U pasiołku Puciavodnaja Zorka Homielskaha rajona z-za vybuchu pietardy surjozna paciarpieŭ siamikłaśnik, paviedamiŭ BIEŁTA aficyjny pradstaŭnik UUS Homielskaha abłvykankama Ihar Hryškievič.
Chłopčyka dastavili ŭ Homielskuju haradskuju kliničnuju balnicu №1 ŭviečary 27 śniežnia. Daktary kanstatavali ŭ jaho minna-vybuchovuju traŭmu levaj kiści: pierałom pieršaha palca, adryŭ druhoha palca na ŭzroŭni asnovy fałanhi, adkryty pierałom asnoŭnaj fałanhi treciaha palca sa zrušeńniem adłomkaŭ. Akramia hetaha dyjahnastavany rany śpinki nosa i nižniaj traciny levaj halonki.
Supracoŭniki milicyi ŭstanavili, što 13-hadovy školnik uviečary vyjšaŭ na vulicu, kab sustreć svajho siabra. Baćki ŭ hety dzień źjechali ŭ Homiel pa pakupki, pakinuŭšy syna adnaho.
Jak patłumačyŭ sam paciarpieły, jon čakaŭ tavaryša, znajšoŭ na śniezie pietardu i vyrašyŭ jaje padarvać.
Pakul sprabavaŭ padpalić knot, adbyŭsia vybuch. Pačuŭšy vybuch i kryki, prybieh jaho tavaryš, jaki tut ža paviedamiŭ pra zdareńnie svajmu baćku. Darosły adrazu vyklikaŭ chutkuju dapamohu i pasprabavaŭ akazać pieršuju dapamohu.
Kamientary