U atačeńni makułaturnych stosaŭ, ź vidam na «hory» palihona «Paŭnočny», hałoŭnaha minskaha śmietnika, staličny bamond zaviaršyŭ Hod kultury. Simvaličnuju viečarynku ŭ žyvapisnym miescy zładziła art-hrupa pad kiraŭnictvam mastaka i art-dziejača Rusłana Vaškieviča.
Na śviatkavańnie kanca Hoda kultury pryjechaŭ ceły aŭtobus: mastaki, muzykanty, žurnalisty, kuratary, krytyki…U admysłovym zakutočku punkta pierapracoŭki syraviny ich čakaŭ nakryty navahodni stoł. Za muzyčnaje supravadžeńnie adkazvaŭ hurt «Ružovaje hieta».
«Skłałasia adčuvańnie, što ŭ hetym hodzie (małpy) ludzi kulturnaj śfiery asabliva časta atrymoŭvali papiarovyja aplavuchi ad čynoŭnikaŭ i biurakrataŭ. I kali vypraŭlać u apošni šlach hety hod makułatury — to tolki ŭ punkcie zdačy i pierapracoŭki druharazovaj syraviny la padnožža samaj bujnoj śmietnicy krainy», — tak hučaŭ hałoŭny pasył akcyi, aformleny ŭ zaprašeńni.
«Miarkuju, što heta miesca najlepšym čynam adlustroŭvaje kanflikt, jaki adbyvajecca pamiž našymi čakańniami, žadańniami i realnaj situacyjaj, što składvajecca», — prakamientavaŭ sutnaść mastackaha žestu Rusłan Vaškievič. Razam z tym mastak padkreśliŭ i aptymistyčny pasył, taksama zakładzieny ŭ kantekst, — kali śmiećcie stanovicca syravinaj dla čahości novaha.
Hod kultury ŭ pieršuju čarhu zapomniŭsia chvalaj aptymizacyi (skaračeńniaŭ) rabotnikaŭ kultury, uviadzieńniem źniavažlivaj pracedury vydačy siertyfikataŭ, jaki paćvierdžaje status tvorčaha rabotnika. Taksama ŭ 2016 hodzie byŭ padpisany Kodeks ab kultury, jaki robić bolš žorstkim kantrol za kulturnaj śfieraj.
«Ja pavinien pazvanić našamu kurataru». Jak zavozili mihrantaŭ u Biełaruś — cikavyja detali ź pierachoplenych telefonnych razmoŭ4
Kamientary