Siońnia ŭ Minsku chavajuć Jakava Radynu — biełaruskamoŭnaha matematyka, člena-karespandenta Akademii navuk, prafiesara Biełaruskaha dziaržaŭnaha ŭniviersiteta. Jamu było 70 hadoŭ.
Pakutavaŭ jon na rak prastaty.
Jon byŭ rodam ź vioski Brylki Vałožynskaha rajona.
U 1969 hodzie skončyŭ Biełaruski dziaržaŭny ŭniviersitet i pačaŭ tam pracavać. U 1972 hodzie abaraniŭ kandydackuju dysiertacyju «Da teoryi liniejnych raŭnańniaŭ u tapałahičnych viektarnych prastorach». U 1987 hodzie — doktarskuju dysiertacyju «Ekspaniencyjalnyja viektary i dyfierencyjalnyja ŭraŭnieńni». Z 1975 hoda — zahadčyk kafiedry funkcyjanalnaha analizu BDU.
Radyna raspracavaŭ jakasnuju teoryju liniejnych dyfierencyjalnych uraŭnieńniaŭ z rehulatarnymi apieratarami ŭ łakalna-vypukłych prastorach. Uvioŭ paniaćcie viektara ekspaniencyjalnaha typu i na jaho asnovie pabudavaŭ funkcyjanalny padlik, jaki ŭžyvajecca pry daśledavańni dyfierencyjalnych i dyfierencyjalna-apieratarnych uraŭnieńniaŭ. Pabudavaŭ (razam z A.Antanievičam) teoryju nieliniejnych abahulnienych funkcyj (mniemafunkcyj).
Byŭ navukovym redaktaram pieršaha ŭ Biełarusi «Ruska-biełaruskaha matematyčnaha słoŭnika» (1993), suaŭtaram i navukovym kansultantam pieršaj u Biełarusi «Matematyčnaj encykłapiedyi» (2001), aŭtaram biełaruska-polskaha i polska-biełaruskaha matematyčnych słoŭnikaŭ.
Aŭtar kala 150 navukovych prac, u tym liku 10 manahrafij, padručnikaŭ i vučebnych dapamožnikaŭ.
Na pačatku 90-ch jaho prapanoŭvali na pasadu ministra adukacyi, ale kandydaturu nie padtrymaŭ Viačasłaŭ Kiebič.
Cyn Jakava Radyny taksama vykładaje matematyku ŭ BDU pa-biełarusku.
Jahonaja ŭnučka vučycca na vydatna ŭ biełaruskamoŭnym licei imia Jakuba Kołasa.
«Naša Niva» dałučajecca da spačuvańniaŭ siamji vydatnaha navukoŭca.
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary