Žychar Drybina zapatrabavaŭ źniać čyrvonuju zorku z haradskoj kaladnaj jołki, ale jamu admovili
Žychar Drybina zapatrabavaŭ źniać čyrvonuju zorku z haradskoj kaladnaj jołki, adnak ułady Drybinskaha rajona nie bačać palityčnaj padaploki ŭ raźmiaščeńni takoj zorki.
Ilustracyjnaje fota: govorim.by
«Na hałoŭnaj jołcy Drybina ŭmacavanaja nie kaladnaja zorka, a čyrvonaja, savieckaja. Pad hetaj zorkaj byli zakatavanyja tysiačy śviataroŭ i razburanyja tysiačy chramaŭ u saviecki čas. Da taho ž heta bluźnierstva ŭ adnosinach da śvietłaj pamiaci miljonaŭ niavinnych achviar kamunizmu. Jak hramadzianin Respubliki Biełaruś patrabuju pryniać miery pa vypraŭleńni hetaha dzikunstva ŭ našaj šmatpakutnaj dziaržavie na padparadkavanych vam ziemlach», — havorycca ŭ zvarocie Andreja Jurkova da staršyni Drybinskaha rajvykankama Dźmitryja Vasileŭskaha, jaki aŭtar raźmiaściŭ na svajoj staroncy ŭ Facebook.
Čyrvonaja zorka z haradskoj jołki ŭ Drybinie prybranaja nie budzie, niahledziačy na zvarot Jurkova, zajaviła BiełaPAN načalnik rajonnaha adździeła ideałahičnaj pracy, kultury i pa spravach moładzi Alena Rabkaviec. «Ja pahladzieła vielmi šmat litaratury. Naprykład, piacikancovaj čyrvonaj zorkaj ŭpryhožvali jołki ŭ Viflejemie, tam, dzie naradziŭsia Isus Chrystos. Heta pa-pieršaje. Pa-druhoje, zorka ŭ nas słužyć upryhožańniem i nijakaj palityčnaj padaploki nie maje. Pa-treciaje, ja pahladzieła kuču materyjałaŭ z roznych abłasnych, rajonnych centraŭ, dzie jość takija zorki», — skazała hałoŭny rajonny ideołah. Jana adznačyła, što ŭ Drybinie naohuł ŭpieršyniu ŭstanoŭlenaja haradskaja jołka — «sučasnaja, pryhožaja».
«Mnie padabajecca, i ja źviazvaju jołku, jak, naprykład, pakaleńnie maich adnahodkaŭ, mienavita z čyrvonaj zorkaj», — zajaviła čynoŭnica. Razam z tym Rabkaviec paabiacała, što rajvykankam prymie ad Jurkova ŭ jakaści sponsarskaj dapamohi tuju zorku, jakuju jon chacieŭ by bačyć na kaladnaj jołcy.
Kamientary