U centry Kijeva ad parku imia Tarasa Šaŭčenki startuje «Šeście z pachodniami» ŭ honar 109-j hadaviny z dnia naradžeńnia Ściapana Bandery, piša Ukrainskaja praŭda.

Udzieł u maršy biaruć niekalki tysiač čałaviek, ale ŭ hetym hodzie ŭdzieł u maršy ŭziało mienš ludziej, čym letaś.

Arhanizatarami padziei źjaŭlajucca nacyjanalistyčnyja abjadnańni «Svaboda», Pravy siektar i Nacyjanalny korpus.

Jak paviedamili arhanizatary mierapryjemstva, u hetym hodzie marš projdzie pad łozunham «Za słavu hierojaŭ, za budučyniu dziaciej!».

Ściapan Bandera byŭ stvaralnikam Arhanizacyi ŭkrainskich nacyjanalistaŭ, što ŭ 1930—50-ja hady viała ŭzbrojenuju baraćbu za niezaležnaść Ukrainy. Banderu ŭdałosia zrabić niezaležnicki ruch papularnym.

Postać Bandery vyklikaje rezkaje nieprymańnie ŭ Rasii, bo jon arhanizavaŭ masavy i paśpiachovy ŭzbrojeny supraciŭ savietam. 

Ukrainskija ž historyki ŭ acency Bandery padzialilisia. Nacyjanalisty i dziaržaŭniki vysoka aceńvajuć jahonuju postać, libierały i levyja staviacca da jaho niehatyŭna.

Z adnaho boku, jon uznačaliŭ uzbrojenuju baraćbu za niezaležnaść Ukrainy spačatku suprać palakaŭ, paśla — proci nacystaŭ i savietaŭ. Z druhoha boku, jahonaja arhanizacyja vykarystoŭvała terarystyčnyja mietady. U vajnie suprać palakaŭ AUN raspaŭsiudziła teror na mirnaje nasielnictva.

U pieryjad da 1941 hoda AUN supracoŭničała ź niamieckimi nacystami. Adnak niemcy adpravili kiraŭnikoŭ AUN, u tym liku Banderu, u kancłahier, kali tyja 30 červienia 1941 hoda abviaścili Ukrainu niezaležnaj.

Raspaŭsiudžany fejk, što heta banderaŭcy palili vioski ŭ Biełarusi. Jon nie adpaviadaje histaryčnaj praŭdzie: Bandera na toj momant užo byŭ aryštavany nacystami. U źniščeńni Chatyni dy inšych zładziejstvach razam z esesaŭcami ŭdzielničali kałabaranckija padraździaleńni, składzienyja z pradstaŭnikoŭ roznych nacyjanalnaściej. U ich uvachodzili, pieravažna, byłyja savieckija vajennapałonnyja, pastaŭlenyja pierad vybaram: abo hałodnaja śmierć u łahiery, abo słužba nacystam.

Banderu ŭ 1959 zabiŭ ahient savieckaha KHB, jaki z časam raskajecca ŭ svaim učynku i pierabiažyć na Zachad.

Prezident Juščanka nadaŭ Banderu zvańnie Hieroja Ukrainy. Janukovič hety ŭkaz admianiŭ.

Ukrainskija nacyjanalisty ŭšanoŭvajuć čyrvona-čorny ściah AUN pobač ź dziaržaŭnym, žoŭta-błakitnym.

Pravanacyjanalistyčnyja partyi ciapier nabirajuć istotny pracent hałasoŭ nie tolki na zachadzie — kałyscy AUN, ale i ŭ centry krainy. Nacyjanalistyčnyja idei atrymali novaje raspaŭsiudžańnie va Ukrainie ŭ adkaz na zachop Rasijaj Kryma i častki Danbasa ŭ 2014-m. Upieršyniu za časy niezaležnaści Banderu stali masava ŭšanoŭvać taksama va ŭkrainskich siłavych strukturach.

Na Majdanie Niezaležnaści maje adbycca vieča.

Клас
0
Панылы сорам
0
Ха-ха
0
Ого
0
Сумна
0
Абуральна
0