Choć da kanca śniežnia jašče zastajecca krychu času, ahladalniki pop-kultury ŭžo pačali stvarać ahlady dobraha i błahoha, što było stvorana zachodnim kiniematohrafam sioleta. Časopis «Rolling Stone» vyrašyŭ zaniacca kinaparazami — nie abaviazkova ŭ finansavym vymiareńni, ale jak minimum z punktu hledžańnia kinakrytykaŭ.
Na dziasiatym miescy — «The Emoji Movie», historyja nadumanaha ŭzajemadziejańnia ikonak emocyj, što žyvuć unutry smartfona, litaralna razhromlenaja krytykami. Zvyčajnyja ž hledačy nie padzialili ichnaha skieptycyzmu — i film za niekalki miesiacaŭ naźbiraŭ u śviecie ŭžo $216 miljonaŭ pry biudžecie $50 młn.
Na dziaviatym — «Suburbicon». Pavodle krytykaŭ, filmu nie dapamoh ani scenar bratoŭ Koenaŭ, ani režysura Džordža Kłuni. Jany nazvali stužku «rasčaravańniem hoda». Satyra na «amierykanskuju maru» kanca piacidziesiatych sabrała ŭ prakacie tolki piatuju častku z vydatkavanych na jaje stvareńnie $25 młn.
Vośmaje miesca zaniała stužka «Daddy's Home 2», jakuju krytyki nazvali «jak nie treba zdymać kamiedyi pra Novy hod». Adnak hledačy dapamahli stvaralnikam adbić biudžet sa stopracentnym bonusam — u śviecie film zarabiŭ užo $118 młn.
Siomy radok zajmaje «sproba ŭvajści druhi raz u raku «Piataha elemientu» mocna razbaŭlenaha «Avataram» — treš-fantastyka «Valerian and the City of a Thousand Planets». «Kali b nie Rianna, było b ciažka pradracca praz hetyja 137 chvilin sumnaha tumana» — napisali krytyki — i znoŭ zastalisia ŭ mienšaści: hihancki biudžet u $177 młn filmu Luka Biessona užo viarnuŭsia ŭ prakacie z horkaju ŭ paŭsotni miljonaŭ.
«The Mountain Between Us» z šostaha miesca nazvali «najbolš depresiŭnym, blakłym filmam pra kachańnie z nulavoj chimijaj». Tym nie mienš — «narodu padabajecca», film akupiŭ svoj niemały biudžet u $35 miljonaŭ. Moža praz muzyku Ramina Džavadzi — kampazitara sieryjału «Hulnia tronaŭ»?
Acenka krytykami sikveła «The Mummy» ź piataj pazicyi pačynajecca sa słovaŭ «što robić Tom Kruz, kab chutčej źniščyć svaju karjeru». Ale hety sposab źniščeńnia pracuje — niahledziačy na toje, što praciahaŭ «mumijnaj» sieryi stvaralniki bolš abiacali nie zdymać, film zarabiŭ hihanckija $409 miljonaŭ.
A voś film z čaćviertaha miesca staŭ realnaj finansavaj katastrofaj — niahledziačy na prysutnaść u im Natali Portman i Majkła Faśbiendera, «Song to Song» Terensa Malika ledź pierasiahnuŭ miljon u prakacie pa ŭsim śviecie. Štości ŭ viadomaha režysiora pajšło nie tak — kino nie spadabałasia ani krytykam, ani navat hledačam.
Pierad nami trojka «antypryzioraŭ» sioletniaha kina pavodle mierkavańniaŭ krytykaŭ časopisu «Rolling Stone», a na bronzavaj pazicyi antypjedestału — »Fifty Shades Darker». Pieršuju častku hetaha filmu ŭ Vielikabrytanii niadaŭna pryznali najbolš panyłym filmam usich časoŭ. A nakont praciahu krytyki napisali»: «jak možna było zrabić takoje sumnaje vidovišča z ekstatyčnych ruchaŭ pryhožych ciełaŭ?» I dadali naprykancy: «Knižka E.Ł. Džejmsa była lepšaj». Na zarobkach filmu hetyja słovy nie adbilisia anijak: $388 młn.
Druhi radok antyfilmaŭ pavodle krytykaŭ zajmaje «The Dark Tower». Najbolšaja pretenzija da stvaralnikaŭ scenara — z aryhinalnaha Styviena Kinha ŭ filmie nie zastałosia amal ničoha. Stužku nazvali padručnikam taho, jak nie treba ekranizavać litaraturnyja tvory. Ale heta nie pieraškodziła filmu zarabić $111 miljonaŭ.
Hučać fanfary z mocna mietaličnymi notkami — na pieršym miescy antyrejtynhu za 2017 hod «Transformers: The Last Knight». Krytyki zaklikajuć usiu publiku, u jakoj jašče zastalisia mazhi paśla prahladu minułych sieryj kałatušačnaj sahi, pajści šlacham Marka Ŭołbierha, jaki abiacaŭ publična, što bolej nikoli nie zdymiecca ŭ anivodnym ź sikvełaŭ, prykviełaŭ ci śpin-ofaŭ kansiervavaj franšyzy. Publika jahonaj klatvy nie pačuła: film u prakacie zarabiŭ užo try svaje biudžety: $605 młn.
Kamientary