U miežach pahadnieńnia ab partniorstvie ŭ śfiery mabilnaści Jeŭrasajuz dapamoža Biełarusi ŭ stvareńni centraŭ utrymańnia mihrantaŭ, paviedamiŭ na pres-kanfierencyi 16 śniežnia ŭ Minsku kiraŭnik pradstaŭnictva Mižnarodnaj arhanizacyi pa mihracyi (MAM) u Biełarusi Ziejnał Hadžyjeŭ.
Mienavita MAM vystupić adnym z asnoŭnych udzielnikaŭ prajekta, što startuje ŭ 2017 hodzie, skazaŭ jon.
«Paśla padpisańnia pahadnieńnia ab mabilnaści pamiž Biełaruśsiu i ES našy daŭnija napracoŭki, idei ab raspracoŭcy maštabnaha prajekta pa praduchileńni nielehalnaj mihracyi stali realnaściu. Zaraz my pracujem nad prajektam, jaki achoplivaje vielmi šyrokija śfiery», — adznačyŭ Hadžyjeŭ.
Novy prajekt praduhledžvaje infrastrukturnuju padtrymku stvareńniu niekalkich centraŭ pryjomu i ŭtrymańnia mihrantaŭ u miežach readmisii. Centry pavinny adpaviadać usim mižnarodnym standartam u hetaj halinie, padkreśliŭ pradstaŭnik arhanizacyi.
Druhi kampanient prajekta analityčny — zamiežnych ekśpiertaŭ płanujecca pryciahnuć u tym liku da raspracoŭki novaj nacyjanalnaj kancepcyi mihracyjnaj palityki Biełarusi.
Biełaruś i Jeŭrasajuz padpisali pahadnieńnie ab partniorstvie ŭ śfiery mabilnaści 13 kastryčnika ŭ Luksiemburhu. Prajekt «Partniorstva dla mabilnaści» realizujecca ŭ Bałharyi, Rumynii, Polščy, Vienhryi, Finlandyi, Łatvii i Litvie. Na siońnia takija pahadnieńni ŭ ES dziejničajuć z Małdovaj (2008), Kaba-Vierde (2008), Hruzijaj (2009), Armienijaj (2011), Azierbajdžanam (2013 hoda), Maroka (2013 hoda), Tunisam (2014) i Iardanijaj (2014). «Partniorstva dla mabilnaści» daje hnutkija ramki, jakija nie majuć abaviazkovaj jurydyčnaj siły, dla taho, kab kiravańnie pieramiaščeńniem ludziej pamiž ES i treciaj krainaj mahło ažyćciaŭlacca bolš efiektyŭna.
Naroŭni z dahavorami ab spraščeńni vizavaha režymu i readmisii pamiž Biełaruśsiu i Jeŭrasajuzam, pieramovy pa jakich praciahvajucca, «Partniorstva dla mabilnaści» budzie klučavym instrumientam raźvićcia supracoŭnictva ŭ śfiery mihracyi i pašyreńnia mabilnaści hramadzian ES i Biełarusi ŭ dobra kiravanych i biaśpiečnych umovach, padkreślivałasia ŭ pres-relizie pavodle vynikaŭ padpisańnia dakumienta.
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary