29 žniŭnia časovuju pavieranuju ŭ spravach Złučanych Štataŭ Ameryki ŭ Respublicy Biełaruś Dženifer Mur pryniaŭ ministar zamiežnych spraŭ Biełarusi Ŭładzimier Makiej, skazali Svabodzie ŭ presavaj słužbie MZS.
Padstavaj dla sustrečy staŭ pačatak jaje dyplamatyčnaj misii ŭ Biełarusi.
Padčas razmovy baki abmierkavali «stan i perspektyvy raźvićcia biełaruska-amerykanskich dačynieńniaŭ», padkreślili ŭ MZS.
Pavodle dyplamatyčnych pracedur ambasadar spačatku ŭručaje kopii svaich davierčych listoŭ ministru zamiežnych spraŭ, kab pačać pracu na novym miescy. Zatym pracedura praduhledžvaje ŭručeńnie aryhinałaŭ davierčych listoŭ kiraŭniku dziaržavy. Ale hetyja praviły tyčacca tolki ambasadaraŭ, a dla časovych pavieranych takija pracedury nie praduhledžanyja.
Dženifer Mur — karjernaja dyplamatka
Pierad pryjezdam u Miensk zajmała pasadu namieśnika dyrektara ŭpraŭleńnia pa spravach Paŭdniovaj Eŭropy Dziarždepartamentu ZŠA, jakoje adkazvaje za adnosiny z Tureččynaj, Hrecyjaj i Kipram, paviedamlajecca na sajcie ambasady ZŠA ŭ Biełarusi.
U jaje bahaty vopyt raboty pa eŭrapiejskaj tematycy, i na praciahu bolšaj častki svajoj karjery Mur specyjalizavałasia ŭ pytańniach mižnarodnaha supracoŭnictva i reformaŭ u sfery biaśpieki. Jana taksama pracavała namieśnicaj dyrektara ŭpraŭleńnia Dziaržaŭnaha departamentu pa miratvorčaj dziejnaści, sankcyjach i baraćbie z teraryzmam, daradcaj u palityčnych i ekanamičnych pytańniach ambasady ZŠA ŭ Tyranie (Albanija), na roznych pasadach u palityčnym, vajskova-palityčnym i ekanamičnym adździełach ambasadaŭ ZŠA ŭ Ankary, Sarajevie, Bahdadzie i Džakarcie.
Akramia hetaha, Mur była dziažurnym supracoŭnikam aperatyŭnaha centru Dziarždepartamentu i asystentam pamočnika dziaržsakratara ZŠA ŭ vajskova-palityčnych pytańniach.
Dyplamatka nia raz atrymlivała najvyšejšyja hanarovyja ŭznaharody Dziarždepartamentu. Vyvučała rasiejskuju, tureckuju, serbskacharvackuju, albanskuju i indanezijskuju movy.
Dženifer Mur naradziłasia ŭ štacie Džordžyja i skončyła Technalahičny instytut štatu, atrymaŭšy stupień bakalaŭra i mahistra mižnarodnych adnosin, a taksama mahistra publičnaj palityki.
Prapahandystka ANT Natalla Stelmach źmianiła imia na Naci Ryšna i zarablaje ŭ Mieksicy na šamanach i narkatyčnych hrybach27
Kamientary