BAŽ prapanavaŭ hiendyrektaru BiełTA nie davodzić «spravu ab žurnalistach» da suda

Hiendyrektar BiełTA Iryna Akułovič padčas sustrečy z namieśnikam staršyni HA «BAŽ» Barysam Hareckim vykazała razumieńnie pazicyi BAŽ, što kanfrantacyja pamiž dziaržaŭnymi i niedziaržaŭnymi miedyja nie patrebnaja nikomu. Adnak Akułovič maje namier dačakacca zaviaršeńnia śledstva pa «spravie BiełTA», paviedamlaje baj.by.

Barys Harecki sustreŭsia ź Irynaj Akułovič, kab danieści pazicyju, što kanfrantacyja ŭ žurnalisckaj supolnaści nie patrebnaja nikomu z bakoŭ. HA «BAŽ» šmat hod sprabavała naładzić dyjałoh pamiž žurnalistami dziaržaŭnych i niedziaržaŭnych miedyja, a «sprava BiełTA» suprać niezaležnych žurnalistaŭ u adzin momant heta pierakreśliła.

Da taho ž «sprava BiełTA» naniesła vialikija imidžavyja straty akurat infarmahienctvu BiełTA i ŭładam, a nie niedziaržaŭnym miedyja, miarkujuć u Biełaruskaj asacyjacyi žurnalistaŭ.

Harecki nahadaŭ, što ŭ miežach Kryminalnaha kodeksa ŭ BiełTA jość mahčymaści prymireńnia bakoŭ. U takim vypadku kryminalnaja sprava moža nie dajści da sudu. Namieśnik staršyni HA «BAŽ» ličyć, što heta adzin z mahčymych dobrych krokaŭ dla vyrašeńnia kanfliktu. I ciapier mnohaje zaležyć mienavita ad dziaržaŭnaha infarmahienctva.

Iryna Akułovič u svaju čarhu zajaviła, što razumieje situacyju. Adnak nie budzie rabić niejkich krokaŭ, pakul nie zavieršycca śledstva.

Taksama Akułovič zajaviła, što nie ličyć hetuju spravu palityčna matyvavanaj, na jaje dumku, heta — sprava ab parolach i niezakonnym dostupie. I jana, jak kiraŭnik BiełTA, abaraniaje svaich padpisčykaŭ.

— Irynie Akułovič naša pazicyja zrazumiełaja. Ale jašče bolš važna, kab čytačy niedziaržaŭnych miedyja zrazumieli adnu prostuju rečy. Pakul my — hramadstva — nie staniem na abaronu miedyja, dziaržava zmoža rabić ź imi ŭsio, što pažadaje.

Pakul my ličym, što svabodnyja miedyja sami pavinny prabivać sabie darohu, a my — tolki spažyŭcy, ničoha źmianiacca nie budzie.

Kali ž my padtrymajem žurnalistaŭ, jakich čytajem, padtrymajem redakcyi, staniem na ich abaronu, situacyja pačnie źmianiacca, — ličyć Barys Harecki i zaklikaje ŭsich dałučacca da akcyi «Staniem za žurnalistaŭ!».

• 0
• 0
• 0
• 0
• 0
• 0
• 0
• 0