U vioscy Biełaja Carkva pad Čašnikami 2-4 žniŭnia ŭ treci raz užo adbyŭsia muzyčny fiestyval «Sprava», na jaki źbirajucca vykanaŭcy ź Biełarusi i zamiežža. Sioleta tudy pryjazdžali Šuma, Nahual, Dzivasił, Naścia Chmiel i inšyja. Byli vykanaŭcy z Ukrainy, Hiermanii, Rasii, Polščy.
Admietnaściu Biełaj Carkvy źjaŭlajucca malaŭničyja reštki Troickaj carkvy, jakija znachodziacca na bierazie Čarejskaha voziera. U niepasrednaj blizkaści ad ruinaŭ i adbyvajecca fest.
Arhanizatary chacieli, kab muzyki adyhrali kancert prosta ŭnutry budynka carkvy, ale śviatar Novałukomla Alaksiej Šaŭro nie dazvoliŭ hetaha zrabić. My spytali ŭ baciuški, čym jon kiravaŭsia, kali prymaŭ hetaje rašeńnie.
«Nichto nie zabaraniaŭ, arhanizatary nie ŭzhadnili zahadzia svajo mierapryjemstva z carkvoj. Chram nie dla taho, kab pravodzić tam muzyčnyja kancerty. U pieršy dzień byli charały ŭ carkvie — heta jašče dapuščalna, ale ž nie sučasnaja muzyka! Budynak va ŭłasnaści Biełaruskaj pravasłaŭnaj carkvy, nichto dazvołu nie pytaŭsia. Heta ž ni ŭ jakija kanony carkvy, ja zaŭsiody byŭ suprać.
Kancert dobry, cikavaje mierapryjemstva dla moładzi, ale ž nie ŭ chramie. Ja zaŭsiody kažu, što suprać hetaha, dziakuj Bohu, što mianie pačuli. Usiamu svajo miesca i čas. Davajcie my jašče ŭ carkvie budziem pić piva? Chiba heta pravilna? Jość miesca, dzie čałaviek jeść, a jość miesca — dzie molicca. Pamiatajecie, prafiesar Praabraženski ŭ «Sabačym sercy» kazaŭ: «Usiamu svajo miesca».
My navat u pamiać ab našych prodkach nie možam hetaha dazvolić. Jany tam malilisia. Heta ŭsio adno, kab my zrabili plaski na kostkach. Zhadziciesia, što heta nieprymalna. My pavinny razumna da ŭsiaho stavicca.
Ja razumieju, što chram adkryty, kožny moža ŭ jaho zachodzić, ale heta nie značyć, što možna ździekavacca ź śviatyni. Ja niekali sam byŭ inicyjataram hetaha festu, u pieršy hod dapamahaŭ z arhanizacyjaj. Ale samaje hałoŭnaje, što pravodziłasia mierapryjemstva z metaj restaŭracyi Troickaj carkvy. A ciapier pra heta ŭsie maŭčać», — adznačaje ajciec Alaksiej Šaŭro.
Jak ciapier vyhladaje palitźniavoleny Juraś Ziankovič. Jon nie ŭ robie, a ŭ cyvilnym kaściumie12
Kamientary