Zakupki impartnych praduktaŭ charčavańnia dla ŭstanoŭ adukacyi Minska płanujecca skaracić dla taho, kab zrabić bolš tannymi školnyja abiedy, paviedamlajuć «Minsk-Naviny».
Hetaje pytańnie ŭzdymałasia 23 sakavika na pasiadžeńni Minskaha haradskoha vykanaŭčaha kamiteta. Na pasiadžeńni abmiarkoŭvałasia vykanańnie biudžetu Minska za 2016 hod i realizacyja mier pa vykanańni biudžetu ŭ 2017 hodzie.
«Administracyjami rajonaŭ, kamitetam pa adukacyi nie prymajucca naležnyja miery pa kantroli za źmianšeńniem koštu straŭ», — adznačyŭ namieśnik načalnika hałoŭnaha finansavaha ŭpraŭleńnia Minharvykankama Siarhiej Buračeŭski.
Jon prainfarmavaŭ, što Ministerstvam antymanapolnaha rehulavańnia i handlu Respubliki Biełaruś (MARH) praviedzienyja manitorynhi abjektaŭ hramadskaha charčavańnia va ŭstanovach ahulnaj siaredniaj adukacyi, u chodzie jakich vyjaŭlenyja fakty vykarystańnia pry pryhatavańni straŭ darahich charčovych praduktaŭ, jakija zakuplajucca ŭ handlovych sietkach, a nie ŭ vytvorcaŭ.
«Heta pryvodzić da pavyšeńnia koštu straŭ i nievykanańnia naturalnych normaŭ charčavańnia», — rastłumačyŭ Buračeŭski.
Staršynia Minharvykankama Andrej Šorac daručyŭ vyznačyć pieralik praduktaŭ charčavańnia impartnaj vytvorčaści, jakija mohuć być zakuplenyja dla škoł, bo nie vyrablajucca ŭ Biełarusi, adsutničajuć u suviazi ź siezonnymi asablivaściami abo pa inšych abjektyŭnych pryčynach. Ale faktaŭ zakupki bolš darahich impartnych jabłykaŭ abo cybuli pry najaŭnaści anałahičnaj ajčynnaj płodaaharodninnaj pradukcyi być nie pavinna.
Kamientary