Apublikavana videa ŭdaru izrailskaj armii pa budynku navukovaha centra ź jadziernym reaktaram ŭ siryjskaj pravincyi Dejr-ez-Zor, paviedamlaje Newsru.co.il.
Sakretnaja apieracyja pad nazvaj «Pa-za šabłonami» była praviedziena ŭ noč na 6 vieraśnia 2007 hoda. Pra jaje paviedamlała zachodniaja presa, adnak izrailskija ŚMI nie mahli publikavać detali. 21 sakavika 2018 hoda z hetaj apieracyi byŭ źniaty hryf sakretnaści ŭ Izraili i jaje detali apublikavali.
U noč na 6 vieraśnia 2007 hady izrailskija samaloty atakavali abjekt u rajonie Dzir az-Zura, u 450 km na poŭnač ad Damaska, i źniščyli jaho. Adznačajecca, što reaktar byŭ na etapie zaviaršeńnia jaho budaŭnictva.
Čatyry samaloty F-15 i čatyry samaloty F-16 byli padniatyja z baz «Chacerym» i «Ramon». Jany pralacieli ŭ bok Mižziemnaha mora i ŭziali kurs na poŭnač, ŭzdoŭž ŭźbiarežža, zatym paviarnuli na ŭschod u bok miažy pamiž Turcyjaj i Siryjaj.
Paśla 0.40 pa siryjskim jadziernym abjekcie byli vypuščanyja rakiety. Ahulnaja masa skinutych bojeprypasaŭ kala 24 ton. Reaktar byŭ całkam razburany.
Vajskovaja pres-słužba pryvodzić kamientary byłoha načalnika hienštaba Habi Aškienazi i ciapierašniaha načalnika hienštaba Hadzi Ajzienkota, jakija adznačajuć, što jadzierny prajekt u Siryi ŭjaŭlaŭ pahrozu nie tolki dla Izraila, ale i dla ŭsiaho rehijonu. Izrailskaje kamandavańnie nahadvaje, što praź niekalki hadoŭ paśla hetaj apieracyi rajon Dzir az-Zur byŭ zachopleny bajevikami «Isłamskaj dziaržavy», i jadzierny abjekt moh apynucca pad ich kantrolem.
Kamientary