U Biełarusi zapuścili prajekt #damazručnajaŭpobycie, jaki demanstruje dyskryminacyju žančyn
«Damy zručnyja ŭ pobycie» («damy udobnyje v bytu» pa-rusku). Heta fraza była napisana adnym z žurnalistaŭ «SB» u dačynieńni da žurnalistak, zatrymanych pa spravie «BiełTA».
Možna było b prosta nie źviarnuć na jaje ŭvahu, ale takoje aznačeńnie pracy žurnalistak, prafiesijanałaŭ svajoj spravy, vychodzić daloka za miežy dadzienaj situacyi.
«U biełaruskim hramadstvie i miedyja niaredkija vypadki, kali arhumienty, jakija apielujuć da miesca žančyny ŭ hramadstvie, a dakładniej jaje miesca «na kuchni», časta vykarystoŭvajucca ŭ jakaści acenki prafiesijnych dziejańniaŭ žančyn u publičnaj prastory. Praca žančyny-žurnalistki, mastački, kiraŭnicy akazvajecca źviazanaj z hiendarnymi charaktarystykami. Meta prajekta #damazručnajaŭpobycie — krytyčnaje asensavańnie situacyi niaroŭnaści žančyn i mužčyn u biełaruskim hramadstvie, pradstaŭlenaja na roznych uzroŭniach: ad moŭnaha (kali adny sacyjalnyja subjekty dazvalajuć sabie ŭ dačynieńni da inšych aznačeńni ź sieryi «małpa z hranataj», «viekavucha» ci «zručnaja ŭ pobycie dama»), tak i ekanamična (kali zarobki mužčyn i žančyn na adnych i tych ža pazicyjach adroźnivajucca)», — nazyvajuć mety prajekta arhanizatary: Hanna Karpienka, Antanina Ściebur, Hanna Samarskaja, Siarhiej Hudzilin, Andrej Ścieburaka, Maja Staravojtava i Liza Kapčykava.
Jak źbirajucca pracavać z hetaj temaj? Kirunkaŭ budzie niekalki.
Pa-pieršaje — raspaŭsiudžvać partrety viadomych žančyn, bieź jakich niemahčyma ŭjavić sučasnuju Biełaruś. Alena Aładava, Ałaiza Paškievič, Viera Jermałajeva i inšyja asoby stajali la vytokaŭ revalucyjnych ekanamičnych reformaŭ, stvarali muziei, vydavali knihi i ŭdzielničali ŭ roznych palityčnych ruchach.
Pa-druhoje, davodzić da ludziej ličby, jakija pakazvajuć sacyjalnaje i ekanamičnaje stanovišča žančyn u Biełarusi.
Stvaralniki prajekta buduć drukavać płakaty i paštoŭki ź infarmacyjaj pra toje, jak mała žančyn zajmajuć pasady rektaraŭ VNU, a kolki pry hetym kožny dzień ciahnuć na sabie chatniuju haspadarku, bo tak «pryniata».
Kamientary