U Minsku projdzie vystava karcin viadomych biełaruskich muzykaŭ
Pieršaja vystava prac biełaruskich muzykaŭ «Muzyka bieź miežaŭ» projdzie ŭ minskaj prastory CECH z 9 pa 19 sakavika. Padzieja zaklikanaja pakazać roznyja hrani samavyražeńnia tvorčaj asoby, a taksama parazvažać nad aktualnaj dla Biełarusi prablemaj svabody tvorčaści i jaje miežaŭ.
Padčas vystavy možna budzie ŭbačyć karciny i malunki Lavona Volskaha, lidara hurta «Krama» Ihara Varaškieviča, hurta «Pałac» Aleha Chamienki, frontmena bresckich pank-zorak «Daj darohu!» Juryja Stylskaha, Andrusia Takindanha (Recha, Harotnica), Hanny Ždanavaj (Lilac), lidara hurta Znich Alesia Taboliča, Siarhieja «Skrypy» Skrypničenki (Žygimont Vaza) i Alaksandra Dziemidzienki (Re1ikt). Usie muzyki hrajuć u roznych stylach, adnak, jak vyśvietliłasia, ich abjadnoŭvaje vyjaŭlenčaje mastactva. Jak zrešty i inšych muzykaŭ śvietu. Malavali nie tolki biełaruskija vakalisty, hitarysty i bubnačy, ale i mnohija suśvietnyja zorki. Džon Lenan, Poł Makartni, Džymi Chiendryks, Dženis Džoplin, Džym Morysan, Sid Baret, Tom Jork, Džoni Keš, Bona, Frenk Sinatra i navat nobieleŭski łaŭreat pa litaratury Bob Dyłan viadomyja ŭ tym liku i svaimi mastackimi pracami. Što natchniaje biełaruskich muzykaŭ u vyjaŭlenčym mastactvie, možna budzie pabačyć ŭ minskaj prastory CECH.
Uvaha! Vystava praciahniecca tolki 10 dzion! Adkryćcio adbudziecca 9 sakavika ŭ 19.00 i budzie supravadžacca sustrečaj z mastakami. Sama ekspazicyja budzie dastupnaja da 19 sakavika.
Uvachod: 1 rubiel — u budni, 2 rubli — u vychadnyja. Čas pracy vystavy: 12.00-22.00.
Juryj Stylski - frontmen bresckich pank-zorak «Daj darohu!». Praha malavać praśledavała jaho ŭsio žyćcio, pačynaŭ malavać u školnych sšytkach, paźniej malavaŭ pryšelcaŭ pad upłyvam kinafilmaŭ i ŭdaskanalvaŭ svaje navyki, nazirajučy za pracaj prafiesijanałaŭ i pravodziačy hadziny z farbami i ałoŭkam. «Hety praces,kali z pustaty na tvaich vačach źjaŭlajecca, skažam, partret, mianie zaŭsiody začaroŭvaŭ!» - kaža Jura. Stylski nie maje prafiesijnaj mastackaj adukacyi i dziejničaje, chutčej, intuityŭna, tamu žartuje, što jaho styl utvaryŭsia ad proźvišča «Stylski». U tvorčaści jak muzyčnaj, tak i vyjaŭlenčaj, Jura nie prytrymlivajecca niejkich miežaŭ, tamu apošnim čynam zadumvajecca, da jakoha nakirunku adnosicca jaho praca. Žyvapis, u adroźnieńni ad muzyki, pahružaje jaho ŭ stan miedytacyi i dapamahaje rassłabicca, «a kali chočacca vyjści z hetaha transu i ŭzbadziorycca, ja biaru ŭ ruki hitaru!», - reziumuje muzyka. U tvorčaści niama miežaŭ, adzinaje, što moža spyniać - adsutnaść žadańnia.
Lavon Volski — adzin z samych upłyvovych biełaruskich muzykaŭ pačaŭ malavać z «samaha-samaha malenstva, hadoŭ z 3-4», a dalej była mastackaja škoła, vučelnia. Vučyŭsia ŭ viadomaha mastaka Siarhieja Katkova. Upłyŭ akazała vialikaja kolkaść ludziej. Usio pačałosia ź impresijanistaŭ, paśla byli postimpresijanisty, avanhardysty, viciebskaja škoła, amierykanskija avanhardysty. Kankretnaha stylu, u jakim pracuje, — niama. «Mahu namalavać i niešta abstraktnaje, a mahu i partret, i navat krajavid», — kaža Lavon i pryznajecca, što časam moža nie malavać ceły hod, a paśla ŭziać i vydać šerah tvoraŭ. «Na stvareńnie i karcin, i piesień natchniaje žyćcio. Adnojčy natchniŭ Adam Hłobus. Ja sustreŭ jaho niejak, a jon pytajecca: «Čamu ty daŭno nie maluješ?» Ja zadumaŭsia, pabieh u kramu, nabyŭ usio nieabchodnaje i namalavaŭ!». «Svaboda tvorčaści nie pavinna ničym abmiažoŭvacca. Svaboda tvorčaści — heta naturalnaje žyćcio. Mnie nichto nie moža vyznačyć, dzie miežy majoj svabody», — reziumuje Volski.
Ihar Varaškievič - lidar słavutaha biełaruskaha bluz-rokavaha hurta «Krama», pa ŭłasnym pryznańni, u školnyja hady jon umieŭ dobra malavać eratyčnyja i navat parnahrafičnyja komiksy, i kali b nie staŭ u vyniku muzykam, to i praciahnuŭ by zajmacca hetym. Raźvivać svoj mastacki talent Ihar jeździŭ z Baranavičaŭ u Niaśviž da svajho pieršaha nastaŭnika, słavutaha mastaka Michasia Sieŭruka, vučnia samoha Fierdynanda Ruščyca! Dahetul na samym bačnym miescy ŭ kvatery Varaškieviča zachoŭvajecca hraviura Sieŭruka «Słuckaja brama». Ciapier Ihar pieravažna zajmajecca kampjutarnaj hrafikaj i maluje šaržy na siabroŭ i znajomych.
