U Kitai ŭ turmie pamior łaŭreat Nobieleŭskaj premii miru Lu Siaabo
Kitajski pravaabaronca, łaŭreat Nobieleŭskaj premii miru Lu Siaabo pamior va ŭzroście 61 hoda. Pra heta paviedamiła ahienctva Reuters.
Łaŭreat Nobieleŭskaj premii miru pamior 13 lipienia ŭ klinicy horada Šeńjan na paŭnočnym uschodzie Kitaja.
U Lu vyjavili rak piečani ŭ apošniaj stadyi. Tym nie mienš, kitajskija ŭłady admovilisia vypuścić Lu na svabodu, prosta źmiaścili ŭ špital.
61-hadovy Lu Siaabo — łaŭreat Nobieleŭskaj premii miru 2010 hoda. Jon adziny ŭ historyi łaŭreat, jakomu ŭłady nie tolki nie dazvolili pryjechać na jaje ŭručeńnie, ale i nie dazvolili pieradać jaje praz svajakoŭ.
Lu siadzieŭ u turmie z 2008 hoda, paśla taho jak napisaŭ «Chartyju-08» pa anałohii z češskaj «Chartyjaj-77». Jaho aryštavali za dva dni da publikacyi hetaha dakumienta i asudzili na 11 hadoŭ turmy za «dziejnaść, skiravanuju na padryŭ dziaržaŭnaj ułady». Na Nobieleŭskuju premiju jaho vyłučyli Vacłaŭ Havieł i Dałaj-łama.
Da taho jak stać lidaram hrupy intelektuałaŭ, što patrabavali svabody, Lu pracavaŭ prafiesaram Piekinskaha ŭniviersiteta. Ad 2003 hoda jon niekalki hadoŭ uznačalvaŭ Kitajski PEN-centr. U 1980-ja i 1990-ja jaho aryštoŭvali na adnosna karotkija terminy (paŭhoda, paŭtara hoda, try hady). U 2008-m jaho pasadzili nadoŭha.
Rak u Lu dyjahnastavali na vielmi poźniaj stadyi. Niekalki dziaržaŭ śvietu i šerah viadomych ludziej zaklikali Piekin dazvolić Lu vyjechać na lačeńnie za miažu, adnak ułady admovili. Prafiesara prosta pieraviali z turmy ŭ turemnuju balnicu.
U Kitai mnohija nie vierać, što rak u Lu ŭźnik i chutka raźviŭsia sam saboj. Ludzi taksama adznačajuć, što ŭ hrupy inšych źniavolenych apazicyjanieraŭ amal sinchronna pačalisia prablemy z kryvianym ciskam.
Lu Siaabo nazyvaŭ kitajskuju sistemu biesčałaviečnaj i vystupaŭ za pierachod Kitaja da demakratyi zachodniaha typu, za prava narodu vybirać uładu.
Jahonaja žonka, paetka, mastačka i paplečnica ŭ zmahańni, 56-hadovaja Lu Sia ad 2010 hoda siadzić pad chatnim aryštam.
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary