Čarhiniec, Jarmolenka, Šabanovič: My navat nie bačyli zajavu ŭ padtrymku RPC, pad jakoj nibyta padpisalisia
Isnuje takaja struktura, jak «hramadskaja pałata Sajuznaj dziaržavy Biełarusi i Rasii». Utvoranaja jana była letaś u Minsku, uvajšli ŭ pałatu viadomyja ŭ Biełarusi i Rasii asoby: relihijnyja dziejačy, palityki, spartsmieny, kasmanaŭty. Usiaho bolš za 200 čałaviek. Ofis arhanizacyi znachodzicca ŭ Maskvie.
«Mižnarodnaja ekśpiertnaja i kamunikacyjnaja placoŭka, stvoranaja z metaj słužyć umacavańniu raŭnapraŭnaha i ŭzajemapavažlivaha rasijska-biełaruskaha supracoŭnictva», — havorycca na sajcie arhanizacyi.
Uzrovień sustreč i pryjomaŭ u hramadskaj pałaty dastatkova vysoki. Naprykład, ich prymaŭ u siabie były premjer Biełarusi Andrej Kabiakoŭ. Svaje imprezy pałata ładzić na scenie Dziaržaŭnaha kramloŭskaha pałaca ŭ Maskvie.
19 vieraśnia na sajcie hramadskaj pałaty sajuznaj dziaržavy źjaviłasia zajava ad imia arhanizacyi, u jakoj z asudžeńniem havorycca pra sproby Ukrainskaj pravasłaŭnaj carkvy dabicca aŭtakiefalii.
«Hramadskaja pałata sajuznaj dziaržavy Biełarusi i Rasii całkam padtrymlivaje rašeńnie Śviatoha sinoda Ruskaj pravasłaŭnaj carkvy, jaki 14 vieraśnia 2018 hoda prypyniŭ paminańnie Patryjarcha Kanstancinopalskaha Varfałamieja I i sumiesnaje słužeńnie z padparadkavanaj jamu ijerarchijaj, a taksama pryniaŭ šerah inšych mier u dačynieńni da Kanstancinopalskaha Patryjarchata», — havorycca ŭ zajavie.
Dalej u tekście havorycca pra «padstupnaje ŭvarvańnie na kananičnuju terytoryju RPC», heta značyć Ukrainu. Adznačajecca, što dziejańni Kanstancinopalskaha Patryjarchata nakiravanyja na źniščeńnie pravasłaŭja.
«Ličym niebiaśpiečnaj pracu ŭ Biełarusi i Rasii struktur ukrainskich psieŭdapravasłaŭnych raskolnikaŭ, jakija mohuć raschistvać hramadzianskaje adzinstva našych hramadstvaŭ, asabliva ŭ vypadku «lehitymizacyi» ich Kanstancinopalem», — adznačajecca ŭ zajavie.
My patelefanavali niekatorym viadomym biełaruskim siabram hramadskaj pałaty. Nichto nie čuŭ ničoha pra padobny zvarot.
Staršynia dziaržaŭnaha Sajuza piśmieńnikaŭ Mikałaj Čarhiniec kaža: «Ščyra kažučy, nie bačyŭ i nie čytaŭ. Maja pazicyja nastupnaja — raździeł cerkvaŭ niemetazhodny. Heta viadzie da raskołu ŭ hramadstvie».
Śpiavak Anatol Jarmolenka taksama nie bačyŭ tekstu zvarotu. «Ja nie budu ničoha kamientavać, bo nie bačyŭ jaho».
Urešcie muftyj Musulmanskaha relihijnaha abjadańnia ŭ Respublicy Biełaruś Abu-Biekir Šabanovič taksama kaža, što «nichto nie staviŭ jaho ŭ viadomaść» adnosna takoha zvarotu.
Vychodzić, što niechta ŭ Maskvie robić palityčnyja zajavy, navat nie cikaviačysia pazicyjaj biełaruskich siabraŭ hramadskaj pałaty. Tym samym, vykarystoŭvajučy ich viadomaść, aŭtarytet i imia ŭ svaich metach.
Siabrami pałaty taksama źjaŭlajucca atlet Fomačkin, jaki pranios rasijski ściah na adkryćci Paralimpijady ŭ Rya, Andrej Hieraščanka, jakoha zvolnili ŭ Viciebsku z pracy za admaŭleńnie niezaležnaści Biełarusi, paet-słavianafił Anatol Aŭrucin, viadomy svaimi impierskimi pohladami Siarhiej Baburyn, akcior Uładzimir Haściuchin, dačka Piatra Mašerava Natalla, kasmanaŭty Klimuk i Navicki, śviatar Usievaład Čaplin i mnohija inšyja.
Čały: Čym daŭžej Łukašenka marudzić z vybarami, tym bolš arhumientaŭ, kab jamu nie iści15
Kamientary