«Adreahujem vielmi žorstka»: «Junistar» pakaraje viadučaha, jaki pryznaŭsia ŭ ahidzie da biełaruskaj movy
Šoŭmen i radyjoviadučy Kanstancin Kavieryn dniami spravakavaŭ chvalu abureńnia ŭ sacyjalnych sietkach, pryznaŭšysia, što adčuvaje ahidu da biełaruskaj movy.
Pryčynaj jon nazvaŭ kiepskija adnosiny sa školnymi i ŭniviersiteckimi vykładčykami.
Praŭda, hetym sprava nie skončyłasia — u abmierkavańniach svajho dopisa ŭ fejsbuku Kavieryn dazvalaŭ sabie davoli fryvolnyja frazy ŭ dačynieńni ludziej, jakija abaraniali supraćlehłuju pazicyju.
Adzin ź ich — aktyvist BCHD Dzianis Sadoŭski — źviarnuŭsia na radyjo «Junistar», dzie pracuje Kavieryn, z prośbaj razabracca ŭ situacyi.
«Redakcyja niasie poŭnuju adkaznaść za toje, što vykazvajecca viadučym u efiry, a taksama na pa-za efirnych mierapryjemstvach radyjostancyi. A staronka ŭ sacsietkach źjaŭlajecca jaho asabistaj prastoraj, i mierkavańnie, ahučanaje Kanstancinam u fejsbuku, moža nie supadać ź mierkavańniem redakcyi (što i adbyłosia ŭ hety raz), — adkazali jamu z «Junistar».
— My ličym niedapuščalnym chamstva ŭ adnosinach da inšych karystalnikaŭ sacyjalnaj sietki. Pavodziny viadučaha acenieny jak nieprymalnyja. My pryniali zachady, Kanstancin pakarany».
Jakim čynam pakarali viadučaha?
Sam jon nie adkazaŭ na pytańnie «Našaj Nivy», skazaŭšy, što hetaja situacyja jamu abrydła i jon nie choča pra jaje havaryć.
Bolš razhornuty kamientar daŭ prahramny dyrektar radyjo «Junistar» Alaksandr Nalivajka:
«U nas była vialikaja razmova z Kanstancinam, litaralna ranicaj. Kančatkovyja zachady my budziem prymać žorstkija, i datyčać jany ŭ pieršuju čarhu jaho reakcyi na kamienty, jakija ŭźnikli pad dopisam. Ja kažu pra nie vielmi etyčnuju reakcyju na ludziej, jakija vykazvali svaje dumki. A što da samoha dopisa Kanstancina, to dobra kali choć pałova kamientataraŭ dačytali da kanca, dzie pačynajecca pra Horvata. Faktyčna tam dopis nie pra movu, a pra adnosiny vučniaŭ i nastaŭnikaŭ».
Nalivajka zapeŭniŭ, što ŭ efiry «Junistar» byli i zastajucca biełaruskamoŭnyja kampazicyi.
Łukašenka pra punkty propusku na miažy z Polščaj: Dy chaj choć apošni zakryjuć24
Kamientary