Andruś Takindanh viadomy jak aŭtar piesień i frontmen hurtoŭ Recha i Harotnica, z apošnim vystupaŭ na adnym z najbujniejšych oŭpen-ejraŭ Jeŭropy Opener ŭ Polščy. Skončyŭ himnaziju-kaledž mastactvaŭ imia Achremčyka i Biełaruski dziaržaŭny ŭniviersitet kultury. Andruś kaža, što mienavita žyvapis dazvalaje jamu stvarać svoj śviet. Paŭpłyvali na jaho tvorčaść Małyja hałandcy, Mikałaj Sielaščuk i biełaruski ikanapis. Svoj styl Takindanh vyznačaje jak «akademičny insit», a siarod krynic natchnieńnia nazyvaje žanočuju pryhažość, charastvo navakolla, Boha, hvałt i darohi.
Andruś ličyć, što spałučeńnie muzyki i mastactva dazvalaje nie zahaniacca. «Nie zahaniajusia zaduža pa mastactvie, bo jość muzyka i naadvarot. Jany vučać, što ŭ tvorčaści najpierš - tvorčaja ideja, vykazvańnie, a žyvapis ci noty - sprava druhaja», - kaža jon.
Miažoj svabody tvorčaści Andruś bačyć tolki prafiesijnuju daskanałaść, jakuju abmiažoŭvajuć čas, cieła i strach.
Siarhiej «Skrypa» Skrypničenka — zasnavalnik, hitaryst, vakalist, aŭtar tekstaŭ i muzyki hurta žygimont VAZA. Jaho mastacki talent, badaj, byŭ pradvyznačany ŭžo na hienietyčnym uzroŭni. Baćka Siarhieja — viadomy mastak-siurrealist Hieorhij Skrypničenka. «Skrypa» vučyŭsia ŭ mastacka-restaŭracyjnaj vučelni ŭ Miry, Biełaruskaj akademii mastactvaŭ. Razam z žonkaj, dyzajnieram Julijaj Hałavinoj, zasnavaŭ dyzajnierski łejbł «Tank Press». Azdablaŭ dyski biełaruskich vykanaŭcaŭ. A da 600-hodździa bitvy pad Hrunvaldam vydaŭ kalekcyjnuju kałodu kart.
Aleś Tabolič - niaźmienny lidar viadomaha biełaruskaha pehan-mietał-hurta Znich i syn mastakoŭ-žyvapiscaŭ Maryi i Ryhora Taboličaŭ, što i abumoviła jaho zachapleńnie hetym vidam mastactva. Aleś pierajmaŭ vopyt baćkoŭ, a paśla vučyŭsia ŭ škole-internacie pa muzycy i vyjaŭlenčym mastactvie imia Achremčyka i skončyŭ fakultet dyzajnu Biełaruskaj dziaržaŭnaj akademii mastactvaŭ. U svoj čas na jaho paŭpłyvała tvorčaść Dziurera, Rerycha i mnohich inšych mastakoŭ. Aleś Tabolič taksama viadomy jak majstar tatu, adzin z pačynalnikaŭ płyni biełaruskaj arnamientalnaj tatuiroŭki.
«Usia maja tvorčaść, muzyka, dyzajn, žyvapis, tatu prasiaknutaja luboŭju da rodnaj Ziamli dy etnasu, falkłoru i tradycyj - taho, čym mohuć hanarycca Biełarusy», - raspaviadaje Aleś. I jaho karciny całkam adpaviadajuć hetamu pryznańniu.
Hanna Ždanava atrymała viadomaść jak zahadkavaja vakalistka hurta Lilac, kali joj było 17 hadoŭ, a malavać pačała ź piaci. Ličyć, što dla jaje heta sposab vyzvalić enierhiju praz končyki palcaŭ, i kaža, što akurat lubimyja mastaki paŭpłyvali na jaje tvorčaść najmienš - dziaŭčyna myślić abstraktnymi vobrazami i miarkuje, što jaje styl možna nazvać dziŭnaj formaj impresijanizmu: «kali ja tranśluju z hałavy - heta kisłotny siur, niepraparcyjny, niesfaramavany i dziki», - kaža jana.
«Svaboda tvorčaści pavinna abmiažoŭvacca peŭnaj etykaj - tam, dzie ty vyražaješ siabie, ale nie parušaješ miežy inšych», - miarkuje Hanna.
Alaksandr Dziemidzienka, niaźmienny bubnač hurta Re1ikt, choć i nie ličyć siabie mastakom, ale malavać lubiŭ usio žyćcio. Užo ŭ čatyry hady vyjaviŭ svaju babulu ź dziadulem, jakija plali košyki. U školnyja hady zabaŭlaŭsia komiksami. «Ja atrymlivaju radaść, kali niešta kremzaju na papiercy ci ŭ fatašopie. Prosta akt tvorčaści dziela tvorčaści. Miedytacyja. Kali ja niešta pačynaju malavać, ja nie dumaju pra toje, što musić atrymacca», — kaža Alaksandr. Jak u muzycy, tak i ŭ mastactvie jon lubić cikavyja spałučeńni i ekśpierymienty, a svoj styl vyznačaje jak «Zuihitsu ŭ vyjaŭlenčym mastactvie». Patreba ŭ malavańni źviazanaja i z muzyčnaj dziejnaściu. Alaksandr zajmajecca azdableńniem roznych rečaŭ dla hurta Re1ikt: mierč, dyski, afišy.
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary