Adzin z režysioraŭ paradu patłumačyŭ, adkul tam uzialisia ŭnitazy i pralnyja mašyny

Na paradzie 3 lipienia ŭ Minsku była nie tolki vajennaja, ale i hramadzianskaja častka. Hledačam pakazali taniec traktaroŭ, svaju pradukcyju prademanstravali biełaruskija pradpryjemstvy. Kampanija «Kieramin», naprykład, — vanny, rukamyjnicy i ŭnitazy, «Atłant» — ladoŭni i pralnyja mašyny, miasakambinaty — tušonku. Hałoŭny režysior-pastanoŭščyk hramadzianskaj častki śviatočnaha šeścia, mastacki kiraŭnik Maładziožnaha teatra estrady Viačasłaŭ Panin patłumačyŭ, chto vyrašaŭ, što mienavita i jak buduć prezientavać vytvorcy.

Fota z sacsietak

Viačasłaŭ Panin u kamientary TUT.BY zaŭvažyŭ, što zadavoleny tym, jak prajšoŭ parad.

— Vielmi jakasnaja praca była. Adnahałosna ŭsie acanili paśla paradu, usie byli vielmi zadavolenyja. Ja pamiataju pieršyja parady techniki jašče na płoščy Niezaležnaści. My tady stajali i hladzieli na heta markotnaje vidovišča. Heta było 17-20 hadoŭ tamu. Išli adzin za adnym aŭtobusy, tralejbusy, mašyny, panyła išli, nie aformlenyja, tam paru ściažkoŭ tyrčała. A ciapier usio-taki niejkaja kreatyŭnaść źjaviłasia ŭ hetym ruchu. Było cikava hladzieć, — zaŭvažyŭ jon.

Hałoŭny režysior-pastanoŭščyk hramadzianskaj častki šeścia źviarnuŭ uvahu, što sioleta pierad im stajała zadača «pastavić jarkuju-jarkuju kropku ŭ hetym śviatočnym šeści, jakoje składajecca z vajennaha paradu, paradu hramadzianskaj techniki i zaklučnaha numara na 2,5 tysiačy čałaviek».

— Heta pravilna, tamu što hałoŭnaja funkcyja luboha śviata — heta aryjentacyja hramadstva na peŭnyja kaštoŭnaści.

Jon zaŭvažyŭ, što składanaściaŭ u padrychtoŭcy šeścia nie było, ale byli nievialikija arhanizacyjnyja ciažkaści.

— Adny adkazvajuć za ludziej (heta navučalnyja ŭstanovy), inšyja — za kaściumy, mastackaje afarmleńnie robić horad — usio treba sastykavać… Ale ŭsie vydatna pracavali. Kali niešta ŭźnikała, to tut ža ŭsio vypraŭlali.

Režysior kaža: pradpryjemstvy sami vyrašali, jakuju pradukcyju buduć pakazvać. Naprykład, na prahonach unitazaŭ ad «Kieramina» nie było, instalacyja źjaviłasia na samim paradzie.

— Ja navat nie viedaŭ pra heta, heta była ich inicyjatyva. Možna było ŭnitazy i nie vystaŭlać.

— Tam navat joršyk byŭ…

— Heta «Kieramin» ułasnuju inicyjatyvu prajaviŭ. Razumiejecie, u śviatach šmat inicyjatyŭ — za ŭsim nie ŭsočyš… Vyrablajuć jany hetuju pradukcyju, što ŭ hetym strašnaha? Prajechali i zabylisia. U minułaje nie zazirajcie, hladzicie ŭ budučyniu.

Pa jaho słovach, dobra siabie pradstavili vytvorcy małočnaj pradukcyi: «jany zrabili vialikija banki, etykietki». Heta značyć abyhrali i pakazali pradukcyju nie ŭ naturalnym pamiery, a ŭ niekalki razoŭ bolš.

— Kali b byŭ nie naturalny ŭnitaz, a jaho pavialičyli, i tudy zmyvalisia usie našy zahany… Voś heta byŭ by mastacki vobraz.

• 0
• 0
• 0
• 0
• 0
• 0