaj małoha chakieista», — śmiajecca Alaksiej.

Cimoch Drančuk: zachapiŭsia bieham

Syn viadomaha ekołaha Valeryja Drančuka. Vučyŭsia na žurfaku BDU, ale byŭ adličany adtul za palityku. U «Zubry» ad momantu zasnavańnia. Potym byŭ u kamandzie Andreja Klimava, supracoŭničaŭ ź inicyjatyvaj «Partniorstva». Trapiŭ na łavu padsudnym pa sumnaviadomym artykule 193 «Udzieł u niezarehistravanaj arhanizacyi» i byŭ asudžany da hoda źniavoleńnia. Paśla niejki čas abaraniaŭ pravy źniavolenych.

Vialiki džynsavy fest 16 vieraśnia 2006 hoda na płoščy Banhałor. Moładź trymaje źničy i partrety palitviaźniaŭ, u tym liku sprava — Cimocha Drančuka. Photo.bymedia.net z archiva «Našaj Nivy».

«Pracuju u turystyčnaj śfiery. A volny čas apošnija hady zaniaty raznastajnym sportam — zajmajusia sam, matyvuju na heta siabroŭ, kansultuju, jak mahu, pačatkoŭcaŭ. Prabieh dva marafony, zachapiŭsia tryjatłonam, maru praz hod vykanać dystancyju 1/2 ajranmen. Zubry pavinny być zdarovymi i mocnymi», — kaža Cimoch.

Jon praciahvaje žyć u Minsku.

Hanna Jahorava: AHP i ŚMI

Fota AHP.

Jašče adna aktyvistka «Zubra», jakaja była ŭ arhanizacyi ad pieršaha hoda isnavańnia. «Ja pracuju ŭ hramadskim siektary. Na siońnia ja źjaŭlajusia mižnarodnym sakratarom AHP, a taksama vykanaŭčym dyrektaram Asacyjacyi vydaŭcoŭ rehijanalnaj presy. Z adnaho boku, ja zastajusia ŭ palityčnaj śfiery, ź inšaha — maja prafiesijnaja dziejnaść zaviazanaja na rehijanalnych miedyja», — raskazała «Našaj Nivie» Hanna.

Čytaj taksama: Maładafrontaŭcy 2000-ch: dzie jany ciapier

Kamientary20

Čamu ŭ Mazyry amal dvoje sutak nie mahli adnavić elektrazabieśpiačeńnie? I pry čym tut vajna7

Čamu ŭ Mazyry amal dvoje sutak nie mahli adnavić elektrazabieśpiačeńnie? I pry čym tut vajna

Usie naviny →
Usie naviny

Biełarusa zatrymali paśla adpačynku ŭ Italii3

«Vyjšli chłopčyki z čamadančykami». Lidar hurta RSP raskazaŭ, jak Łukašenka pryjazdžaŭ na zdymačnuju placoŭku5

Respublikanskaja partyja aficyjna vyłučyła Trampa kandydatam u prezidenty ZŠA9

U Kabardzina-Bałkaryi biełarus sarvaŭsia sa skały2

Tramp nazvaŭ svajho kandydata ŭ vice-prezidenty22

Niekatoryja biełarusy sustrakali ŭčarašni ŭrahan, kupajučysia ŭ voziery VIDEA

Źmitra Daškieviča buduć sudzić pa novaj kryminalnaj spravie ŭžo na hetym tydni7

Łatuška: Ja mahu bajacca pić vadu ci kavu ŭ hramadskich miescach14

Kala miažy Polščy ź Biełaruśsiu ahresiŭnaja moładź atakavała polskich vajskoŭcaŭ VIDEA28

bolš čytanych navin
bolš łajkanych navin

Čamu ŭ Mazyry amal dvoje sutak nie mahli adnavić elektrazabieśpiačeńnie? I pry čym tut vajna7

Čamu ŭ Mazyry amal dvoje sutak nie mahli adnavić elektrazabieśpiačeńnie? I pry čym tut vajna

Hałoŭnaje
Usie naviny →