Na Škłoŭščynie raspracoŭvajecca maršrut, źviazany z žyćciom i dziejnaściu Łukašenki

U Škłovie raspracoŭvajecca maršrut, źviazany z žyćciom i dziejnaściu pieršaha prezidenta Biełarusi, piša Źviazda.

Maršrut «Małaja radzima» isnuje ŭ Škłovie nie pieršy hod, ale ciapier jon udaskanalvajecca i pašyrajecca. Tut jašče znachodziacca pad uražańniem ad zdymak klipa Aleny Łanskoj «Kutočak Biełarusi». Ale dom — škoła — krynica — heta jašče nie ŭsio, što tut mohuć pakazać. U adździele ideałahičnaj raboty, kultury i pa spravach moładzi rajvykankama adznačajuć, što kolkaść tych, chto žadaje pahladzieć, dzie prajšło dziacinstva, junactva i pačatak pracoŭnaj dziejnaści kiraŭnika krainy, raście. Zaraz voś nie spyniajecca pałomnictva da Trafimavaj krynicy, jakuju dobraŭparadkavaŭ jašče dzied prezidenta. U dzień tut byvaje niekalki dziasiatkaŭ čałaviek. I heta nie ŭličvajučy aficyjnych delehacyj. Pryčym nie tolki ź Biełarusi, a z roznych krain i čaściej za ŭsio Rasii.

Alesia Kupcova, načalnik adździeła ideałahičnaj raboty, kultury i pa spravach moładzi Škłoŭskaha rajvykankama dzielicca napracoŭkami:

— Pačynacca naš maršrut budzie sa Škłova — historyka-krajaznaŭčaha muzieja, dzie jość vystaŭka, pryśviečanaja dziejnaści pieršaha prezidenta. Potym naviedvajem škłoŭskuju škołu № 1, dzie Alaksandr Ryhoravič peŭny čas uznačalvaŭ kamsamolskuju piarvičku i dzie paśla vučylisia dvoje jaho synoŭ. Darečy, praz try hady škoła adznačyć svajo 100-hodździe. Aleksandryja — radzima prezidenta, tut, adpaviedna, samy zapatrabavany abjekt — škoła, dzie jon vučyŭsia. I — Trafimava krynica, jakaja pobač z ahraharadkom.

Dom, dzie žyŭ maleńki Łukašenka, nie zachavaŭsia. Jon byŭ źniesieny, ale praz peŭny čas na hetym miescy pabudavali inšy dom, padobny na papiaredni. Heta pryvatnaja majomaść, zakrytaja dla naviedvalnikaŭ. Ubačyć jaho možna tolki ŭ klipie Aleny Łanskoj — zdymki prachodzili mienavita ŭ im. A jašče ŭ škole — tym samym budynku, dzie vučyŭsia budučy kiraŭnik dziaržavy.

Zaraz tam muziej, a pobač znachodzicca sučasnaja dvuchpaviarchovaja škoła. Trafimava krynica apošnim časam taksama źmianiłasia da niepaznavalnaści — heta ceły kompleks pabudoŭ, pryhoža aformleny łandšaft. Sioleta ŭ jaje dobraŭparadkavańni padčas subotnika prymaŭ udzieł i sam prezident. Hetuju krynicu naviedvali Uładzimir Pucin i premjer Dźmitryj Miadźviedzieŭ. Jany vielmi vysoka acanili jakaść vady. Zaraz my prapracoŭvajem jašče adzin abjekt, dzie pačynałasia pracoŭnaja dziejnaść budučaha prezidenta, kaža A.Kupcova.

«Źviazda» dadaje, škoła ŭ Aleksandryi — adzin z samych papularnych abjektaŭ. Tut pracuje svoj historyka-krajaznaŭčy muziej.

— Sioleta nas naviedała kala šaści tysiač čałaviek, — raskazvaje dyrektar škoły Alaksandr Bobrykaŭ. — Dla paraŭnańnia: letaś było 4,5 tysiačy. Kožny tydzień prychodzić kala 200—300 čałaviek. Ekskursii pravodziać našy navučency, ale ludzi pryjazdžajuć navat u vychadnyja dni. I tady ja padmianiaju školnikaŭ.

• 0
• 0
• 0
• 0
• 0
• 0
• 0
• 0