21-hadovy Hleb siabie hierojem nie ličyć, ale dziakujučy jaho dziejańniam ranicaj 13 maja ŭdałosia vyratavać chłopca ad skačka z dachu ŭniviermaha, piša Hrodna.life.

Hleb vučycca ŭ Miedycynskim univiersitecie i pracuje aficyjantam u kafe «Dach śvietu». U toj momant, kali chłopiec pieralez aharodžu i źbiraŭsia skočyć, Hleb nie razhubiŭsia i pasprabavaŭ vyratavać čałavieka.

«U takoj situacyi ŭpieršyniu apynuŭsia. Hierojem siabie nie adčuvaju. Ja zrabiŭ toje, što pavinien byŭ zrabić kožny, — raspaviadaje Hleb. — Toje, što atrymałasia ŭ mianie dapamahčy čałavieku, ja vielmi rady hetamu. A kali b nie atrymałasia, była b inšaja historyja. Ja prosta pieršy tam apynuŭsia i za siabie nie bajaŭsia, hałoŭnaje było dapamahčy».

Hleb raspaviadaje, što adlehłaść da chłopca była vialikaja, i jamu daviałosia akuratna, drobnieńkimi krokami padbiracca.

«Ja pieralez aharodžu i pačaŭ padychodzić da chłopca, a jon tym časam pačaŭ addalacca ad mianie. Uvieś čas hladzieŭ na mianie, i tamu ja nie moh da jaho blizka padyści. Chłopiec ničoha nie kazaŭ. U adzin momant, kali było maksimalnaje napružańnie, jon pačaŭ panikavać, i ja razumieŭ, što treba dziejničać. Kali jon adviarnuŭsia, ja padbieh da jaho i zrabiŭ zachop», — dadaŭ Hleb.

Kali aficyjant zatrymaŭ chłopca, da jaho padbieh zasnavalnik kafe «Dach śvietu» Stanisłaŭ Sidaraŭ i dapamahaŭ utrymlivać, kab toj nie vyrvaŭsia.

«Ja staŭ šukać sposab, kab pieraleźci aharodžu i dapamahčy čałavieku, — raspaviadaje Stanisłaŭ. — Hleb apynuŭsia pieršym i zdoleŭ schapić chłopca, i mnie zastavałasia tolki dapamahčy. Małady čałaviek, jaki źbiraŭsia skakać, byŭ ćviarozy. Adzinaje, što jon skazaŭ, heta toje, kab jaho nie pryciskali, bo jamu było ciažka dychać. Słovy byli adekvatnyja. Mnie zdajecca, jon byŭ u stresavym stanie. Što tyčycca Hleba, jon pravilny čałaviek i dobry supracoŭnik. Jamu treba vypisać premiju i paviesić jaho partret na došku honaru».

Zasnavalnik ustanovy raspaviadaje, što na naziralnaj placoŭcy treba jašče pašukać miesca, kab spakojna možna było pieraleźci aharodžu. Jon adznačaje, što z chodu čałaviek nie znojdzie takoje miesca. Zdareńnie na naziralnaj placoŭcy adbyłosia ŭpieršyniu za dva hady pracy. U viačerni čas na placoŭcy pracuje administratar, udzień viadziecca videanazirańnie.

U milicyi raskazali, što skočyć z dachu sprabavaŭ 19-hadovy student adnaho z hrodzienskich univiersitetaŭ. Jon dastaŭleny dla abśledavańnia ŭ śpiecyjalizavanuju miedycynskuju ŭstanovu. Abstaviny zdareńnia vyśviatlajucca.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?