U Kitai znajšli zapiačatany zban ź nieviadomaj vadkaściu ŭzrostam 2000 hadoŭ
U Kitai znajšli vadkaść uzrostam bolš za 2000 hadoŭ, paviedamlaje china.org.cn. Zapiačatany zban byŭ znojdzieny ŭ pachavańni epochi dynastyi Cyń, jakaja praviła krainaj z 226 pa 207 hady da našaj ery. Dakładna byłoje pryznačeńnie vadkaści pakul nie vyśvietlili.
Dynastyju Cyń zasnavaŭ praviciel adnajmiennaha carstva In Čžen (259—210 hady da našaj ery). Da 221 hoda jon zavajavaŭ astatnija dziaržavy ŭnutranaha Kitaja i pačaŭ kiravać abjadnanaj impieryjaj pad imiem Cyń Šychuandzi.
Stalica dziaržavy Cyń znachodziłasia na terytoryi sučasnaj pravincyi Šeńsi ŭ centry krainy. Niadaŭna pry raskopkach pachavańnia byłoha žychara impieryi, archieołahi znajšli zapiačatany bronzavy zban, a ŭ im — kala 300 mililitraŭ małočna-biełaje vadkaści.
Padčas papiaredniaha analizu jaje składu daśledčyki vyjavili soli hłutaminavaje kisłaty, tamu vyrašyli, što heta byŭ likior abo vino, jakoje atrymlivali z dapamohaj fiermientacyi.
Akramia nieviadomaje vadkaści, archieołahi znajšli ŭ pachavańni bronzavy mieč daŭžynioj kala 60 santymietraŭ. Pasiaredzinie była zroblenaja vaśmihrannaja ŭstaŭka, jakaja, vidać, pavialičvała efiektyŭnaść zbroi. Jašče byŭ znojdzieny nižni ščyt čarapachi daŭžynioj 14 santymietraŭ, usiaredzinie jakoha zastalisia ślady ad udaraŭ, a pa krai — abharełyja vobłaści. Jak miarkujecca, jaho vykarystoŭvali padčas varažby dla suviazi z duchami.
Niadaŭna ŭ staražytnaj stalicy impieryi Cyń vyjavili ruiny administracyjnaha budynka, jaki moh być departamientam muzyki: pry raskopkach archieołahi znajšli ijerahlifičnyja nadpis «Departamient muzyki Paŭnočnaha pałaca» i frahmienty kamiennych zvanoŭ, jakija ŭ staražytnym Kitai słužyli ŭdarnymi instrumientami.
Kamientary