U supołcy ŭniviersiteta MITSO (były Mižnarodny instytut pracoŭnych i sacyjalnych adnosinaŭ) u sacyjalnaj sietcy «Ukantakcie» źjaviłasia abviestka dla studentaŭ: zapisvacca na prahlad film «Krym», jaki projdzie 26 kastryčnika ŭ Domie Maskvy ŭ Minsku. Na imprezu śpiecyjalna pryjedzie režysior stužki Alaksiej Pimanaŭ.

«Kinakarcina raskazvaje ab histaryčnych padziejach 2014 hoda. Nieviadomyja padrabiaznaści krymskaj viasny i kałasalnyja namahańni pa pieraduchileńni vajennaha kanflikta», — tak apisvajecca film na staroncy MITSO.

Zapis na prahlad adbyvaŭsia va ŭpraŭleńni vychavaŭčaj raboty i moładzievych inicyjatyvaŭ univiersiteta.

Admietna, što «Krym» i Pimienava ŭ Minsk pryvozić arhanizacyja «Ruś maładaja». Taja samaja, jakuju ŭznačalvaje Siarhiej Łušč. My ŭžo padrabiazna pisali pra hetaha piersanaža. Łušč prytrymlivaŭsia nieanacysckich pohladaŭ, byŭ jazyčnikam, zmahaŭsia z «juda-chryścijanskaj akupacyjaj». Ciapier ža jon vystupaje jak raspaŭsiudnik «ruskaj kultury ŭ Biełarusi». Łušč užo pryvoziŭ u Minsk piśmieńnika-čarnasocienca Starykava.

Mastacki film «Krym» — heta ŭsłaŭleńnie anieksii paŭvostrava rasijskimi vajskoŭcami ŭ sakaviku 2014 hoda.

«Bolš podłaj vajny, čym taja, jakaja ciapier idzie ŭ Daniecku, ja nie viedaju. Na svajoj ułasnaj terytoryi vojski ź ciažkaha ŭzbrajeńnia stralajuć pa mirnych ludziach. Kali mužykam treba razabracca, idzicie i raźbiaryciesia: pabudujcie blindažy, akopy, vajujcie na froncie! Ale tut bjuć pa mirnych žycharach, pa svaich suhramadzianach», — kazaŭ Pimanaŭ u adnym ź intervju.

Biełaruskija kinateatry admovilisia brać film «Krym» u prakat, chacia trejlery i demanstravalisia pierad inšymi stužkami.

«Naša Niva» dazvaniłasia da pieršaha prarektara MITSO Alaksandra Płaščynskaha i paprasiła jaho patłumačyć pazicyju VNU.

«My ž budujem demakratyju, tamu majem prava abirać lubyja filmy, jakija chočam. Bačyli, što ŭ Rasii zładzili z nahody vychadu «Macildy»? Nu i što? Heta vybar kožnaha, kali nie choča iści, to niachaj nie idzie. Ja nijakaj pazicyi tut nie zajmaju. My svabodnyja vybirać u ramkach zakona, što hladzieć. Kali heta supiarečyć zakonu, to tady hladzieć nie varta. Nichto nikoha nie prymušaje i nie honić na prahlad», — zapeŭniŭ Alaksandr Płaščynski.

Zrešty, varta adznačyć, što abviestka z supołki MITSO vielmi chutka źnikła.

Treba adznačyć, što rektaram MITSO źjaŭlajecca były pieršy namieśnik kiraŭnika Administracyi prezidenta Stanisłaŭ Kniazieŭ, jaki raniej słužyŭ u orhanach KDB. A adnym z namieśnikaŭ rektara źjaŭlajecca były ministr abarony Leanid Malcaŭ.

MITSO — heta niedziaržaŭny ŭniviersitet, jaki dziejničaje ŭ Minsku ad 1992 hoda. Da hetaha času na bazie ciapierašniaha MITSO dziejničała Vyšejšaja škoła prafsajuznaha ruchu Biełarusi.

***

Na telehram-kanał «Našaj Nivy» možna padpisacca tut.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?