Samaja vialikaja ŭ historyi žaba niekali charčavałasia dynazaŭrami, a ciapier pad pahrozaju źniknieńnia
Žab ciažka ŭjavić u vobrazie žachlivych drapiežnikaŭ, bo bolšaść ź ich jeść nievialikich kazurak i ich ličynak. Ale ŭ dalokim minułym prodak samaj bujnoj sučasnaj žaby navodziŭ sapraŭdny žach navat na dynazaŭraŭ.

Heta samaja vialikaja žaba z tych, jakija ciapier isnujuć. Žaby-halijafy, jakija žyvuć na nievialikaj terytoryi ŭ Afrycy, časam dasiahajuć vahi bolej za 3 kh. I heta nie idzie im na karyść: praź vialikuju kolkaść smačnaha dyjetyčnaha miasa jany źniščajucca z kožnym hodam usio chutčej.
Ale i jany mohuć zdacca niejmavierna małymi na fonie vykapniovaj staražytnaj žaby Beelzebufo ampinga, jakaja nasialała vostraŭ Madahaskar 68 miljonaŭ hadoŭ tamu i źjaŭlałasia prodkam sučasnych žab-halijafaŭ.
Navukoŭcy daŭno padazravali, što pry daŭžyni cieła bolš za sorak santymietraŭ hetaja istota mahła ŭžyvać u ježu dzicianiat dynazaŭraŭ. I voś, hetaja hipoteza atrymała novaje paćviardžeńnie.

Mižnarodnaja kamanda bijołahaŭ praviała sieryju ekśpierymientaŭ z sučasnymi svajakami Beelzebufo ampinga (vielziebufa). Akazałasia, što siła ŭkusu vielziebufa paraŭnalnaja z ukusami bujnych drapiežnikaŭ, takich jak vaŭki i navat samki tyhraŭ.
Siłu ŭkusu, jak paviedamlajecca ŭ pracy, apublikavanaj u časopisie Scientific Reports, daśledčyki vymiarali z dapamohaj dźviuch pakrytych skuraj płaścin, jakija padnosili da mordy samych vialikich žab, pravakujučy na ataku. Vyjaviłasia, što adnosna nievialikija asobiny z šyrynioj hałavy kala 4,5 santymietraŭ, ściskajuć skivicy ź siłaj 30 ńjutanaŭ.
Šlacham raźlikaŭ navukoŭcy vyvieli zaležnaść siły skivic ad pamieraŭ hałavy i vyznačyli, što najbolš bujnyja sučasnyja žaby, u tym liku i žaby-halijafy, kusajuć ź siłaj kala 500 ńjutanaŭ, što supastaŭna z drapiežnymi reptylijami i sysunami, jakija majuć padobnyja pamiery čerapa. Ujavicie, što vam na palec zvaliŭsia hruz vahoj 50 kiłahramaŭ — heta i budzie ekvivalentna ŭkusu ź siłaj 500 ńjutanaŭ.
Supastaviŭšy asablivaści budovy škileta vielziebufa ź jaho sučasnymi naščadkami, kamanda acaniła siłu ŭkusu ŭ nievierahodnyja 2200 ńjutanaŭ!
I hetaha bolš čym dastatkova, kab ź lohkaściu chapać drobnych dynazaŭraŭ, jakim nie paščaściła apynucca niepadalok ad žaby-vielikana, ličać daśledčyki.
Kamientary