Jak u Homieli pierasvarylisia architektar, zabudoŭščyk, jaŭrei, dziaržaŭnyja i niezaležnyja ŚMI
Hałoŭnaja dziejnaja asoba — architektar i publicyst Siarhiej Lapin pasprabuje abaranić honar i hodnaść paśla abraz na jaho adras, nadrukavanych u «Homielskaj praŭdzie». Hazieta, u svaju čarhu, pakryŭdziłasia na fotazdymak Siarhieja, dzio jon trymaje adzin z numaroŭ nad śmietnicaj. Treciaja niezadavolenaja piersona ŭ hetaj historyi — zabudoŭščyk, jakomu nie spadabalisia materyjały aktyvista.
Nohi hetaj spravy rastuć jašče z 2008 hoda. Tady pačałasia sprečka ŭładaŭ i historykaŭ Homiela nakont terytoryi na vulicy Sožskaj: pieršyja razam z zabudoŭščykam zachacieli vykarystać jaje dla ŭźviadzieńnia elitnaha šmatpaviarchovika, druhija da hetaha času ŭsimi namahańniami sprabujuć dakazać, što hetaha rabić nielha, bo ŭ ChVIII stahodździ tam znachodzilisia staryja habrejskija mohiłki.
Viasnoj budaŭničaja kampanija TAA «UKB-Dronha» praviała na miescy raskopki, na jakich prysutničali pradstaŭniki harvykankama i miascovaj habrejskaj supołki. Pa vynikach byŭ składzieny akt: usie pahadzilisia, što reštkaŭ mohiłak na miescy znojdziena nie było, i padpisali jaho. Budaŭnictvu znoŭ dali start, a aktyvistaŭ vyśmiejali: maŭlaŭ, navat jaŭrei, jakich tema tyčycca niepasredna, nijakich pretenzij da ziamli nie majuć, a aktyvisty nijak nie supakojacca.
Adnak Siarhiej Lapin, kandydat mastactvaznaŭstva Jaŭhien Malikaŭ dy inšyja aktyvisty Homiela ličać, što raskopki tyja byli fiktyŭnymi, a častka jaŭrejaŭ, što na ich prysutničała, prosta nie choča prablem z uładaj.
Zatoje prablemy napatkali samich aktyvistaŭ. Paśla artykuła Siarhieja «Na skandalnaj budoŭli na vulicy Sožskaj znojdzienyja kostki, ale zabudoŭščyk ich nie zaŭvažaje» jaho pačali ckavać dziaržaŭnyja ŚMI. Tak, adzin z materyjałaŭ aŭtarstva žurnalista Ramana Staravojtava «Budaŭničyja abjekty Homiela pad prycełam internet-pravakataraŭ. Čamu nie siadzicca «lapinym»?» źmiaščaje cytaty-paraŭnańni kštałtu «akuła piara, jakaja sprytna manipuluje hramadskaj dumkaj i trolić praktyčna kožny realizavany dziaržavaj prajekt». Za hetu i inšyja abrazy Siarhiej Lapin i sprabuje praz sud vybić prabačeńni ŭ «Homielskaj praŭdy».
Hazieta, u svaju čarhu, pakryŭdziłasia na fotazdymak Siarhieja, dzie jon trymaje adzin z numaroŭ «HP» nad śmietnicaj, i padała zvarotny pazoŭ. Da kampanii pakryŭdžanych dałučyłasia i budaŭničaja firma, niezadavolenaja tym, jak aśviatlali ich sprobu pabudavać žyły dom na miescy starych habrejskich mohiłak.
Usio heta, miarkuje Siarhiej, robicca pa zamovie źvierchu, kab prystrunić i jaho, i samy paśpiachovy partał Homielskaj vobłaści — «Mocnyja naviny Homiela». Mienavita na placoŭcy «Mocnych navin» Lapin i inšyja historyki drukavali svaje arhumienty suprać budaŭnictva na Sožskaj.
«Kali ŭ hetaj historyi paniasie stratu Gomel.today, budzie vielmi kryŭdna. Spadziajusia, na spraviadlivy sud, jaki zdoleje ŭbačyć, što praŭda na našym baku», — kaža Siarhiej Lapin.
«Naša Niva» budzie trymać u kursie raźvićcia padziej.
Čytajcie taksama: Z «Mocnymi navinami Homiela» sudziacca dziaržaŭnaja hazieta i budfirma, Kuźniacoŭ baicca najhoršaha
«Plavać ja chacieŭ na hety Zachad». Hałasavańnie Łukašenki pačałosia z dvuch prakołaŭ. A voś jakija zajavy jon zrabiŭ2
Kamientary