U homielskim aeraporcie zahinuli 87 koz, jakija lacieli ŭ Kazachstan
U homielskim aeraporcie pry dazapraŭcy hruzavoha samalota zahinuli 87 koz. Žyviołaŭ pieravozili ŭ Kazachstan z Eŭropy, paviedamlaje «Radyjo Svaboda».
Usiaho ŭ hruzavym samalocie było 300 koz. Pieravoziła ich biełaruskaja avijakampanija «RubiStar».
«Kozy byli raźmieščanyja ŭ draŭlanych kletkach u dva pavierchi. Pry pasadcy samalota dla dazapraŭki draŭlanyja kanstrukcyi nia vytrymali. Kozy, jakija byli na druhim paviersie, padušyli tych, jakija byli nižej», — paviedamiła Svabodzie infarmavanaja krynica.
87 koz zahinuli, pavodle veterynarnych normaŭ ich spalili. Žyvych, u tym liku i pakalečanych, pavieźli ŭ Kazachstan aŭtamabilnym transpartam.
Pamočnik hieneralnaha dyrektara kampanii «Biełaeranavihacyja» Aleh Kaziučyc paćvierdziŭ Svabodzie, što incydent z kozami sapraŭdy byŭ.
«Štości było. Nakolki ja viedaju, pieravozčyk nietryvała zamacavaŭ kletki, i jany ŭpali pry pasadcy. Mahčyma, pieravozčyk pamyliŭsia, mahčyma, tyja ludzi, što zamacoŭvali, vinavatyja. Dakładna kolki koz zahinuła, nia viedaju, nie mahu nazvać dakładnuju kolkaść. Ale incydent byŭ. Tak zdaryłasia, što parobiš… Žyviołaŭ škada, kaniečnie. Ale nia treba kazytać nervy ludziam, lišni raz budaražyć… Nu tak, adbyłosia…»
Dyrektar aeraportu «Homiel» Pavał Navasiołaŭ skazaŭ Svabodzie, što homielski aeraport da incydentu dačynieńnia nia maje. I paraiŭ źviarnucca ŭ avijakampaniju «RubiStar».
«RubiStar źjaŭlajecca pieravozčykam, jany vykonvali hety rejs. Niachaj jany dajuć infarmacyju», — skazaŭ Navasiołaŭ.
Va ŭnitarnym pradpryjemstvie «RubiStar» zdareńniem z kozami zajmaŭsia ekanamist Alaksandar Maroźka, heta paćvierdzili supracoŭniki buchhalteryi. Adnak jon admoviŭsia raspavieści padrabiaznaści, paraiŭšy Svabodzie źviarnucca z aficyjnym piśmovym zapytam da kiraŭnictva ŭnitarnaha pradpryjemstva «RubiStar».
Jak skłałasia žyćcio vunderkinda z Žodzina, jaki ŭ 12 hadoŭ pastupiŭ u miedycynski ŭniviersitet?5
Kamientary