Prajekt normaŭ miedycynskaj etyki, dzie daktaram zabaraniałasia demanstravać relihijnyja simvały, adpravili na dapracoŭku
Padrychtavany Ministerstvam achovy zdaroŭja prajekt normaŭ miedycynskaj etyki i deantałohii, jaki vyklikaŭ rezkuju krytyku z boku relihijnych dziejačaŭ, adpraŭleny na dapracoŭku, paviedamlaje BiełaPAN.
Pres-słužba Ministerstva achovy zdaroŭja 27 śniežnia apublikavała na aficyjnym sajcie ministerstva reliz, u jakim paviedamiła, što prajekt dakumienta daterminova źniaty z abmierkavańnia i adpraŭleny na dapracoŭku, i padziakavała ŭsim udzielnikam hramadskaj dyskusii za prajaŭlenuju cikavaść. Pieršapačatkova płanavałasia, što abmierkavańnie dakumienta budzie doŭžycca da 29 śniežnia.
«Prapanovy i zaŭvahi, jakija pastupili ŭ Ministerstva achovy zdaroŭja Respubliki Biełaruś, pryniatyja pad uvahu, — havorycca ŭ paviedamleńni. — Hramadskaje abmierkavańnie pa prajekcie pastanovy «Ab zaćviardžeńni norm miedycynskaj etyki i deantałohii» spynienaje ŭ suviazi ź jaho dapracoŭkaj. Pra paŭtornaje hramadskaje abmierkavańnie budzie paviedamlena dadatkova».
Ministerstva achovy zdaroŭja apublikavała prajekt normaŭ miedycynskaj etyki na svaim sajcie ŭ kancy listapada. U hetym dakumiencie vyznačalisia patrabavańni da źniešniaha vyhladu i maniery znosin miedrabotnikaŭ i farmaceŭtaŭ z pacyjentami.
Adzin z punktaŭ dakumienta, jaki abviaščaŭ, što miedrabotnikami «nie dapuskajecca vidavočnaja demanstracyja svajoj relihijnaj prynaležnaści, adkrytaje našeńnie relihijnych znakaŭ i simvałaŭ», vyklikaŭ rezkuju krytyku z boku relihijnaj supolnaści.
U pryvatnaści, kiraŭnik Kanfierencyi katalickich biskupaŭ Biełarusi, mitrapalit Minska-Mahiloŭski arcybiskup Tadevuš Kandrusievič na pres-kanfierencyi 22 śniežnia ŭ Minsku nazvaŭ zabaronu na adkrytuju demanstracyju relihijnych znakaŭ i simvałaŭ miedrabotnikami dyskryminacyjaj viernikaŭ.
«Heta značyć, možna nasić značok prynaležnaści da partyi i hramadskaj arhanizacyi, a relihijny znak — nie, — aburyŭsia katalicki ijerarch. — U nas rekłamujuć piva, pracujuć kazino, a vy viedajecie, kudy pryvodziać usie hetyja adnarukija bandyty, a relihijny znak, značyć, nasić nielha!.. Heta nie što inšaje jak dyskryminacyja viernikaŭ. Spadziajusia, hetyja normy buduć źmienienyja».
Akramia taho, mitrapalit Minski i Zasłaŭski Pavieł, patryjaršy ekzarch usiaje Biełarusi, 24 śniežnia nakiravaŭ ministru achovy zdaroŭja Vasilu Žarko list, u jakim paviedamiŭ, što toj ža punkt ab adkrytaj demanstracyi relihijnych simvałaŭ miedrabotnikami «vyklikaŭ rezanans i burnuju dyskusiju siarod duchavienstva i viernikaŭ Biełaruskaj pravasłaŭnaj carkvy».
Pravasłaŭny ijerarch paviedamiŭ čynoŭniku, što na pasiadžeńni 13 śniežnia členy sinoda BPC adnahałosna vykazalisia za toje, što nieabchodna dabicca vyklučeńnia hetaj normy z prajekta dakumienta.
«My zhodnyja z tym, što miedycynskija rabotniki pavinny prytrymlivacca miežaŭ razumnaha ŭ vykarystańni imi relihijnaj simvoliki, kab nie vyklikać u svaich kalehaŭ abo pacyjentaŭ adčuvańnia naviazvańnia im tych ci inšych relihijnych pohladaŭ, — adznačyŭ jon. — Adnak my ličym, što abmierkavańnie naroŭni sa źniešnim abliččam lekara prykmiet jaho relihijnaj prynaležnaści moža pryvieści da nierazumieńnia i złoŭžyvańniaŭ na miescach».
«Uličvajučy tuju akaličnaść, što bolšaść žycharoŭ Biełarusi źjaŭlajucca pravasłaŭnymi pa vieravyznańni, a našeńnie nacielnych kryžykaŭ i zvarot da Boha pierad abrazami źjaŭlajecca naturalnym i nieadjemnym składnikam žyćcia i pobytu biełaruskaha naroda, zhadany punkt prajekta moža spravakavać pratesty viernikaŭ, jak paśladoŭnikaŭ pravasłaŭnaj viery, tak i inšych chryścijanskich kanfiesij. Heta taksama moža pasłužyć źjaŭleńniu ŭ našym hramadstvie niepradkazalnych supiarečnaściaŭ na relihijnaj hlebie», — padkreśliŭ mitrapalit Pavieł.
Kiraŭnik BPC: Zabarona miedykam nasić kryžyki moža spravakavać pratesty viernikaŭ
Kola Łukašenka syhraŭ na rajali na «Dni narodnaha adzinstva». Jaho tata pierad hetym pryhraziŭ Treciaj suśvietnaj vajnoj34
Kamientary