12:45

Karystalnik Youtube sersed21 apublikavaŭ zapis «apošniaha sieansu suviazi z Tu-154, jaki zvaliŭsia ŭ Čornaje mora ŭ Sočy».

12:39

Vyratavalnyja pracy pad Sočy, tass

Vyratavalnyja pracy pad Sočy, tass

Pryjarytetnaj viersijaj krušeńnia Tu-154 pad Sočy stała viersija «techničnaj niaspraŭnaści». Pra heta «Interfaksu» paviedamiła krynica ŭ ekstranych słužbach.

Jana «vyjšła na pieršy płan», udakładniŭ surazmoŭca. Pavodle jaho słoŭ, pamyłka piłotaŭ «małaimaviernaja» — piłoty mieli «vialiki dośvied kiravańnia pavietranymi sudami takoha typu i značny nalot hadzin». Umovy nadvorja ŭ rajonie krušeńnia taksama byli «spryjalnymi dla vykanańnia palotu», dadała krynica.

Pavodle jaho słoŭ, viersija teraktu «praktyčna vyklučajecca».

Minabarony RF, u svaju čarhu, zajaviła, što samalotam kiravaŭ daśviedčany piłot Raman Vołkaŭ. Jon - lotčyk pieršaha kłasa z ahulnym nalotam bolš za try tysiačy hadzin, padkreślili ŭ viedamstvie, pieradaje TASS.

11:57

Ministerstva abarony Rasii na svaim sajcie apublikavała śpis usich, chto znachodziŭsia na borcie samalota Tu-154, jaki lacieŭ u siryjskuju Łatakiju.

Siarod ich — 64 pradstaŭniki ansambla imia Alaksandrava, dzieviać pradstaŭnikoŭ ŚMI (Pieršy kanał, NTV i telekanał «Źviezda»), vosiem vajskoŭcaŭ, dvoje fiederalnych dziaržaŭnych hramadzianskich słužačych, vosiem členaŭ ekipaža, a taksama vykanaŭčy dyrektar Mižnarodnaj hramadskaj arhanizacyi «Spraviadlivaja dapamoha» Lizavieta Hlinka, bolš viadomaja jak Doktar Liza.

Raniej Pieršy kanał, telekanały «Źviezda» i NTV paćvierdzili, što na borcie Tu-154 byli ich zdymačnyja hrupy.

10:11

Na miescy krušeńnia Tu-154 znojdzieny cieły zahinułych

U Čornym mory na miescy krušeńnia Tu-154 Minabarony RF znojdzienyja cieły niekalkich zahinułych, paviedamlaje «Interfaks» sa spasyłkaj na krynicu.

Pradstaŭnik Minabarony Ihar Kanašenkaŭ paćvierdziŭ vyjaŭleńnie adnaho cieła.

Taksama znojdzienyja dakumienty žurnalistaŭ Pieršaha kanała, piša TASS.

09:02

Minabarony RF paviedamiła, što ŭ Čornym mory znojdzieny abłomki samalota Tu-154, na jakim lacieli ŭ Siryju artysty ansambla imia Alaksandrava (kala 68 čałaviek), i žurnalisty (dzieviać).

Frahmienty korpusa samalota znojdzienyja na hłybini 50-70 mietraŭ za paŭtara kiłamietra ad bieraha.

08:45

Minabarony RF paćvierdziła źniknieńnie samalota. Na borcie znachodziacca 91 čałaviek — 83 pasažyry i vosiem členaŭ ekipaža, paviedamiła viedamstva.

Jak paviedamlaje TASS, na borcie znachodziacca muzyki ansambla imia Alaksandrava, jakija pavinny byli vystupić na aeradromie Chmiejmim z navahodniaj kancertnaj prahramaj, i pradstaŭniki ŚMI.

08:30

Samalot Tu-154, jaki vylecieŭ z Sočy, źnik z radaraŭ, paviedamlaje «Interfaks» sa spasyłkaj na krynicu. Pa dadzienych TASS, samalot naležyć Minabarony RF.

«Interfaks» pieradaje, što bort źnik z radaraŭ, kali vykonvaŭ palot nad Čornym moram. Heta ž ahienctva paviedamlaje, što samalot lacieŭ u Siryju. Samalot vylecieŭ u 05:20 pa Maskvie, i ŭžo praz 20 chvilin dyśpietčary jaho stracili.

Tu-154 prylacieŭ u Sočy z padmaskoŭnaha Čkałaŭska. U Sočy jaho dazapravili.

Pa papiarednich dadzienych, pryčynaj padzieńnia Tu-154 Minabarony RF u Sočy była techničnaja niaspraŭnaść abo pamyłka piłatavańnia, paviedamiła u niadzielu krynica ŭ siłavych strukturach.

«U jakaści asnoŭnych viersij padzieńnia samalota Tu-154 razhladajucca techničnaja niaspraŭnaść pavietranaha sudna i pamyłka ŭ piłatavańni», — skazaŭ surazmoŭca ria.ru.

Ratavalniki znajšli frahmienty samalota i stojku šasi ŭ 6 km ad bieraha ŭ Čornym mory. Pra heta paviedamlaje TASS sa spasyłkaj na krynicu ŭ siłavych strukturach rehijonu.

Samalot Tu-154 amal nie vykarystoŭvajecca hramadzianskaj avijacyjaj. Na im pieravoziać pasažyraŭ tolki avijakampanii «AŁROSA» i «Biełavija». Apošniaja źbirajecca admovicca ad vykarystańnia Tu-154 da kanca hoda. Vytvorčaść samalotaŭ spyniena: apošni byŭ vypuščany ŭ 2013 hodzie i pradadzieny Minabarony RF.

Клас
0
Панылы сорам
0
Ха-ха
0
Ого
0
Сумна
0
Абуральна
0