«Ranišniki ŭ nas biaspłatnyja». Dyrektar maładziečanskaj škoły pra canu kvitka na śviata
U internecie źjaviłasia infarmacyja: u škole №14 horada Maładziečna za ŭvachod na navahodnija ranišniki vyrašyli zrabić płatnym. Košt kvitka — 1 rubiel 20 kapiejek. Situacyja, jak piša «Rehijanalnaja hazieta», aburyła mnohich baćkoŭ. Adnak, jak patłumačyła TUT.BY dyrektar navučalnaj ustanovy Kalina Kapuckaja, usie ranišniki ŭ škole biaspłatnyja. Rubiel dvaccać kaštuje bilet na śpiektakl «Złydnin Novy hod», jaki vučni i piedahohi padrychtavali ŭ ramkach biznes-kampanii.
— U nas u škole pracuje biznes-kampanija, kali my vučym dziaciej pradprymalnictvu, — tłumačyć situacyju Kalina Kapuckaja. — Jany asvojvajuć niejkuju prafiesiju i mohuć zarabić.
Naprykład, junyja akciory rychtujuć śpiektakl, na jaki pradajucca bilety. Paźniej dzieciam za vystup budzie zarobak. Pry hetym cana kvitka, kaža dyrektar, vyznačajecca prejskurantam cen, praličanych adździełam adukacyi.
— Śpiektakl «Złydnin Novy hod» my chacieli pakazać na zimovych kanikułach, — praciahvaje surazmoŭca. — Jon dadatkovy. I pryjści na jaho dzieci i baćki mahli pa žadańni. Da ranišnikaŭ jon nijakaha dačynieńnia nie maje. Zaraz my rychtujem vosiem ranišnikaŭ dla pačatkovaj škoły, zabaŭlalnuju prahramu dla 5-8 kłasaŭ, i navahodniaje pradstaŭleńnie dla 9-11 kłasaŭ — i ŭsio heta i dla dziaciej, i dla baćkoŭ biaspłatna.
Pa słovach dyrektara, błytanina z ranišnikami i śpiektaklami vyjšła vypadkova.
— U internecie źjaviłasia infarmacyja, što śpiektakl kaštuje rubiel dvaccać, — raspaviadaje Kalina Kapuckaja. — Mianie nabraŭ karespandent, ja patłumačyła: heta košt kvitka na śpiektakl. Ale, akazałasia, što my havaryli pra roznyja rečy. Chaču skazać, «Złydnin Novy hod» — pieršy śpiektakl, jakija my płanavali pakazać płatna ŭ ramkach biznes-kampanii. U vyniku jon, jak i ŭsie navahodnija mierapryjemstvy, budzie biaspłatnym.
Kamientary